فارزانا شارشەمبايەۆانىڭ ەسىمى الەمگە ايگىلى. دەسە دە تۋعان جەرى قىرعىزستاندا فارزانانى ونىڭ پالتوسى بەلگىلى امەريكالىق سانگەر دوننا كاراننىڭ توپتاماسىندا پايدا بولعاندا عانا ءبىلدى. بۇل فارزانانىڭ الەمدىك ديزاينەرلەر ءۇشىن جاساعان العاشقى جۇمىسى ەمەس. ونىڭ ءونىمىن ەۋروپا، اقش-تىڭ الەمگە تانىمال ءسان الەمىنىڭ پاتشايىمدارى مەن ساياسي كوشباسشىلارى كيەدى، دەپ جازادى Qamshy.kz اقپارات اگەنتتىگى. 

فارزانا شارشەمبييەۆا 24.kg-گە ءوز ونىمدەرى جانە پالتوسى تانىمال سانگەردىڭ سىرت كيىم توپتاماسىنا قالاي تۇسكەنىن ايتىپ بەردى.

— امەريكالىق سانگەرمەن قالاي تانىستىڭىز؟ ءسىزدىڭ جۇمىسىڭىز ونى نەسىمەن قىزىقتىردى؟

— بىلتىر سانتا-فە (نيۋ-مەكسيكو شتاتى) قالاسىندا وتكەن فەستيۆالدە Donna Karan، DKNY جانە Urban Zen برەندتەرىنىڭ نەگىزىن قالاۋشىسى ءبىزدىڭ ونىمدەردى كورىپ ۇناتىپ قالدى. جىبەك ماتامىزدىڭ ساپاسىن جوعارى باعالادى. مۇنداي ماتا مەن ديزايندى بۇرىن-سوڭدى كەزدەستىرمەگەنىن ايتادى. ول تەك ماقتاپ قانا قويماي، بارلىعىن ساتىپ الدى. «ونىڭ ەسكيزى بويىنشا تىگە الامىن با؟» دەپ سۇرادى. وسىلايشا مەن العاشقى تاپسىرىسىمدى الدىم. ول ءبىزدىڭ ۇلتتىق بوياۋىمىز ءبىلىنىپ تۇراتىن توپتامانى جاساۋدى شەشتى.

— وتە قىمبات باعادا ساتىلىمعا شىققان پالتو تۋرالى ايتىپ بەرىڭىزشى...

— بۇل پالتو دوننا كاراننىڭ العاشقى تاپسىرىسى بولدى. مەن ونى باسىنان اياعىنا دەيىن ءوز ءادىسىم بويىنشا قولمەن تىگىپ شىقتىم. وندا تىگىستەرى ەكى جاعىندا عانا بار. ماتاسى – جىبەك پەن توقىما. ونى تىگۋگە ءتورت كۇن كەتتى.

— دوننا كاران توپتاماڭىزداعى بۇيىمداردى قالاي تاڭدايدى؟ الدە سىزگە سىزباسىن بەرە مە؟

— ءيا، ول سىزباسىن بەرىپ، ءتۇسى قانداي بولۋ كەرەكتىگىن ايتادى. ال ماتا، تەحنولوگيا مەن ورنەك ءبىزدىڭ قالاۋىمىز بويىنشا تىگىلەدى. دوننا تاعى ءبىر پالتوعا تاپسىرىس بەردى.

فارزانا شارشەمبييەۆانىڭ اپكە-سىڭلىلەرىمەن قوسىلىپ 7sisters برەندىن قۇردى. ولار جۇمىسىن 1998 جىلى باستاپ، ءقازىر ءوز ءىسىنىڭ بىلگىرلەرىنە اينالدى. اپكەلى-سىڭلىلەر ءتۇرلى بۇيىمدار جاسايدى، كيىم تىگەدى، جىبەك پەن كيىزدەن ينتەرەر بۇيىمدارىن جاسايدى.

— ءبىز ونەرلى وتباسىندا دۇنيەگە كەلدىك. اكەمىز  جىلكىچى شارشەمبييەۆ سۋرەتشى. انامىز جەنيسجان ەشەيەۆا ۋچيليششەدە تىگىن تىگۋدى ۇيرەتەتىن. ولاردىڭ مەملەكەتتىك تاپسىرىس جاساۋدان قولدارى بوسامايتىن. تاپسىرىستى وتكىزەتىن ۋاقىت تاياعاندا وتباسىمىزبەن ۇيىقتاماي، اتا-انامىزعا كومەكتەستىك. سوندىقتان ۇجىمدا اۋىزبىرشىلىكپەن جۇمىس جاساۋ بالا كەزىمىزدەن قالىپتاسقان. ول قاسيەت ەسەيىپ، بىرىگىپ جۇمىس اتقارىپ جاتقان شاعىمىزدى كوپ كومەگىن تيگىزىپ جاتىر.

