«QAZSPORT» تەلەارناسى   2018 جىلدىڭ 7 قازانىندا لاس-ۆەگاستا (اقش) UFC 229 ءتۋرنيرى اياسىندا رەسەيلىك حابيب نۇرماعامەدوۆ پەن يرلانديالىق كونور ماكگرەگور اراسىندا وتەتىن جەكپە-جەكتى تىكەلەي ەفيردە كورسەتەدى. ترانسلياسيا استانا ۋاقىتىمەن 07:50-دە باستالادى.

         جەڭىل سالماقتاعى UFC چەمپيونى حابيب نۇرماعامەدوۆ ارالاس جەكپە-جەكتە 26 كەزدەسۋ وتكىزىپ، بارلىعىندا جەڭىسكە جەتكەن. ونىڭ سەگىزىن نوكاۋتپەن اياقتاعان. سوڭعى جەكپە-جەگىن 2018 جىلدىڭ 7 ساۋىرىندە ەل ياكۆينتاعا قارسى وتكىزىپ، امەريكالىق قارسىلاسىن تورەشىلەردىڭ شەشىمى بويىنشا جەڭگەن بولاتىن. ءسويتىپ، جەڭىل سالماقتاعى UFC چەمپيونى اتاندى. 

         يرلانديالىق كونور ماكگرەگور 2015-2018 جىلدار ارالىعىندا قارسىلاس شاق كەلتىرمەي، جەڭىل سالماقتاعى UFC چەمپيونى بولىپ كەلدى. وتىز جاستاعى سپورتشى 24 جەكپە-جەك وتكىزىپ، 21-دە جەڭىسكە جەتكەن، 18ء-ىن نوكاۋتپەن اياقتاعان. ءۇش جەڭىلىستىڭ ەكەۋىنە كونور وكتاگونعا جاڭا عانا شىعىپ جۇرگەن كەزىندە ۇشىرىعان. ءۇشىنشى رەت 2016 جىلدىڭ 5 ناۋرىزىندا امەريكالىق نەيت دياستپەن وتكەن كەزدەسۋدە جەڭىلگەن بولاتىن. ءبىراق، اراعا بىرنەشە اي سالىپ، ماكگرەگور دياسپەن قايتا جۇزدەسىپ، ەسەسىن قايتاردى. UFC اياسىنداعى سوڭعى جەكپە-جەگىن كونور 2016 جىلدىڭ 12 قاراشاسىندا وتكىزىپ، امەريكالىق ەددي الۆارەستى تەحنيكالىق نوكاۋتپەن جەڭدى. وتكەن جىلى ماكگرەگور كاسىپقوي بوكستىڭ ەرەجەسى بويىنشا امەريكالىق فلويد مەيۆەزەرمەن قولعاپ ءتۇيىستىردى. كەزدەسۋ ونىنشى راۋندتا توقتاتىلىپ، تورەشىلەر تەحنيكالىق نوكاۋتپەن مەيۆەزەر جەڭىسكە جەتتى دەگەن شەشىم قابىلدادى.

        ەستەرىڭىزگە سالا كەتسەك، «قازاقستان» تەلەراديوكورپوراسياسى UFC اياسىنداعى جەكپە-جەكتەردى قازاقستان اۋماعىندا ءبىر جارىم جىل بويى كورسەتۋ قۇقىعىنا يە بولدى. 2018 جىلدىڭ قىركۇيەك پەن جەلتوقسان ايلارى ارالىعىندا «QAZAQSTAN» جانە «QAZSPORT» تەلەارنالارىندا UFCء-دىڭ 14 جەكپە-جەك كەشى ەفيرگە شىعادى. ال، 2019 جىلدان باستاپ 40-تان استام ءتۋرنيردىڭ كورسەتىلىمى جوسپارلانعان.

         حابيب نۇرماعامەدوۆ پەن كونور ماكگرەگور اراسىنداعى جەكپە-جەكتى 7 قازان كۇنى 07:50-دە «QAZSPORT» تەلەارناسىنان جانە «QAZAQSTAN TV» ءموبيلدى قوسىمشاسى ارقىلى دا كورە الاسىزدار!