قازاقستاندا تۇڭعىش رەت حالال يپوتەكا بەرىلەدى. «Al Hilal» يسلام بانكى» اق يسلام يپوتەكاسىن ىسكە قوستى.
يسلام قارجى پرينسيپتەرىمەن قۇرىلعان جاڭا ءونىمدى الماتى، استانا جانە شىمكەنت قالالارىنىڭ تۇرعىندارى باسپانا الۋ ءۇشىن بۇرىن العان يپوتەكانى قايتا قارجىلاندىرۋ ءۇشىن قازىردەن باستاپ الۋىنا بولادى.
سونىمەن قاتار، يپوتەكانى ءدىني سەنىمىنە قاراماي، كەز كەلگەن ادام الا الادى.
بانكتىڭ حابارلاۋىنشا، يسلام يپوتەكاسىنىڭ باستى قۇرالى مۋراباحا ءداستۇرلى پايىزدىق مولشەرلەمەنىڭ جوقتىعىمەن ەرەكشەلەنەدى، سەبەبى شاريعاتتا بۇعان تىيىم سالىنعان. يپوتەكا قۇرىلىمى مىناداي: بانك تۇرعىن ءۇي ساتىپ الادى دا، ونى كليەنتكە ۇستەمە باعامەن ءبولىپ تولەۋگە بەرەدى، ۇستەمە باعانى كليەنت الدىن الا بىلەدى جانە قارجىلاندىرۋ بارىسىندا ول تۇراقتى بولادى. مۇنىڭ نەگىزى اشىقتىق جانە پايدا: كليەنت تۇرعىن ءۇيدىڭ اقىرعى باعاسىن ناقتى بىلەدى.
بۇل ءونىمنىڭ تاعى ءبىر ەرەكشەلىگى – قولايلى تولەم جاساۋ ءتاسىلى. كليەنتتەردىڭ باسىم كوپشىلىگى ءداستۇرلى بانكتىڭ اقشالاي تولەمىن (اننۋيتەت) وڭتايلى سانايدى، ءبىراق ونى تاڭداعان كەزدە يپوتەكانىڭ اقىرعى قۇنى يپوتەكانىڭ مەرزىمىنە قاراي ايتارلىقتاي ۇلعايىپ كەتەدى. Al Hilal بانكىنىڭ يسلام يپوتەكاسى بويىنشا تولەم جاساۋ سحەماسى قارجىلاندىرۋ مەرزىمى بارىسىندا تەڭ تولەم جاساۋدى قاراستىرادى، بۇل اننۋيتەتكە ۇقسايدى، ءبىراق ءداستۇرلى بانكتەرگە ءتان ارتىق تولەم بولمايدى.
«قازاقستانداعى يسلام بانكينگىن دامىتۋدا يسلام يپوتەكاسىن ىسكە قوسۋ ماڭىزدى قادام. بۇل جەكە تۇلعالاردى قارجىلاندىرۋ باعدارلاماسىنىڭ العاشقى ءونىمى. كليەنتتەر ءبىزدىڭ ءونىمىمىزدىڭ ارتىقشىلىقتارىن، ەرەكشە جانە ءتيىمدى شارتتارىن باعالايدى دەپ ۇمىتتەنەمىز»،-دەدى «Al Hilal» يسلام بانكى» اق باسقارما ءتوراعاسىنىڭ ورىنباسارى ەلتاي مۇحامەدجانوۆ.
نەگىزگى شارتتار:
- قولجەتىمدى قالالار: الماتى، استانا جانە شىمكەنت (پايدالانۋعا بەرىلگەن ۇيلەر)؛
- العاشقى جارنا: 30%-دان باستاپ؛
- قارجىلاندىرۋ مەرزىمى: 3 جىلدان 15 جىلعا دەيىن؛
- قارجىلاندىرۋ سوماسى: 3 ملن تەڭگەدەن 100 ملن تەڭگەگە دەيىن؛
- ەڭ تومەنگى راستالعان ەڭبەكاقى: 200 000 تەڭگە؛
- جاسى: 23 جاستان جوعارى (قارجىلاندىرۋ مەرزىمى اياقتالعان ساتتە زەينەتكەرلىك جاستان ۇلكەن بولماۋى كەرەك)؛
- ءوتىنىشتى قاراۋ كوميسسياسى – 0 تەڭگە؛
- كەلىسىمدى راسىمدەۋ كوميسسياسى – قارجىلاندىرۋ سوماسىنىڭ 0،5%-ى (ەڭ تومەنگى 150 000 تەڭگە، ءبىراق 300 000 تەڭگەدەن اسپاۋى قاجەت). قايتا قارجىلاندىرۋ كەزىندە كوميسسيا ۇستالمايدى.
