سەۋل اۋەجايىندا الماتىعا Air Astana اۋە كومپانياسى جولاۋشىلار ۇشاعىنىڭ كەستەدەگى ۋاقىتىنان كەشىگىپ ۇشۋىنا كىنالى بولعان قىرعىزستان ەڭبەك جانە الەۋمەتتىك دامۋ ءمينيسترىنىڭ ورىنباسارى زۋۋراكان كادەنوۆا قىزمەتىنەن بوساتىلعان. كادەنوۆانى وتستاۆكاعا جىبەرۋ تۋرالى وكىمگە قىرعىزستان پرەمەر-مينيسترى مۋحاممەدكالىي ابىلگازييەۆ قول قويعان دەپ حابارلايدى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ.
بۇعان دەيىن وڭتۇستىك كورەيا اۋەجايىندا الماتىعا باراتىن ۇشاقتان جولاۋشىلاردى تۇسۋگە ءماجۇر ەتكەن. قىرعىز پارلامەنتىنىڭ دەپۋتاتى ايدا يسمايلوۆا Facebbok الەۋمەتتىك جەلىسىندەگى پاراعىندا جولاۋشىلار ۇشاعى «ءبىزدىڭ ءبىر مينيسترلىگىمىزدىڭ جوعارى لاۋازىمدى شەنەۋنىگىن قاتتى ماس كۇيىندە ۇشاق سالونىنان تۇسىرە الماعاندىقتان» كەستەدەگى ۋاقىتىنان كەشىككەن دەپ جازعان.
قىرعىزستاننىڭ وڭتۇستىك كورەياداعى ەلشىسى كىلىچبەك سۇلتانوۆ ۇشاقتا زۋۋراكان كادەنوۆانىڭ بولعانىن راستادى.
"ەلشىلىككە ديپلوماتيالىق پاسپورتى بار ازاماتىمىزدىڭ ۇشاقتا ماس كۇيىندە بولعانى جانە ۇشاقتار تۇسكىسى كەلمەگەنى تۋرالى اقپارات ءتۇستى. كونسۋل مەن تاعى ءبىر قىزمەتكەرىمىز اۋەجايعا شىقتى. بىر-ەكى ساعاتتا ولار اۋەجايعا جەتكەن. ول ۇشاقتان تۇسپەي وتىرىپ العاندىقتان، ولارعا جولاۋشىلاردىڭ ءبارىن ءتۇسىرىپ، قايتا تىركەۋدەن وتكىزۋگە تۋرا كەلگەن. ۇشاق كەشىگىپ ۇشقان"، - دەپ حابارلادى كىلىچبەك سۇلتانوۆ.
قىرعىزستان پرەزيدەنتى اپپاراتى باسپا ءسوز قىزمەتىنىڭ جەتەكشىسى تولگوناي ستامالييەۆا Facebook الەۋمەتتىك جەلىسىندەگى پاراقشاسىندا بۇگىن وزىنە سەۋلدەگى وقيعاعا بايلانىستى جۋرناليستەر حابارلاسىپ، كادەنوۆانىڭ پرەزيدەنت سوورونباي جەەنبەكوۆكە قاتىسى تۋرالى سۇراعانىن ايتتى. «ول [كادەنوۆا] پرەزيدەنتتىڭ تۋىسى ەمەس ەكەنىن رەسمي تۇردە حابارلايمىز»، - دەگەن ستامالييەۆا.
الماتى اۋەجايىنىڭ رەسمي سايتىنداعى اقپاراتتا Air Astana اۋە كومپانياسىنىڭ K-910 رەيسى سەۋل اۋەجايىنان كەشىگىپ كەلگەنى ايتىلعان. ۇشاق الماتىعا كەستەدە كورسەتىلگەندەي جەرگىلىكتى ۋاقىتپەن 16:45 كەزىندە ەمەس، 18:07-دە قونعان.
