اقتوبە وبلىسىنىڭ ءۇش اۋدانىندا «ەلدىك سكرينينگ» جوباسى پيلوتتىق رەجىمدە ىسكە قوسىلدى.

ارناۋلى سكرينينگ كاسىپكەرلىكتىڭ ءتيىمدى تۇستارىن انىقتاپ، جاڭا بيزنەس-جوبالاردى قۇرۋ جانە قارجىلاندىرۋ ءۇشىن ايماقتىق دامۋ كارتالارىن قالىپتاستىرۋعا مۇمكىندىك بەرەدى. «اتامەكەن» ۇكپ جوبالىق توبىنىڭ 88 مامانى ەكى اپتادان بەرى مارتوك، العا، قارعالى اۋداندارىنداعى ءۇي شارۋاشىلىعىنداعىلار مەن بيزنەس سۋبەكتىلەرىندە ساۋالناما جۇرگىزىپ جاتىر. انكەتاداعى 29 نەگىزگى سۇراققا جاۋاپ بەرگەندەر تۇرعىندارعا ناقتى نە كەرەكتىگىن انىقتاۋى ءتيىس. قورىتىندىسىندا سكرينينگ ءوڭىردىڭ ناقتى قاجەتتىلىگىن ەسكەرەتىن جول كارتاسىن جاساۋعا جول اشادى.

— اقتوبە وبلىسىندا جۇزەگە اسىرىلىپ جاتقان سكرينينگتىڭ باسقا پيلوتتىق جوبالاردان باستى ەرەكشەلىگى، سكرينينگ اياسىندا جانە ونىڭ ناتيجەلەرىن ساراپتار تۇستا IT-شەشىمدەر بەلسەندى قولدانىلىپ جاتىر. سكرينينگ قورىتىندىسى بويىنشا، اۋداندار مەن قالالاردا ءارى قاراي جاڭارتىلىپ وتىراتىن دامۋ كارتالارى جاسالادى، — دەپ اتاپ ءوتتى ەلدار جۇماعازييەۆ.

وبلىس اكىمى اۋدان اكىمى مەن اۋىلدىق وكرۋگ باسشىلارىنا جۇمىستى ۇيىمداستىرۋعا جان-جاقتى كومەك بەرۋدى تاپسىردى.

— بۇل — ماڭىزدى جوبا. ول جۇمىسسىزدار مەن ءوزىن-وزى قامتاماسىز ەتەتىندەردىڭ ناقتى سانىن انىقتاپ، جاڭا جۇمىس ورىندارىن اشاتىن بيزنەس-جوبالاردى قۇرۋعا مۇمكىندىك بەرەدى. ءبىز بەلگىلى ءبىر ەلدى مەكەندە قانداي بيزنەس جاساۋعا بولاتىندىعىن، وڭىرگە قانداي ماماندار قاجەت ەكەندىگىن ناقتى بىلەتىن بولامىز. جاعدايدى ءدال ءبىلۋ جەرگىلىكتى جەرلەردە مەملەكەتتىك باعدارلامالاردى جۇزەگە اسىرۋدى جەتىلدىرىپ، تۇرعىنداردىڭ ءال-اۋقاتىن ارتتىرۋ ءۇشىن ءتيىمدى شارالاردى قابىلداۋعا كومەكتەسەدى، — دەپ تۇجىردى وبلىس اكىمى.

ودان بولەك، جيىن بارىسىندا س.سەيفۋللين اتىنداعى قازاق اگروتەحنيكالىق ۋنيۆەرسيتەتى اگروونەركاسىپتىك كەشەنىنىڭ سيفرلاندىرۋعا قاتىستى ارالىق قورىتىندىسىنىڭ تانىستىرىلىمى جاسالدى. اتالعان جوعارى وقۋ ورنىنىڭ پرورەكتورى قايرات ايتۋعانوۆ جەتىستىكتەرگە توقتالىپ، عالىمداردىڭ اۋىلشارۋاشىلىق سالاسىن سيفرلاندىرۋدا جاقسى ناتيجەگە قول جەتكىزگەنىن اتاپ ءوتتى. ول ءنارلى زاتتاردىڭ قۇرامىن انىقتايتىن جوبانى تانىستىرىپ، جەردى عارىشتان زەرتتەۋگە قاتىستى تەحنولوگياعا توقتالدى. بۇل تەحنولوگيا ەگىننىڭ جيىن-تەرىنىنىڭ ناقتى كورسەتكىشىن بىلۋگە مۇمكىندىك بەرەدى. بارلىق ۇسىنىلعان تەحنولوگيا وبلىس باسشىلىعى تاراپىنان قولداۋ تاپتى.