استانادا «قازپوشتا» اق-نىڭ ءىرى جوباسى – فۋلفيلمەنت-ورتالىعى ىسكە قوسىلدى. اعىمداعى جىلدىڭ 8 ايلىق كورسەتكىشى بويىنشا قازاقستانداعى ەلەكتروندى ساۋدا كولەمى 159 ملرد. تەڭگەنى قۇراپ وتىر. ال اتالعان ورتالىق ەلىمىزدەگى ەلەكتروندى ساۋدانىڭ ودان ءارى دامۋىنا سەپتىگىن تيگىزبەك. ونىڭ باستى قىزمەتىنە تاۋارلاردى قابىلداپ، سۇرىپتاپ، ساقتاپ جانە ودان ءارى يەلەرىنە جەتكىزۋ سىندى قىزمەت تۇرلەرى جاتادى. ورتالىق تولىقتاي زاماناۋي تەحنولوگيالارمەن جابدىقتالىپ، تۇرعىندارعا ساپالى قىزمەت ۇسىنۋعا نەگىزدەلگەن.

ءىس-شاراعا ق ر پرەمەر-مينيسترىنىڭ ورىنباسارى اسقار جۇماعالييەۆ، «قازپوشتا» اق باسقارما ءتوراعاسى ساكەن سارسەنوۆ، سونداي-اق فۋلفيلمەنت ورتالىعىنىڭ العاشقى تۇتىنۋشىلارىنىڭ ءبىرى «KBT Group» كومپانياسىنىڭ وكىلدەرى قاتىستى.

شارا بارىسىندا اسقار جۇماعالييەۆ «قازپوچتا» اق-نىڭ كاسىپكەرلەر ءۇشىن اشقان العاشقى فۋلفيلمەنت ورتالىعىنىڭ ىشكى تىنىس-تىرشىلىگىمەن تانىستى. ول ورتالىق تاراپىنان الداعى ۋاقىتتا ەل ەكونوميكاسىن ايتارلىقتاي كوتەرەتىن ناتيجەلى كورسەتكىشتەر كۇتەتىنىن ايتتى.

«سىزدەر بىلەسىزدەر، شاعىن جانە ورتا كاسىپكەرلىكتى ەلباسىنىڭ ءوزى قولداپ وتىر. سونىڭ نەگىزىندە بۇگىندە سالىق كودەكسىنە وزگەرىستەر ەنگىزىلدى. اتالعان وزگەرىستەرگە سايكەس كاسىپكەرلەردىڭ سالىق تولەۋى جەڭىلدەدى. ونىڭ ەلەكتروندىق ساۋداعا دا قاتىسى بار، سوندىقتان ۇكىمەت سىزدەردەن ناتيجەلى جۇمىس كۇتەدى. ەڭ باستىسى، ەل ەكونوميكاسىن دامىتۋدا جاڭا جۇمىس ورىندارىنىڭ اشىلۋى، بۇل قۋانتارلىق جاعداي»، – دەپ مالىمدەدى اسقار قۋانىش ۇلى.

ورتالىق كاسىپكەرلەردىڭ تاۋاردى يەسىنە جەتكىزۋىن جەڭىلدەتىپ قانا قويماي، ودان باسقا قويمالارمەن، بايلانىس ورتالىقتارىمەن، لوگيستيكا جانە قىزمەتكەرلەر قۇرامىمەن قامتاماسىز ەتۋ شىعىنىن ايتارلىقتاي ازايتۋعا كومەكتەسەدى.

