بۇگىن ورتالىق كوممۋنيكاسيالار ورتالىعىندا «قازاقستان» رترك اق تاپسىرىسى بويىنشا تۇسىرىلگەن «كوشپەندىلەر»  اتتى دەرەكتى فيلمگە قاتىستى بريفينگ ءوتتى.

شاراعا باسقارما ءتوراعاسى ەرلان قارين،  «ءبىلىم - يننوۆاسيا» حالىقارالىق قوعامدىق قورىنىڭ پرەزيدەنتى دارحان وتە ەرماحان ۇلى، موڭعوليادا تۇراتىن الەمگە تانىمال قازاقتىڭ بۇركىتشى قىزى ايشولپان نۇرعايىپ قىزى مەن اناسى الماگۇل كوكسەگەن قاتىستى.

جوبانىڭ ماقساتى – ءار ەلدە تۇراتىن قازاقتاردىڭ ءومىرى مەن تۇرمىس-تىرشىلىكتەرىندەگى ەرەكشەلىكتەرىمەن تانىستىرىپ، ۇلتىمىزدىڭ ءسالت-داستۇرىن دارىپتەۋ.

«كوشپەندىلەر» دەرەكتى ءفيلمىنىڭ نەگىزگى ماقساتى كەزىندە شەتەلگە قونىس اۋدارىپ، سول جاقتاردا تۇراقتاپ قالعان قانداستارىمىزدىڭ ءومىرى مەن تۇرمىس-سالتىن كوپشىلىككە كورسەتۋ. دەرەكتى فيلمدەر توپتاماسى 12 بولىمنەن تۇرادى. وسى جوبانى جۇزەگە اسىرعان وتانداسىمىز، بەلگىلى رەجيسسەر  قانات بەيسەكەيەۆ. فيلم موڭعوليا، اۋعانىستان، جۇڭگو، تۇركيا، يران جانە ت.ب ەلدەردى مەكەن ەتكەن قازاقتاردىڭ تاعدىرى جايلى باياندايدى. ياعني، ءار ەلدە تۇراتىن قازاقتاردىڭ تۇرمىس-تىرشىلىگى، ەرەكشەلىكتەرى كورسەتىلەدى. «كوشپەندىلەر»  دەرەكتى فيلمدەر توپتاماسى ۇلتتىق ارنادان 14 قازاننان باستاپ 23 جەلتوقسانعا دەيىن ەفيرگە شىعاتىن بولادى. سول فيلمدەردىڭ العاشقىسىنىڭ كەيىپكەرى ورتامىزدا وتىرعان موڭعوليادا تۇراتىن قازاقتىڭ بۇركىتشى قىزى ايشولپان نۇرعايىپ قىزى قازاقستانعا ءبىرىنشى رەت كەلىپ وتىر»،-دەدى ەرلان قارين.

ءفيلمنىڭ كەيىپكەرلەرى كادردان تىس ءماتىنسىز، باستارىنان وتكەرگەن وقيعالارىن، اتا-بابالارىنىڭ تاريحىن باياندايتىن بولادى. العاشقى فيلمدە موڭعوليادا تۇراتىن باۋىرلارىمىز اتادان بالاعا مۇرا بولىپ كەلە جاتقان سالت-داستۇرلەردى ءسوز ەتەدى.           اتامەكەننەن جىراقتا جۇرگەن قانداستارىمىزدىڭ شىنايى ءومىرى كەز كەلگەن كورەرمەننىڭ قىزىعۋشىلىعىن وياتارى ءسوزسىز.

ايتا كەتەيىك، 2016 جىلى موڭعوليادا تۇراتىن قازاق قىزى ايشولپان نۇرعايىپ قىزى تۋرالى «بۇركىتشى قىز» (The Eagle Huntress) اتتى رەجيسسەر وتتو بەللدىڭ دەرەكتى ءفيلمى شىققان بولاتىن. العاش رەت 2014 جىلى  اعىلشىننىڭ Daily Mail باسىلىمى «قازاقتىڭ سالت-داستۇرىندەگى اسىل قۇندىلىقتاردىڭ ءبىرى - قۇسبەگىلىك ونەرىن يگەرگەن ون ءۇش جاسار جالعىز قىز» اتتى  ايشولپان جايلى ماقالا جاريالاپ، ونى بۇكىل الەمگە تانىمال ەتتى.