وتاندىق وندىرىستەگى كوپىرشىكتەلگەن كاۋچۋك، سونداي-اق اليۋمينيي مەن مىس جاقىن ارادا قازاقستاننان گرۋزيا نارىعىنا جەتكىزىلۋى مۇمكىن. بۇعان تبيليسيدە وتكەن ساۋدا-ەكونوميكالىق ميسسيا بارىسىندا گرۋزيندىك تاراپ قىزىعۋشىلىق تانىتقان بولاتىن.

قىركۇيەك ايىنىڭ سوڭىندا قازاقستان – گرۋزيا بيزنەس-فورۋمى ءوتىپ، ونى گرۋزيا رەسپۋبليكاسىنداعى ق ر ەلشىلىگىنىڭ كومەكتەسۋىمەن گرۋزيا ساۋدا-ونەركاسىپ پالاتاسىمەن بىرلەسىپ قازاقستاننىڭ سىرتقى ساۋدا پالاتاسى ۇيىمداستىردى، دەپ حابارلايدى سسپ باسپا ءسوز قىزمەتى.

بيزنەس-فورۋم تاۋ-كەن، قۇرىلىس جانە ماشينا جاساۋ سالالارىنىڭ ءىرى قازاقستاندىق كاسىپورىندارىمەن جانە الەۋەتتى گرۋزيندىك ساتىپ الۋشىلارمەن تىكەلەي بايلانىس ورناتقان نەگىزگى ديالوگ الاڭى بولدى. ونىڭ قورىتىندىسى بويىنشا ەكى ەلدىڭ ساۋدا پالاتالارى اراسىنداعى ىنتىماقتاستىق تۋرالى مەموراندۋمعا قول قويىلدى. 

قازىرگى ۋاكىتتا قازاقستاندىق «IT&M» كومپانياسىنىڭ گرۋزياعا كوپىرشىكتەلگەن كاۋچۋك جەتكىزۋى تۋرالى كەلىسسوزدەر جۇرگىزىلۋدە. سونداي-اق كوشپەلى كەزدەسۋلەردىڭ اياسىندا «DIO» كومپانياسى قازاقستانداعى زاماناۋي از شىعىندى تاۋ-كەن ءوندىرىسىن دامىتۋعا باعىتتالعان «KazMinerals» كومپانياسىنان اليۋمينيي مەن مىس ساتىپ الۋعا قىزىعۋشىلىق ءبىلدىردى.

قازىرگى تاڭدا قازاقستان گرۋزياعا مۇناي ونىمدەرىن، ازوتتى تىڭايتقىشتار،  ماكارون ونىمدەرىن،  تەمىر پروكاتتارىن، تەمەكى،  توڭازىتىلعان بالىق،  دارى-دارمەكتى ەكسپورتتاۋدا. گرۋزيادان ءبىز شاراپ، الكوگولسىز سۋسىندار مەن مينەرالدى سۋلار، مەتالل قۇبىرلار، ۆاكسينالار، ءسۇت يمپورتتاپ وتىرمىز.

2018 جىلدىڭ قاڭتارى مەن شىلدەسى ارالىعىندا ەلدەر اراسىنداعى سىرتقى ساۋدا اينالىمى 2017 جىلعى وسىنداي كەزەڭمەن سالىستىرعاندا 67%-عا ۇلعايىپ،   77 ملن اقش دوللارىن قۇرادى.