«ينتەرنەت-ساۋدا مادەنيەتىنىڭ دامۋىمەن قاتار، قازاقستاندىقتاردىڭ ونى جەتكىزىپ بەرۋگە دەگەن تالابى دا ارتتى. ءقازىر ءبىز جەتكىزۋ مەرزىمدەرىن قىسقارتۋ بويىنشا جۇمىستار جۇرگىزىپ جاتىرمىز، حالىقارالىق كۋرەرلىك جانە لوگيستيكالىق كومپانيالارمەن جانە پوشتا وپەراتورلارىمەن ىنتىماقتاستىق ورناتتىق. قازىرگى كۇنى جالپى اۋدانى 3 مىڭ شارشى مەترلىك قويمادا 20 ينتەرنەت-دۇكەننىڭ 600 مىڭ تاۋارى ساقتالعان. جىل باسىنان بەرى 700 مىڭنان استام جونەلتىمدەر وڭدەلىپ، تۇتىنۋشىلارعا جەتكىزىلدى» – دەدى «قازپوشتا» اق باسقارما ءتوراعاسى ساكەن سارسەنوۆ. 

جاڭا ورتالىقتىڭ تۇتىنۋشىسى «KBT Group» كومپانياسىنىڭ ديرەكتورى ءوز كەزەگىندە اسقار جۇماعالييەۆكە ورتالىقتاعى قىزمەتىن باياندادى.

«اعىمداعى جىلدىڭ قاڭتار ايىنان باستاپ ءبىز وسى ورتالىقتا قارقىندى جۇمىس جاساۋدامىز. قويما كەرەمەت، جۇك تاسىمالداۋ زاماناۋي تەحنولوگيالاردى ورىندى پايدالانۋ ارقاسىندا وتە جىلدام جۇرگىزىلەدى. بارلىق جۇيە اۆتوماتتاندىرىلعان. بۇعان دەيىن ءبىز قازپوشتانىڭ باسقا بولىمدەرىنە بارىپ، جۇمىس بارىسى ۇزاققا سوزىلاتىن. ال ءقازىر فۋلفيلمەنت ورتالىعىنىڭ ارقاسىندا ماسەلە شەشىلدى. ەلەكتروندى تاپسىرىس الامىز، تاۋاردى قازپوشتاعا تاپسىرامىز، ءارى قاراي ولار قاجەتتى مەكەن-جايعا جىبەرىپ، بىزگە تابىس اكەلەدى» – دەيدى ولجاس نۇرالدينوۆ «KBT Group» ديرەكتورى.

«KBT Group» كومپانياسى ءوز جۇمىسىن 5 جىل بۇرىن باستاعان. ول كەزدە جىلىنا جىبەرىلىپ وتىراتىن جونەلتىلىمدەردىڭ سانى 15 000 بولعان. ال ءقازىر مۇنداي زاماناۋي ورتالىقتاردىڭ ارقاسىندا بۇل كورسەتكىش ميلليونعا جەتكەن. كومپانيا قازىردە قىرعىزستان، ارمەنيا ەلدەرىنە تاۋار جونەلتەدى، الداعى ۋاقىتتا رەسەي جانە وزبەكستان ەلدەرىنە جونەلتىمدەر جىبەرۋ كوزدەلىپ وتىر.

«قازاقستانداعى ەلەكتروندىق ساۋدا نارىعى وتە تەز دامىپ كەلەدى. ازىرگە ەلىمىزدە جىلىنا 30-40% وسەتىن جالعىز نارىق بولىپ وتىر. ويتكەنى كوپتەگەن ارتىقشىلىقتار بار: لوگيستيكا جاعىنان الىپ قاراساق تا، تولەم قۇرالدارىن الساق تا، تۇتاستاي العاندا، حالىق ەلەكتروندى ساۋدانى قولداپ، سەنىم ارتۋدا» – دەپ ايتىپ ءوتتى اسقاربەك الشانبايەۆ «قازپوشتا» اق ەلەكتروندى ساۋدا بويىنشا اتقارۋشى ديرەكتورى.

ايتىپ ءوتۋ كەرەك، وسىنداي ورتالىقتار قۇرۋ 2018-2020 جىلدارعا ارنالعان قازاقستان رەسپۋبليكاسىندا ەلەكتروندىق كوممەرسيانى دامىتۋدىڭ جول كارتاسىندا بەكىتىلگەن.