جۋىردا اقتوبە وبلىسىنا جۇمىس ساپارىمەن تاتارستان رەسپۋبليكاسىنىڭ دەلەگاسياسى كەلدى. دەلەگاسيا قۇرامىنا مەملەكەتتىك ورگانداردىڭ، مۋنيسيپالدى اۋداندار مەن ءىرى اگروونەركاسىپتىك كاسىپورىنداردىڭ باسشىلارى بولدى.

دەلەگاتتاردىڭ وڭىرگە كەلۋلەرىنىڭ نەگىزگى ماقساتى — «اكتەپ» ج ش س بازاسىندا قۇرىلعان اقتوبە ەت كلاستەرىنىڭ جۇمىس جاساۋ تاجىريبەسىن ۇيرەنۋ.

بۇگىندە كاسىپورىن اسىل تۇقىمدى مال وسىرۋمەن اينالىسادى، 11 مىڭ ءىرى قارا مالعا ارنالعان بورداقىلاۋ الاڭى مەن قۋاتى جىلىنا 7200 توننادان اساتىن ەت وڭدەۋ كەشەنى بار. ءقازىر بۇل شارۋاشىلىق وبلىستىڭ 350 شارۋا قوجالىعىمەن ارىپتەستىك قارىم-قاتىناس ورناتتى.

سەرىكتەس بولۋ تابىستى كەڭەيتىپ، انالىق مالدى تولىقتىرۋعا جانە مال تۇقىمىن جاقسارتۋعا اۋقىمدى قاراجات تارتپاي-اق مۇمكىندىك بەرەدى، وزدەرى شىعارعان ەتتىڭ ۇنەمى وتكىزۋ نارىعى بار، جينالعان مال ازىعى ارتىعىمەن بولاتىن قاراپايىم شارۋالار ءۇشىن ءتيىمدى.

وسى اپتانىڭ سەيسەنبىسىندە وبلىس اكىمى بەردىبەك ساپاربايەۆ پەن ق ر اۋىل شارۋاشىلىعى مينيسترلىگىنىڭ جاۋاپتى حاتشىسى اسىلجان مامىتبەكوۆ تاتارستاندىق دەلەگاسيانىڭ باسشىسى، پرەمەر-مينيستردىڭ ورىنباسارى — تر اۋىل شارۋاشىلىق جانە ازىق-تۇلىك ءمينيسترى مارات احمەتوۆپەن كەزدەستى.

— اقتوبە وبلىسى مەن تاتارستان رەسپۋبليكاسى مادەني-گۋمانيتارلىق سالادا ءتيىمدى ءوزارا ارەكەت ەتەدى. اتاپ ايتقاندا، بيىل «باقىتتى بالا» جوباسى اياسىندا العاش رەت ءبىزدىڭ وقۋشىلار قازاندا دەمالىپ، سيفرلىق تەحنولوگيالار سالاسىندا ءبىلىم الدى. الايدا، ءبىز ساۋدا-ەكونوميكالىق سالاداعى قارىم-قاتىناستى دا دامىتۋىمىز كەرەك. بىزدە ارىپتەستىك ەتۋگە بولاتىن سالالار كوپ، اسىرەسە، اۋىل شارۋاشىلىعى سالاسىندا، — دەپ اتاپ ءوتتى بەردىبەك ساپاربايەۆ.

ال ءوز كەزەگىندە ءسوز العان مارات احمەتوۆ قازاقستاندىق تاراپتى جىلى شىرايمەن قابىلداپ، «اكتەپ» ج ش س جۇمىسىمەن تانىسۋعا مۇمكىندىك بەرگەندەرى ءۇشىن العىسىن ءبىلدىردى.

— ماسكەۋدە بىزگە قازاقستاندا، اتاپ ايتقاندا، اقتوبەدە ەت كلاستەرىن قۇرۋداعى بىرەگەي تاجىريبە جونىندە ايتقان بولاتىن. سەرىكتەستەرىمىزدىڭ كەڭەسىمەن ءبىز وسىندا كەلۋدى ۇيعاردىق. اقتوبە ەت كلاستەرىنىڭ جاي بيزنەس جوبا عانا ەمەس، سالماقتى الەۋمەتتىك جوبا ەكەنىن ايتا الامىن. ويتكەنى، كلاستەردىڭ جەكە وڭدەۋ، بورداقىلاۋ الاڭدارىنان وزگە 350 سەرىكتەسى — شارۋا قوجالىعى بار. بۇل جوبا بىزگە وتە قىزىقتى. ەندى ءبىز قازاقستاننىڭ مەملەكەتتىك قولداۋىن سەزە وتىرا ءدال سونداي جوبالاردى تاتارستاندا دا پىسىقتايتىن بولامىز، — دەپ اتاپ ءوتتى م.احمەتوۆ.