جۋىردا اقتوبە وبلىسىنىڭ اكىمى بەردىبەك ساپاربايەۆ ءازىربايجان رەسپۋبليكاسىنىڭ توتەنشە جانە وكىلەتتى ەلشىسى راشاد ماممادوۆپەن كەزدەستى.

— بيىلعى جىلدىڭ جەتى ايى ىشىندە قازاقستان مەن ءازىربايجان اراسىنداعى تاۋاراينالىم — 142 ملن دوللار. وتكەن جىلدىڭ سايكەس كەزەڭىمەن سالىستىرعاندا، ءوسىم — 56 پايىز، — دەدى ءوزارا ساۋدا-ساتتىق كولەمىن ۇلعايتۋ قاجەتتىگىن اتاپ وتكەن ديپلوماتيالىق وكىلدىك باسشىسى.

— قازاقستان — ءبىزدىڭ بيزنەس پەن ينۆەستيسيامىزدىڭ قاۋىپسىزدىگىن قامتاماسىز ەتەتىن اعايىن ەل. اقتوبە وبلىسى ءبىزدى ءوڭىرارالىق ارىپتەستىكتى ءارى قاراي جالعاستىرۋ تۇرعىسىنان قىزىقتىرادى. قازىرگى ساپارىمىزدىڭ اياسىندا ءوڭىردىڭ ەكسپورتتىق الەۋەتى تۋرالى اقپارات العىمىز كەلەدى، — دەدى راشاد ماممادوۆ.

ءوز كەزەگىندە وبلىس اكىمى ءوزارا ىنتىماقتاستىق قارىم-قاتىناستى نىعايتۋدا قىزىعۋشىلىق تانىتاتىنىن راستادى. بەردىبەك ساپاربايەۆ ەكى ەل باسشىلارىنىڭ ارقاسىندا، سونىڭ ىشىندە وڭىرلەردە قارىشتى دامىپ كەلە جاتقان ءازىربايجان مەن قازاقستان اراسىنداعى ءداستۇرلى جىلى ءارى دوستىق قارىم-قاتىناستى ەرەكشە اتاپ ءوتتى.

— قازاقستان مەن ءازىربايجان — اعايىن ەلدەر. ءبىزدى ورتاق تۇركى تامىرىمىز، ورتاق رۋحاني مۇرامىز بىرىكتىرەدى، — دەدى وبلىس اكىمى بەردىبەك ساپاربايەۆ.

ەلباسىمىز نۇرسۇلتان نازاربايەۆ اتاپ وتكەندەي «قوس مەملەكەت اراسىندا بۇرىننان تاريحي جانە مادەني بايلانىستارعا نەگىزدەلگەن ءداستۇرلى دوستىق سيپاتىنداعى ەكىجاقتى قارىم-قاتىناس قالىپتاسقان». جىل وتكەن سايىن ساياسي، ساۋدا-ەكونوميكالىق جانە مادەني-گۋمانيتارلىق بايلانىستىڭ دامۋى دا ارتىپ كەلەدى. قازاقستان مەن ءازىربايجان اراسىندا بۇگىنگە دەيىن جۇزدەگەن قۇجاتقا قول قويىلىپ، ەكونوميكالىق ىنتىماقتاستىق جونىندەگى ورتاق پارلامەنتارالىق كومميسياسى تابىستى جۇمىس اتقارۋدا. قوس مەملەكەت اراسىنداعى ىنتىماقتاستىقتىڭ ماڭىزدى اسپەكتىلەرىنىڭ ءبىرى - ترانزيتتىك الەۋەت. ماسەلەن، ءازىربايجان ارقىلى وتەتىن كاۆكازدىق باعىت قازاقستانعا ەۋروپالىق نارىققا شىعۋعا مۇمكىندىك بەرەدى. ال قازاقستان ازەربايجانعا ورتالىق ازيا مەن جۇڭگو نارىعىنا شىعۋعا جول اشادى.

قازاقستان ءازىربايجانعا تەمىرجول جانە ترامۆاي لوكوموتيۆىنىڭ جابدىقتارىن، قارا مەتالل، جانار-جاعارماي، قۇرىلىس ماتەريالدارىن ەكسپورتتايدى. يمپورتتىڭ نەگىزگى بولىگىن قانت جانە كونديتەرلىك ونىمدەر، قارا مەتالدان جاسالعان ونىمدەر، كوكونىس پەن داندەر، تەكستيل ونىمدەرى مەن ەلەكتر قۇرال-جابدىقتارى قۇرايدى.

بۇگىندە اقتوبە وبلىسى اۋماعىندا ءازىربايجان كاپيتالى قاتىساتىن 11 كومپانيا بار. نەگىزىندە بۇل — ەت، جەم، استىق ونىمدەرى، سونىمەن قاتار، قالا قۇرىلىسى مەن ونەركاسىپتىك قۇرىلىسقا مامانداندىرىلعان شاعىن كاسىپكەرلىك سۋبەكتىلەرى.