اقتوبە قالاسىندا قۇرىلىس جۇمىستارى قارقىندى جۇرۋدە. جۋىردا شاھاردىڭ 5-شاعىن اۋدانىنداعى كوپىر مەن ءتورت جولاقتى ەكى اينالما جول اشىلدى.

— كوپىر جەرگىلىكتى تۇرعىنداردىڭ جول قوزعالىسى ءۇشىن ماڭىزدى ەكەنى ءمالىم. وسىدان بەس اي بۇرىن وسى جەردە قۇرىلىس جۇمىستارىن باستاعان ەدىك. مىنە، سول قۇرىلىس اياقتالىپ، كوپىردى حالىق يگىلىگىنە بەرىپ وتىرمىز. بۇل —قالانىڭ ەكى اۋماعىن، ياعني استانا مەن الماتى اۋداندارىن قوساتىن اينالما جولدارى بار ءبىرىنشى كوپىر بولعالى تۇر. بۇل كوپىر باتىر ءاليا مولداعۇلوۆانىڭ اتىمەن اتالاتىن بولادى. مەملەكەت باسشىسى نۇرسۇلتان نازاربايەۆتىڭ تاپسىرماسىنا ساي، اقتوبە ەلىمىزدەگى ميلليون تۇرعىنى بار ءتورتىنشى ءىرى اگلومەراسيالىق ورتالىق. سوندىقتان قالامىزدا وسىنداي يگى ىستەر جاسالۋى ءتيىس. الداعى ايدا جولاۋشىلارعا ارنالعان ەكى ءجولۇستى وتكەلدەرى اشىلادى،— دەدى وبلىس اكىمى بەردىبەك ساپاربايەۆ.

ەكى اينالما جول مەن جارىقتاندىرىلاتىن جەراستى جولىن قامتيتىن «تۋرگەنيەۆ كوشەسىنەن جۇبانوۆا كوشەسىنە دەيىنگى ارالىقتى ۇزارتۋ» جوباسىنىڭ جالپى قۇنى — 1 ملرد 232 ملن تەڭگە. قۇرىلىس جۇمىستارىن جۇزەگە اسىرعان مەردىگەر كومپانيا — استانالىق «پروگرەسس KZ» ج ش س. اتالعان سەرىكتەستىك باسشىسى بەكزات مۋسەيەۆتىڭ ايتۋىنشا، ەكى جىلعا ارنالعان جوبانىڭ نەگىزگى جۇمىستارى اياقتالدى.

— بۇل وتە كۇردەلى قۇرىلىس بولدى. جۇمىستى ماۋسىم ايىندا باستادىق، كوپىرگە قاتىستى جۇمىستاردى 2 اي 20 كۇندە اياقتادىق. كوپىر جابىلعان ۋاقىتتا شىدامدىلىقپەن كۇتە بىلگەن اقتوبەلىكتەرگە، قولداۋ كورسەتكەن جەرگىلىكتى اكىمدىككە، بارشا جۇمىسشىلارعا العىسىمدى بىلدىرەمىن، — دەيدى ول. ب.مۋسەيەۆتىڭ ايتۋىنشا، جوبا اياسىندا وتىز جىلدان استام ۋاقىت بويى اۋىستىرىلماعان كوممۋنالدىق، سونىڭ ىشىندە جىلۋمەن، سۋمەن قامتۋ، بايلانىس جەلىلەرى جاڭارتىلعان، ەلەكتر جەلىلەرى جۇرگىزىلىپ، اۋماق جارىقتاندىرىلعان. الداعى ۋاقىتتا توسەلگەن جولدار مەن ادامدار جۇرەتىن جولدى اباتتاندىرۋ، اينالاسىن جارىقتاندىرۋ جۇمىستارى جالعاستىرىلادى.

جول وتكەلىنىڭ سالتاناتتى اشىلۋىنا ارداگەرلەر دە كەلدى. سونىڭ ءبىرى — جول قۇرىلىسى سالاسىندا ۇزاق جىلدار جۇمىس ىستەگەن وسى سالا ارداگەرى باعلان بايماعامبەتوۆ.

— بۇل كوپىر 1974 جىلى سالىنعان. وسى كوپىردىڭ استىنان توننەل سالىپ، ەكى اينالما جول قۇرىلىسىن جۇرگىزۋ وتە ماڭىزدى جوبا بولىپ وتىر. بۇل جول وتكەلىنىڭ اشىلۋىمەن قالاداعى كولىك تىعىنى ءبىرشاما ازايادى. بۇرىنعى كوپىرمەن سالىستىرعاندا بۇل جەردە كولىك ءنوپىرى كەمىندە 15-20 پايىزعا ارتادى. سەبەبى وسى جول وتكەلى ارقىلى ءتورت باعىتقا قاراي ەركىن قوزعالۋعا بولادى، — دەيدى ول.

تۇرعىنداردى اقتوبە قالالىق ارداگەرلەر كەڭەسىنىڭ ءتوراعاسى احات مىرزالين دە قۇتتىقتادى. -بۇرىن قالادا 300 مىڭداي تۇرعىن بولسا، بۇگىندە 500 مىڭنان اسىپ وتىر. كولىك سانى 250 مىڭنان كوپ. سوندىقتان بۇل جەردە جولدى كەڭەيتۋ ناعىز دەر كەزىندە قولعا الىندى، — دەيدى ول.