1 قىركۇيەكتە اتىراۋ وبلىسىنداعى مەكتەپتەرگە 118 مىڭ وقۋشى كەلدى، ونىڭ 15 مىڭنان استامى ءبىلىم وشاعىنا العاش رەت قادام باسۋشىلار.
وقۋ جىلى جارقىن جاڭالىقتارمەن جانە العاشقى قوڭىراۋ سالتاناتىمەن باستالدى. اتىراۋ وبلىسىنىڭ اكىمى نۇرلان نوعايەۆ سالتاناتتى شاراعا قاتىسىپ، تىلەگىن ارنادى.
-بارلىق ۇستازداردى، اتا-انالار مەن وقۋشىلاردى جاڭا وقۋ جىلىمەن قۇتتىقتايمىن. سونىڭ ىشىندە مەكتەپ تابالدىرىعىن العاش رەت اتتاپ وتىرعان بالالار ءۇشىن بۇگىن مەرەكە. مەكتەپتەن العان بىلىمدەرىڭىز بولاشاق ومىرلەرىڭىزگە جولداما بەرەدى. وسكەلەڭ ۇرپاقتىڭ كاسىبي، ساپالى ءبىلىم الۋىنا قاجەت جاعدايدىڭ ءبارىن جاساۋعا ءتيىسپىز. مەملەكەت باسشىسىنىڭ ساياساتى ءبىزدىڭ تاۋەلسىز ەلىمىزدىڭ نىعايۋىنا باعىتتالىپ وتىر، - دەدى نۇرلان نوعايەۆ. - ەكونوميكانى دامىتۋ، ازاماتتارىمىزدى الەۋمەتتىك جاعىنان قورعاۋ، ءومىر ءسۇرۋ دەڭگەيىن كوتەرۋ قازاقستاندىقتاردىڭ بولاشاققا دەگەن سەنىمىن ارتتىرادى.
وبلىس اكىمى جاڭا وقۋ جىلىنان باستاپ مەكتەپتەرگە «ولكەتانۋ» (تۋعان ولكە تاريحى) دەگەن جاڭا ءپان ەنگىزىلىپ وتىرعانىن ايتتى. بۇل - تاربيە مەن جاس ۇرپاقتى دامىتۋ جولىنداعى ماڭىزدى قادام. ەلباسىنىڭ "رۋحاني جاڭعىرۋ" باعدارلاماسى قوعامنىڭ بارلىق سالالارىن قامتيدى. ەڭ الدىمەن وسكەلەڭ ۇرپاقتىڭ بويىندا تۋعان جەرىنە، شىققان تەگىنە دەگەن قۇرمەتتى قالىپتاستىرادى.
- قۇرمەتتى ۇستازدار، وقۋشىلاردىڭ ءبىلىم دەڭگەيى سىزدەرگە بايلانىستى. سىزدەردىڭ قامقورلىقتارىڭىز، بىلىمدەرىڭىز شاكىرتتەرىڭىزدىڭ بيىك بەلەستەردى باعىندىرۋلارىنا جول اشادى. وتكەن وقۋ جىلىندا 71 وقۋشى ءتۇرلى ونەر، ءبىلىم جارىستارىندا جۇلدەگەر اتاندى. 20 اتىراۋلىق وقۋشى حالىقارالىق بايقاۋلاردا جۇلدەلى ورىنداردى الدى، - دەپ اتاپ ءوتتى نۇرلان نوعايەۆ. – زامان تالابىنا ساي جاڭا تەحنولوگيالاردى دامىتۋعا جانە ولاردى بالالاردىڭ مەڭگەرۋىنە كوڭىل ءبولىپ كەلەمىز. IT-سىنىپتار اشىلىپ جاتىر، وقۋ ورىندارىنىڭ 90% استامى كەڭ جولاقتى ينتەرنەت جۇيەسىنە قوسىلعان. جاڭا وقۋ جىلىنان باستاپ مەكتەپتەردە 45 روبوت تەحنيكا سىنىپتارى جۇمىس ىستەيدى. بۇل جۇمىستار جالعاسىپ جاتىر. ەگەر ءبىز تابىستى، باسەكەگە قابىلەتتى بولعىمىز كەلسە، بالالارىمىزعا قولجەتىمدى كاسىبي ءبىلىم بەرۋگە ءتيىسپىز.
1 قىركۇيەكتە وبلىس بويىنشا جاڭادان ەكى مەكتەپ، ءۇش بالاباقشا، مۋزىكالىق كوللەدجدىڭ جاتاقحانا عيماراتى پايدالانۋعا بەرىلدى. جىل سوڭىنا دەيىن ءبىلىم بەرۋ سالاسىندا تاعى دا جاڭا نىساندار اشىلادى. بۇل مەملەكەتتىڭ ءبىلىم بەرۋ سالاسىن دامىتۋ ءۇشىن قاجەت جاعدايدىڭ بارلىعىمەن قامتاماسىز ەتىپ وتىرعانىنىڭ كورىنىسى، - دەپ اتاپ ءوتتى ايماق باسشىسى. -بارلىق وقۋشىلارعا اتا-انالارىنىڭ، ۇستازدارى مەن تالىمگەرلەرىنىڭ ۇمىتتەرىن اقتاسىن دەگەن تىلەك ايتامىن. ەلدىڭ بولاشاعى - سىزدەردىڭ قولدارىڭىزدا. قازاقستاننىڭ دامۋى مەن گۇلدەنۋى- سىزدەردىڭ قولدارىڭىزدا. قۇتتى قادام بولسىن!
مەرەكەلىك شارادان كەيىن وبلىس اكىمى ءبىرىنشى سىنىپ وقۋشىلارىمەن بىرگە
«مەنىڭ وتانىم - قازاقستان» تاقىرىبىنداعى العاشقى ساباققا قاتىستى.
وقۋ جىلىنىڭ العاشقى كۇنىنەن باستاپ ءبىرىنشى سىنىپ وقۋشىلارى قازاقستان تاريحى، ەلىمىزدەگى بەلگىلى تۇلعالار جايلى تانىمدىق مالىمەتتەر الدى.
