اقتوبە وبلىسىنىڭ قارعالى اۋدانى بادامشا اۋىلىندا قۋاتتىلىعى 48 مۆت بولاتىن جالپى سوماسى 33 ميلليارد تەڭگەگە جەل ەلەكتر ستانساسىنىڭ قۇرىلىسى باستالماق.
كەشەن كەلەر جىلدىڭ سوڭىندا پايدالانۋعا بەرىلەدى. بۇل تۋرالى كەشە «سنپس-اقتوبەمۇنايگاز» اكسيونەرلىك قوعامى عيماراتىندا وبلىس اكىمى بەردىبەك ساپاربايەۆتىڭ توراعالىعىمەن «ترانسۇلتتىق كورپوراسيالار. جاڭعىرتۋ جانە ينۆەستيسيالىق جوبالار» تاقىرىبىندا وتكەن بيزنەس-كەڭەستە ءمالىم بولدى. بيزنەس-كەڭەسكە «قازحروم»، ورتالىق ازياداعى «Sinopek Group»، «CNPC» سىندى ترانسۇلتتىق كورپوراسيالار جانە ءوڭىردىڭ باسقا دا ءىرى كاسىپورىندارىنىڭ وكىلدەرى، جاڭا يننوۆاسيالىق جوبالاردىڭ باستاماشىلارى، ءبىرقاتار اۋدان اكىمدەرى قاتىستى.
وبلىس اكىمى بەردىبەك ساپاربايەۆ جينالعاندارعا مەملەكەت باسشىسى نۇرسۇلتان نازارباەتىڭ الدىمىزعا ۇلكەن مىندەت قويعانىن، ياعني ءتورتىنشى وندىرىستىك ريەۆوليۋسيانى ۇيىمداستىرۋ، سونىڭ ناتيجەسىندە قازاقستان ەكونوميكاسىن دامىتۋ، ونىڭ ىشىندە، ءوندىرىستىڭ قارقىنىن كۇشەيتۋ، ەكونوميكالىق كورسەتكىشتى كوبەيتۋ كەرەكتىگىن، سونىڭ ەسەبىنەن ەلىمىزدى دامىعان وتىز ەلدىڭ قاتارىنا تەزىرەك ەنگىزۋ قاجەت ەكەنىن اتاپ ءوتتى.
— ەلباسى بەرگەن وسى تاپسىرمانى ورىنداۋ ماقساتىندا سىزدەر مەن ءبىز وزىمىزگە مىندەت العان بولاتىنبىز. ەستەرىڭىزدە بولسا، بىلتىر ۇكىمەت باسشىسى باقىتجان ساعىنتايەۆقا 2018-2019 جىلدارى وبلىستا قانشا كاسىپورىننىڭ جاڭعىرتىلاتىنىن، وعان سالىناتىن قاراجات مولشەرىن، جالپى سىزدەردىڭ كومەكتەرىڭىزبەن ءوڭىر ەكونوميكاسىن قانشا پايىزعا دامىتاتىنىمىز تۋراسىندا ايتقان بولاتىنبىز. ءبىز وبلىس ەكونوميكاسىنىڭ دامۋ قارقىنىن 5 پايىزدان تومەندەتپەۋ تۋراسىندا مىندەت العانبىز. ول ءۇشىن بەرىلگەن تاپسىرمالاردى، ياعني مۇناي-گاز شىعارۋدى، حروم، ءتۇستى مەتالداردى ءوندىرۋ كولەمىن كوبەيتۋىمىز قاجەت. ءاربىر كاسىپورىن وزىنە العان مىندەتتەمەسىن تولىعىمەن ورىنداۋى ءتيىس. ءبىرىنشى جارتىجىلدىقتى 5 پايىز وسىممەن اياقتادىق. مۇناي بۇرعىلاۋ ءىسىنىڭ تومەندەۋىنە بايلانىستى جەتى ايدىڭ قورىتىندىسى 4،8 پايىز بولدى. قازىرگى بولجامىمىز بويىنشا، سەگىز ايدىڭ قورىتىندىسى بويىنشا 5 پايىز ءوسىم بولۋى كەرەك، — دەدى ول.
وبلىس اكىمىنىڭ ايتۋىنشا، وتكەن جىلى ايماقتا ينۆەستيسيا كولەمى 465 ميلليارد تەڭگەنى قۇراسا، بيىل بۇل كورسەتكىشتى 530 ميلليارد تەڭگەگە جەتكىزۋ مەجەلەنگەن. وتكەن جەتى ايدىڭ قورىتىندىسى بويىنشا، ينۆەستيسيا كولەمى شامامەن 260 ميلليارد تەڭگەگە جەتىپتى. بۇل ورايدا بەردىبەك ماشبەك ۇلى وبلىس ەكونوميكاسىن وركەندەتۋگە سۇبەلى ۇلەس قوسىپ وتىرعان «سنپس-اقتوبەمۇناي» كاسىپورنىنىڭ قولداۋىن ەرەكشە اتادى. بۇگىنگى كۇنى وبلىس اكىمدىگى مەن اتالعان كاسىپورىن باسشىلىعى اراسىندا ينۆەستيسيا كولەمىن وتكەن جىلدان تومەندەتپەۋ تۋراسىندا كەلىسىم بار.كەڭەستە وبلىس اكىمىنىڭ ورىنباسارى قايرات بەكەنوۆ وڭىردەگى وندىرىستىك كاسىپورىنداردىڭ تەحنولوگيالىق جاڭعىرۋى تۋراسىندا باياندادى. ونىڭ ايتۋىنشا، بيىل اقتوبەدە 85 ميلليارد تەڭگەگە 42 كاسىپورىن جاڭعىرتىلادى.
كاسىپورىنداردىڭ جاڭعىرتىلىپ، سيفرلاندىرىلۋى ەسەبىنەن ءوڭىر ەكونوميكاسىنىڭ دامۋ قارقىنى 2 پايىزعا ارتپاق. بيزنەس وكىلدەرى باس قوسقان كەڭەستە «Sinopek Group»، «سNPC» ترانسۇلتتىق كومپانيالارى مەن «سنپس-اقتوبەمۇنايگاز» اق، «قازاقتۇرىكمۇناي» ج ش س وكىلدەرى كاسىپورىندى تەحنولوگيالىق جاڭعىرتۋ باعىتىندا ءارى الەۋمەتتىك جاۋاپكەرشىلىك اياسىندا اتقارىلىپ جاتقان جۇمىستار تۋراسىندا ايتتى. سونداي-اق، ولار الداعى 3-5 جىلعا ارنالعان جوسپارلارى تۋرالى دا ءسوز قوزعادى.
بۇگىنگى تاڭدا وبلىستا ونەركاسىپتىڭ ءتۇرلى سالالارىندا 5 ترانسۇلتتىق كورپوراسيا جۇمىس جاسايدى. وسىلايشا بيىلدان باستاپ مەنشىك يەلەرى «ENI» (90 پايىز) جانە «General Electric» (10 پايىز) ەكى ءىرى ترانسۇلتتىق كومپانياcى بولىپ تابىلاتىن «Arm Wind» جاۋاپكەرشىلىگى شەكتەۋلى سەرىكتەستىگى ينۆەستيسيالىق جوباسىمەن اقتوبە نارىعىنا كەلمەك.