مەن جانە كادىركۋل پاننو، الا-كيييز بەن ءشالى تىگە باستادىق. مۇنىمەن اينالىسۋ سىڭلىلەرىمىزگە دە ۇنادى. وسىلايشا ءوز وتباسىلىق كاسىبىمىزدى اشامىز دەپ شەشتىك.

— امەريكالىقتار قىرعىزداردىڭ ۇلتتىق بوياۋىن ۇناتىپ قالعان سياقتى عوي...

— ونىمدەرىمىز امەريكالىقتاردىڭ اراسىندا سۇرانىسقا يە بولعاندىقتان باستاپقىدا-اق امەريكالىق نارىقتا جۇمىس ىستەيمىز دەپ شەشتىك. بەلگىلى ديزاينەرلەردىڭ ارقاسىندا ءبىز تۋعان جەرىمىزدەن گورى شەتەلدە كوبىرەك تانىلدىق.

ونىمدەرىمىزدىڭ جارناماسى الەمدىك دەڭگەيدەگى فەستيۆالدەرگە قاتىسۋعا مۇمكىندىك بەرەدى. 2011 جىلدان باستاپ سانتا-فە قالاسىندا وتەتىن ءداستۇرلى الەمدىك فەستيۆالدىڭ تۇراقتى قاتىسۋشىسىمىز. بيىل ءبىزدىڭ ستەندىمىز الەم بويىنشا ۇسىنىلعان 150 ستەندتىڭ ىشىندە ۇزدىك بەستىككە كىردى.

ءبىز انگليا، گەرمانيا، يتاليا، باە، ءۇندىستاندا وتكەن جارمەڭكەگە قاتىستىق. يتاليا، فرانسيا مەن رەسەيدىڭ ءسان ۇيلەرىنەن ۇسىنىستار ءتۇسىپ جاتىر.  

اپالى-سىڭلىلەر يۋنەسكو-نىڭ «ساپا بەلگىسى» 29 حالىقارالىق سەرتيفيكاتىن العان. قۇجات ەكى جىلدا ءبىر مارتە كونكۋرستىق نەگىزدە بەرىلەدى. ساپا مەن ديزاينىن حالىقارالىق ساراپشىلار باعالايدى.  

مۇنداي سەرتيفيكاتى بارلار ەڭ بەدەلدى جارمەڭكەلەرگە قاتىسىپ، ءوز ونىمدەرىڭىزدى الەم بويىنشا ساتۋعا جولداما الادى. سەرتيفيكات سەرىكتەستەر مەن ساتىپ الۋشىلار ءۇشىن شەبەرلىك پەن ساپانى بىلدىرەدى.

— ءبىز 2012 جىلى نيۋ-مەكسيكودا (وحو كالەنتە شتاتى) 100 ادامعا ماستەر-كلاسس وتكىزدىك. الەمنىڭ تۇكپىر-تۇكپىرىنەن كەلگەن ستۋدەنتتەر ءالى كۇنگە دەيىن بىزگە قىرعىزدىڭ ورنەكتەرى بار بۇيىمداردىڭ فوتوسىن جىبەرەدى. ءبىز وعان قاتتى قۋانامىز.

— ءسىز امەريكالىق ديزاينەر شارلوتتا موسسپەن دە جۇمىس ىستەدىڭىز بە؟

— ءيا، بىلتىر شارلوتتا موسستىڭ تاپسىرىسىن ورىندادىق. ءبىزدىڭ بارلىق كيىمىمىز ونىڭ توپتاماسىنا كىردى. ونىڭ بىلتىرعى نيۋ-يوركتە وتكەن توپتاما تانىستىرىلىمىندا كورسەتىلگەن كيىمدەردىڭ بارلىعى ءبىزدىڭ ونىمنەن تۇردى. امەريكالىق Ibu Movement، Gypsy-global، HoonArts برەندتەرىمەن دە جۇمىس ىستەيمىز.

ءبىزدىڭ كيىمدى سيگۋرني ۋيۆەر، بەاتريكس وست سەكىلدى ءسان الەمىنىڭ پاتشايىمدارىنىڭ كيگەنىن كورىپ قۋاندىق. كانن فەستيۆالىندە گران-پري يەگەرى سامال ەسلياموۆا ءبىزدىڭ كيىمدە كەلدى.

— الەمگە تانىمال ادامدار سىزدەردىڭ كيىمدەرىڭىزدى قايدان ساتىپ الادى؟

— كوبى فەستيۆالدەردە. اسىرەسە سانتا-فە-دە. كەيبىرى تاپسىرىس بەرۋشىلەرىمىزدىڭ دۇكەنىنەن ساتىپ الادى. كيىمدەرىمىز مۇنداي دۇكەندەردە  7sisters برەندىمەن ساتىلادى.