اقتوبەدە قىلمىستىق ىستەر جونىندەگى سوت القاسى «4 اعايىندى» قىلمىستىق توبىنىڭ جەتەكشىسىنە تاعايىندالعان جازانى وزگەرتتى، دەپ حابارلايدى «حابار 24».

9 ايعا سوزىلىپ، 257 توم بولعان ءىس بويىنشا 26 ادام قىلمىستىق جاۋاپقا تارتىلىپ، ولاردىڭ 24ء-ى سوتتالىپ، ەكەۋى سوت زالىنان بوساتىلعان ەدى. جازا كەسىلگەندەرگە قىلمىستىق كودەكستىڭ بىرنەشە بابى بويىنشا، ياعني مۇنايدى زاڭسىز تاسىمالدادى، ساتتى جانە ساقتادى دەگەن ايىپ تاعىلدى.

2 تامىز كۇنى قىلمىستىق توپ مۇشەلەرى 3 جىلدان 12 جىلعا دەيىنگى مەرزىمگە سوتتالعان بولاتىن. ال ءىزباساروۆقا اۋىر قىلمىس جاسادى دەگەن ايىپ تاعىلىپ، ول 12 جىلعا باس بوستاندىعىنان ايىرىلعان ەدى. بۇل ۇكىممەن كەلىسپەگەن سوتتالۋشى ءوزىنىڭ زاڭدى قۇقىعىن پايدالانىپ، اپپەلياسيالىق سوتقا شاعىم تۇسىرگەن بولاتىن.

ءىزباساروۆتان بولەك تاعى بىرنەشە ادام سوت ۇكىمىمەن كەلىسپەي، قىلمىستىق ىستەر جونىندەگى سوت القاسىنا اپپەلياسيالىق شاعىم جازعان ەدى. ال مەملەكەتتىك ايىپتاۋشى جاق ءىزباساروۆ پەن تاعى بىرنەشە سىبايلاسىنا كەسىلگەن جازانىڭ مەرزىمىن ۇزارتۋدى سۇراعان. قىلمىستىق ىستەر جونىندەگى سوت القاسىنىڭ شەشىمىمەن ەركىن ءىزباساروۆقا تاعى 4 جىل مەرزىم قوسىلىپ، 16 جىل جازا كەسىلدى. تاعى بىرنەشە ادامعا كەسىلگەن ۇكىم وزگەرتىلىپ، مەرزىمدەرى ۇزارتىلدى. ياعني، پروكۋرورلاردىڭ جازانى قاتاڭداتۋ تۋرالى شاعىمى قاناعاتتاندىرىلدى. ال 14 ادامنىڭ ۇكىمى وزگەرىسسىز قالدىرىلدى. 1 سوتتالۋشىنىڭ جازاسى جەڭىلدەتىلدى.

قايىربەك ەلەمەسوۆ، وبلىستىق سوتتىڭ قىلمىستىق ىستەر جونىندەگى سوت القاسىنىڭ ءتوراعاسى:

- ءىزباساروۆ ەركىن جۇماشۇلىنا 16 جىل باس بوستاندىعىنان ايىرۋ جانە مەنشىگىندەگى قىلمىستىق جولمەن تابىلعان مۇلىگىن تاركىلەۋ تۋرالى جازا تاعايىندالسىن. قىلمىستىق-اتقارۋ جۇيەسىنىڭ قاۋىپسىزدىگى بارىنشا جوعارى مەكەمەسىندە وتەسىن. ءىزباساروۆتىڭ ارەكەتى ق ر قىلمىستىق كودەكسىنىڭ 14-بابى 2-بولىگى بويىنشا «ءقاۋىپتى رەسيديۆ قىلمىس» دەپ تانىلسىن.

ەستەرىڭىزگە سالا كەتەيىك، 2016 جىلدىڭ جەلتوقسان ايىندا ۇلتتىق قاۋىپسىزدىك كوميتەتىنىڭ سىبايلاس جەمقورلىققا قارسى ءىس-قيمىل ۇلتتىق بيۋروسى مەن اقتوبە وبلىستىق ءىىد ارنايى وپەراسيا وتكىزىپ، ءىرى قىلمىستىق توپتىڭ جولىن كەسكەن بولاتىن. جەدەل شارا كەزىندە «مۇنايدى زاڭسىز تاسىمالدادى، ساتتى جانە ساقتادى» دەگەن ايىپپەن كۇدىكتىلەر ۇستالىپ، مۇناي ونىمدەرى قۇيىلعان اۆتوسيستەرنالار تاركىلەنگەن ەدى. سوتتالۋشىلار ەندى جوعارعى سوتقا اپپەلياسيالىق شاعىم تۇسىرە الادى.

اۆتورلارى: اقساۋلە بايمەنشينا، بولات مولداعالييەۆ