نۇرسۇلتان نازاربايەۆ مەملەكەتتىك قىزمەتشىلەردىڭ جۇمىس ءتارتىبىن ءسوز ەتتى. ايتۋىنشا، شەنەۋنىكتەردىڭ كۇنى تەك وتىرۋمەن وتەدى.
«سوڭعى كۇندەرى پارلامەنتتە ۇزاق وتىرىستار مەن جينالىستار جيىلەپ كەتتى. ءبىر جىلدىڭ 100 تاۋلىگىندە جينالىس وتەدى. جۇمىس ىستەۋ مۇمكىن ەمەس. مەن جارلىققا قول قويدىم عوي – ۇكىمەتكە سەيسەنبىدە عانا بارۋ كەرەك. ءبىراق بارمايسىڭدار. تاڭنان بەرى – وتىرىستار، تۇستەن كەيىن – كەزدەسۋلەر. دۇيسەنبى مەن قابىلدايمىن. بەيسەنبى – پارلامەنتتەگى ەسەپتەر. كەلىسىپ الايىق. نە مينيسترلەر، نە اكىمدەر نەمەسە ولاردىڭ ورىنباسارلارى اقوردادا جۇرەدى»، - دەدى پرەزيدەنت.
ونىڭ ۇستىنە، جينالىستاردى تەك جارتى ساعاتقا لايىقتاۋعا بولاتىنىن ەسكەرتتى.
«مەملەكەتتىك جۇمىستا تاجىريبەم مول، جينالىستاردى جارتى ساعاتتا وتكىزۋگە بولادى. قيىن ماسەلەلەردى عانا ءبىر ساعاتقا سوزۋ كەرەك. مەملەكەتتىك قىزمەتشى زاڭ بويىنشا ون ەكى ساعاتقا دەيىن وتىرماي جەتى ساعات قانا جۇمىس ىستەۋ كەرەك. ءبىر كۇندە جەتى رەت جينالىس وتكىزەسىڭدەر. باقىتجان، (ساعىنتايەۆ – پرەمەر-مينيستر) ايتشى، سەن سوندا قاشان جۇمىس ىستەيسىڭ؟ سول ءۇشىن دە ەلدە نە بولىپ جاتقانىن باقىلاي الماي وتىرسىڭدار ما؟ مەن ورناتقان ءتارتىپتى جۇزەگە اسىرىڭدار! ادامدارعا جۇمىس ىستەتىڭدەر»، - دەپ اشۋلاندى ەلباسى.
ايتا كەتەيىك، ەلباسى 5 قازاندا اقوردا رەزيدەنسياسىندا حالىققا جولداۋىن جاريالادى. جولداۋىن جاريالاماس بۇرىن قازاقستاننىڭ بۇگىنگى كۇنگە دەيىنگى جەتىستىكتەرىن ءتىزىپ، الداعى جوسپارلاردى اتادى.
ەلباسى جولداۋىن ۇلتتىق تەلەارنالار مەن اقوردانىڭ فەيسبۋكتەگى رەسمي پاراقشاسى تىكەلەي ەفيردە كورسەتتى.
