اقتوبە وبلىسىندا ورتاشا ەڭبەكاقى 137،7 مىڭ تەڭگەنى قۇراسا، 2017 جىلدىڭ سوڭىندا 126،1 مىڭ تەڭگە بولاتىن. وبلىس ورتاشا ەڭبەكاقىنى كوتەرۋ قارقىنى جاعىنان قازاقستان وڭىرلەرى اراسىندا كوشباسىنداعىلاردىڭ بەستىگىندە ( ءتورتىنشى ورىندا).

بۇل تۋرالى وبلىس اكىمى بەردىبەك ساپاربايەۆتىڭ توراعالىعىمەن وتكەن جيىندا اقتوبە وبلىسىنىڭ ەڭبەك ينسپەكسياسى باسشىسىنىڭ مىندەتىن اتقارۋشى باۋىرجان ورازايەۆ مالىمدەدى.

جيىن كەزىندە اقتوبەلىك كاسىپورىنداردىڭ وندىرىستىك پروسەستەردى تۇراقتاندىرۋ جانە جۇمىسشىلاردىڭ ەڭبەك قۇقىقتارىن قامتاماسىز ەتۋ تۋرالى مەموراندۋمداردى ورىنداۋ سۇراقتارى قارالدى. بىرنەشە جىلدان بەرى جەرگىلىكتى بيلىك وڭىردەگى ءىرى جانە ورتا كاسىپورىندارمەن وسىنداي مەموراندۋمدارعا قول قويىپ كەلەدى. ولاردىڭ ورىندالۋىن ارنايى قۇرىلعان توپ قاداعالايدى. جىل باسىنان بەرى وبلىس بويىنشا بارلىعى 4،7 مىڭ مەموراندۋمعا قول قويىلدى. سولاردىڭ اياسىندا كاسىپورىندار ءۇشىن ەڭبەكاقىنى، سونىڭ ىشىندە ءوندىرىس جۇمىسشىلارىنىڭ ەڭبەكاقىسىن كوتەرۋ ماسەلەسى ديرەكتيۆتى مىندەت بولىپ تانىلدى.

اتاپ ايتقاندا، بيىل 53 ءىرى كاسىپورىن مەن ولاردىڭ سەرۆيستىك كومپانيالارىندا ەڭبەكاقى 7% -دان 20%-عا دەيىن كوتەرىلگەن. وبلىستاعى بارلىعى 518 كاسىپورىن ەڭبەكاقىنى كوتەرۋ مىندەتىن الدى.

وبلىس اكىمى مەموراندۋمداردىڭ ورىندالۋىن جانە جۇمىسشىلار قۇقىعىنىڭ ساقتالۋىن قاتاڭ قاداعالاۋدى تاپسىردى.

— ەڭبەكاقى ازاماتتاردىڭ الەۋمەتتىك كوڭىل كۇيىنە اسەر ەتەدى. بۇل سۇراق ۇنەمى باقىلاۋدا بولۋى كەرەك. جۇمىس بەرۋشىلەر ەڭبەكاقىنى جىل سايىن ينفلياسيا دەڭگەيىندە يندەكستەۋلەرى قاجەت. ەگەر ينفلياسيا 4 پايىزدى قۇراسا، وندا جۇمىسشىلاردىڭ ەڭبەكاقىسى كەم دەگەندە 4 پايىزعا ءوسۋ كەرەك، — دەپ اتاپ ءوتتى بەردىبەك ساپاربايەۆ.

سونداي-اق، ەڭبەك قاتىناستارىن زاڭداستىرۋدىڭ جۇيەلى جۇمىستارىن جالعاستىرۋ، جۇمىسشىلاردى نەگىزسىز قىسقارتۋعا جول بەرمەۋ جانە جۇمىستان قىسقارتىلعانداردى مىندەتتى تۇردە جۇمىسقا ورنالاستىرۋ دا تاپسىرىلدى.

بۇدان باسقا، جيىن كەزىندە الەۋمەتتىك كاسىپكەرلىكتى دامىتۋدىڭ اعىمداعى جاعدايى قارالدى.

وسى تاقىرىپتى تالقىلاۋ كەزىندە وبلىس اكىمى الەۋمەتتىك كاسىپكەرلىكتى دامىتۋعا قورلار مەن حالىقارالىق ۇيىمدار بولەتىن گرانتتىق قاراجاتتاردى تارتۋ تاجىريبەسىن كەڭەيتۋ قاجەتتىگىنە باسا نازار اۋداردى.

— مۇندا جەرگىلىكتى اتقارۋشى ورگاندارعا كومەكتى «اتامەكەن» وڭىرلىك كاسىپكەرلەر پالاتاسى كورسەتۋى ءتيىس. سونداي-اق، كورشىلەس وڭىرلەرمەن كووپەراسيانى كۇشەيتۋ جانە كەڭەيتۋ كەرەك – ءبىز ءبىر بىرىمىزبەن الەۋمەتتىك كاسىپكەرلىكتى دامىتۋدىڭ وڭ تاجىريبەسىمەن الماسا الامىز. وسى باعىتتا ورىنبورمەن تابىستى جۇمىس ىستەپ كەلەمىز، تاتارستانمەن ارىپتەستىگىمىزدىڭ كەلەشەگى زور، — دەدى بەردىبەك ساپاربايەۆ.

وتكەن ءۇش ايدىڭ ىشىندە وبلىس بويىنشا ءتۇرلى الەۋمەتتىك-باعدارلانعان جوبالاردى جۇزەگە اسىرۋعا 200 ملن تەڭگەدەي گرانتتىق قاراجات اۋدارىلدى.