اقتوبە وبلىسىنىڭ ىرعىز اۋدانىندا كەمپينگ پەن دەمالىس ساياباعى تۇرعىنداردىڭ يگىلىگىنە بەرىلدى.

جول بويىنداعى «ۇلى دالا» كەمپينگى اقتوبە مەن ارال قالالارىنىڭ ورتاسىندا ورىن تەپكەن. ءۇش جىلعا سوزىلعان قۇرىلىس جۇمىستارىنا «التىن اسەل» ج ش س 87 ميلليون تەڭگە جۇمساعان. سەرىكتەستىك باسشىسى حاميت وتەۋ ۇلىنىڭ ايتۋىنشا، كەمپينگتە 10 ادامعا شاقتالعان ءقوناقۇي، 70 ادامعا ارنالعان اسحانا بار. ازىرگە مۇندا 8 ادام جۇمىس ىستەيدى. الداعى ۋاقىتتا بۇل جەردە كولىك جوندەيتىن ورتالىق، باسقا دا سەرۆيستىك ورتالىقتاردى اشۋ جوسپارلانىپ وتىر.

— سىزدەر كەمپينگتى «ۇلى دالا» دەپ ادەمى اتاپسىزدار. مۇندا ەۋروپا مەن ازيانى بايلانىستىراتىن ۇلكەن ءدالىز بار. ونىڭ 600 شاقىرىمى اقتوبە وبلىسىنىڭ اۋماعىنا كىرەدى. بۇل جەردەن كۇنىنە 10-12 مىڭ كولىك وتەدى. ال جۇرگىزۋشىلەر مەن جولاۋشىلارعا اس-اۋقات، دەمالىستىڭ قاجەت ەكەنى ايتپاسا دا تۇسىنىكتى. ءبىر سوزبەن ايتقاندا، ءبىز جول بويىنداعى ادامدارعا ساپالى قىزمەت كورسەتۋگە مۇددەلى بولۋىمىز كەرەك. ەلباسى نۇرسۇلتان نازاربايەۆتىڭ ءوزى جول بويىنداعى كاسىپتى دامىتۋعا قاتىستى تاپسىرما بەرگەنى بەلگىلى، — دەپ اتاپ ءوتتى بەردىبەك ساپاربايەۆ.

«ءبىز ءۇشىن بۇل تابىس كوزى. سوندىقتان مال شارۋاشىلىعىنان بولەك، وسى كاسىپ تۇرىمەن اينالىسۋعا بەل بۋدىق. سول ارقىلى ءوزىمىزدىڭ ونىمدەرىمىزدى دە قامتيمىز»، — دەدى حاميت وتەۋ ۇلى.

سونداي-اق «تۋعان جەرگە تاعزىم» اكسياسى اياسىندا اۋداننىڭ قاراقۇدىق اۋىلىندا دەمالىس ساياباعى اشىلدى. ونى دا سالعان — «التىن اسەل» ج ش س. سەرىكتەستىك بۇل ماقساتتا 5 ميلليون تەڭگەنى جۇمساپتى. ەكى مىڭ جاس كوشەت ەگىلىپ، جان-جاعى اباتتاندىرىلىپ ءھام جارىقتاندىرىلعان ساياباقتا انا مەن بالاعا ارنالعان «ارۋ انا» ەسكەرتكىشى تۇرعىزىلعان.

— اركىمگە ءوزىنىڭ تۋعان جەرى ىستىق. بۇل — بارىمىزگە ورتاق سەزىم. ءار كەلگەن سايىن سىزدەردەگى تازالىقتى، جايقالا ءوسىپ تۇرعان جاس جەلەكتى كورىپ، كوز سۇيسىنەدى. وسى ورايدا كوپ نارسە ادامدارعا بايلانىستى ەكەنى ءسوزسىز. بۇل رەتتە حاميت وتەۋ ۇلىنىڭ ەڭبەگىن ەرەكشە اتاپ وتكەن ءجون. «تۋعان جەرگە تاعزىم» اكسياسى اياسىندا ءوزىنىڭ تۋعان جەرىنىڭ كوركەيۋىنە ۇلەس قوسىپ، قاراقۇدىق پەن قۇمتوعاي اۋىلدارىندا ستاديوننىڭ سالىنۋىنا كومەكتەسكەن وسى ازاماتقا وبلىس باسشىلىعى اتىنان العىسىمدى ايتامىن، — دەدى وبلىس اكىمى بەردىبەك ساپاربايەۆ.

سەرىكتەستىكتىڭ ءوزى اۋىلدىقتارعا ءجيى كومەكتەسىپ تۇرادى. اتالعان ازاماتتىڭ سەپتىگىمەن اۋىلدا ينتەرنات جاڭارتىلىپ، «ەڭبەك ەرلەرى الاڭى» مەن «بوزداقتار الاڭى» مەموريالدارى بوي كوتەردى. سەرىكتەستىك جۇمىسشىلارىنا ارنالعان بىرنەشە ءۇي سالىنعان.

— حاميت اعايدىڭ جاردەمىن ايتىپ جەتكىزۋ مۇمكىن ەمەس. ايتالىق، ول مەكتەپتىڭ ماتەريالدىق-تەحنيكالىق بازاسىن جاڭارتىپ، ارداگەرلەر ۇيىنە جيھاز الىپ بەردى، — دەدى قۇمتوعاي اۋىلدىق وكرۋگىنىڭ اكىمى ءال-فارابي الىبەك ۇلى.