اكسيا باستالعان كۇننەن بۇگىنگە دەيىن 10 116 بالاعا جالپى قۇنى 144 ملن.تەڭگەدەن اسا قاراجات كولەمىندە ماتەريالدىق كومەك كورسەتىلدى، دەپ حابارلايدى اتىراۋ وبلىسىنىڭ وڭىرلىك كوممۋنيكاسيالار قىزمەتى.
مەملەكەتتىك مەكەمەلەر، شاعىن جانە ورتا كاسىپ يەلەرى، جاۋاپكەرشىلىگى شەكتەۋلى سەرىكتەستەر جانە دەمەۋشىلەر كومەگىمەن بالالار وقۋعا ەڭ قاجەتتى : مەكتەپ جانە سپورتتىق كوستيۋمدەرمەن، كروسسوۆكالار، سومكەلەر جانە كەڭسە تاۋارلارىمەن قامتىلدى. ايتا كەتۋ كەرەك، اكسيا شەڭبەرىندە مەكتەپكە بارمايتىن بالالارعا، سونىمەن قاتار حالىقتىڭ الەۋمەتتىك قورعالماعان توپتارىنداعى بالالاردى مەكتەپكە دايىنداۋعا ەرەكشە كوڭىل ءبولىندى.
- بالالار تەك مەكتەپكە قاجەتتى وقۋ قۇرالدار، جىلى كيىمدەر عانا ەمەس، ازىق-تۇلىك جانە ەت ونىمدەرىمەن قامتىلدى. ءبىر وتباسىعا ءتىپتى توڭازىتقىش سىيلادى. ەسكەرە كەتسەك، «مەكتەپكە جول» اكسياسى جالعاسۋدا، كوپ بالالى، از قامتىلعان نەمەسە بەلگىلى سەبەپتەرمەن قيىن جاعدايعا تاپ بولعان ادامدار اتالعان كومەككە مۇقتاجدىعى تۋرالى ءوتىنىش جازا الادى جانە مىندەتتى تۇردە قولداۋ كورسەتىلەدى،- دەيدى وبلىستىق ءبىلىم باسقارماسى. 
ايتا كەتەيىك، ءىرى كولەمدەگى «مەكتەپكە جول» اكسياسى اعىمداعى جىلدىڭ 1 تامىزىنان 30 قىركۇيەگىنە دەيىن جالعاسادى. اكسياعا قاتىسام دەۋشىلەر اۋداندىق جانە قالالىق ءبىلىم بولىمىنە كەلۋىنە بولادى، بولىمدەردە از قامتىلعان وتباسىلار ءتىزىمى مەن بايلانىس نومىرلەرى بار.