قازاقستاننىڭ جالپىۇلتتىق دەڭگەيدەگى قاسيەتتى ورىندارى مەن كەشەندەرىنىڭ تولىق تىزىمىنە كىرگەن نىساندار، ياعني، رەسپۋبليكالىق مانگە يە 23 تاريحي جانە مادەني ەسكەرتكىشتەرگە عىلىمي-قالپىنا كەلتىرۋ جۇمىستارى وتكىزىلدى. اتاپ ايتقاندا، شاقپاق اتا، قارامان اتا قورىمدارى، قوجا احمەت ياسساۋي، ارىستان باب كەسەنەلەرى، اقىرتاس، اپپاق يشان كۇمبەزدەرى، ەسكى تۇركىستان، ساۋران، سىعاناق، ەسكى تاراز، تالعار قالاشىقتارى جوندەلدى. الداعى ۋاقىتتا مەملەكەتتىك تاريحي-مادەني قورىق-مۇراجايلارىنىڭ «ۇلىتاۋ»، «وتىرار» جانە «تاڭبالى» اتتى ءۇش بىردەي قابىلداۋ ورتالىقتارىنىڭ قۇرىلىسى جۇرەدى دەپ كۇتىلۋدە.

قازاقستاننان شىققان تانىمال تاريحي تۇلعالارمەن بايلانىستى شەتەلدەگى قاسيەتتى جەرلەردى زەرتتەۋ جانە تانۋ جۇمىستارى باستالادى. اتاپ ايتقاندا، اتالمىش جوسپاردىڭ باستى باعدارى رەسەي جانە وزبەكستان ەلدەرىنە نەگىزدەلەدى.

بۇگىنگى تاڭدا «قازاقستاننىڭ قاسيەتتى گەوگرافياسى» ارنايى جوباسىن جۇزەگە اسىرۋ اياسىندا ەلىمىزدىڭ بارلىق وڭىرلەرىندە ءبىرقاتار جۇمىستار جاسالۋدا. ماسەلەن، ءبىر عانا اتىراۋ وبلىسىندا ۇزىندىعى 33 شاقىرىم بولاتىن  «اقمەشىت» كەشەنىنە قۇلسارى قالاسىنان جول قۇرىلىسى بويىنشا جوبالىق-سمەتالىق قۇجاتتاما دايىندالدى جانە ساراپتاماعا ۇسىنىلدى. بۇگىندە كورسەتىلگەن نىسانعا دەيىن ەلەكتر جەلىسى جانە قابىلداۋ ورتالىعى سالىندى.

قازىرگى تاڭدا «جالپىۇلتتىق جانە وڭىرلىك قاسيەتتى جەرلەر بويىنشا نىسانداردىڭ ءارقايسىسىنىڭ تولىق سيپاتتاماسى مەن 3D تۋرلارى كورسەتىلگەن ينتەراكتيۆتى، ۆيرتۋالدى كارتالار جۇمىس ىستەپ تۇر. قازاقستاننىڭ قاسيەتتى نىساندارى تۋرالى الەۋمەتتىك جەلىلەرگە ارنالعان ۇيالى فورماتتاعى وتىز بەينەروليك، ق ر ۇلتتىق مۇراجايىندا «رۋحاني جاڭعىرۋ» زالى اشىلدى.

«تۋعان جەر» باعدارلاماسى اياسىندا جاس بۋىننىڭ تانىمدىق كوزقاراسىن كەڭەيتۋ، ەلىمىزدەگى تاريحي ماڭىزى زور ورىندارمەن تانىستىرۋ، وتانعا دەگەن سۇيىسپەنشىلىك سەزىمىن ارتتىرۋ ماقساتىندا مەكتەپ وقۋشىلارىنىڭ قازاقستاننىڭ قاسيەتتى ورىندارىنا ساياحاتىن ۇيىمداستىرۋ جونىندەگى رەسپۋبليكالىق اكسيا باستاۋ الدى. ارنايى بەلگىلەنگەن گرافيككە سايكەس، قازاقستاننىڭ ءار اۋماعىنان 70 وقۋشى رەسپۋبليكامىز بويىنشا ولكەتانۋ تۋرلارىنا شىقتى. اتالمىش تۋرلارعا از قامتىلعان وتباسى بالالارى، مۇمكىندىگى شەكتەۋلى بالالار، وقۋ وزاتتارى، جارىستار مەن بايگەلەردىڭ جۇلدەگەرلەرى قاتىسۋ مۇمكىندىگىنە يە بولدى.

ەلىمىزدىڭ تاريحي جانە رۋحاني ومىرىنەن سىر شەرتۋ، ءارى تۋريزم سالاسىن دامىتۋ ماقساتىندا BBC World News تەلەارناسىنىڭ قاتىسۋىمەن «قازاقستاننىڭ قاسيەتتى جەرلەرىنىڭ گەوگرافياسى»، «التىن باتىر»، «قوجا احمەت ياسساۋي جانە ايشا ءبيبى كەسەنەلەرى» فيلمدەر جيناعى جارىق كوردى. سونداي-اق،  «كۇلتەگىن. جاڭا كوزقاراس» اتتى دەرەكتى تاريحي فيلم، تانىمال اكتەر مارك داكاسكوستىڭ قاتىسۋىمەن «نومادتار جەرى» ءفيلمى جارىققا شىقتى.