وزبەكستاننىڭ قاشقاداريا وبلىسى كاسان اۋدانى اكىمى باحتيار رادجابوۆ جەرگىلىكتى كاسىپكەر فازيلات نورمۋرادوۆانى پرەزيدەنتتىڭ كوشپەلى قابىلداۋىنا شاعىمدانعانى ءۇشىن حالىق الدىندا سوققىعا جىققان. كاسىپكەردىڭ سوزىنشە، باستاپقىدا رادجابوۆ ونى بالاعاتتاعان، كەيىن قىلقىندىرىپ، اياعىمەن تەپكەن دەپ جازادى Qamshy.kz اقپارات اگەنتتىگى centralasian.org سايتىنىڭ دەرەگىن نەگىزگە الىپ.
قاسان اۋدانى بازارىندا ساۋدا جاسايتىن 49 جاستاعى فازيلات نورمۋرادوۆا 11 قىركۇيەكتە اۋدان باسشىسى باحتيار رادجابوۆ ءوزىن سوققىعا جىقتى دەيدى. سول كۇنى اۋدانعا پرەزيدەنت اكىمشىلىگىنىڭ وكىلدەرى بارعان. سولاردىڭ الدىندا كاسىپكەر جەر ۋچاسكەسىنە قاتىستى شاعىم ايتقان.
"مەن حالىقتىق قابىلداۋعا كەلگەن كەزدە، اۋدان باسشىسى باحتيار رادجابوۆ ءوزىنىڭ جۇمىس بولمەسىندە وتىرعان. كىرە بەرىستە مەن ونى كورىپ قالدىم دا، "مەنىڭ شارۋام شەشىلىپ جاتىر ما، اكىمشىلىك وكىلدەرى كەلدى ما؟" دەپ سۇرادىم. ول ماعان "سەن ارىزقويسىڭ، پرەزيدەنت پورتالىنا ۇنەمى حات جازاسىڭ" دەدى. مەن پورتالدىڭ پرەزيدەنت باستاماسىمەن قۇرىلعانىن ايتتىم"، – دەيدى فازيلات نورمۋرادوۆا.
ونىڭ ايتۋىنشا، كەيىن اڭگىمە دالادا جالعاسقان. ول ماسەلەسىن تاعى سۇراعان. اكىم ونى بالاعاتتاي باستاعان. "مەن دە ونىڭ بالاعاتىنا جاۋاپ بەردىم. ول سول كەزدە ماعان جۇگىرىپ كەلىپ، موينىمنان قىلقىندىرا باستادى. ءبىر قولىمەن تۇنشىقتىرىپ، ءبىر قولىمەن ۇردى. سىرت جاقتان ادامدار كەلىپ، اجىراتىپ الدى. سوسىن ول اياعىمەن مەنى تەپتى. مەن ارقاممەن بەتونعا قۇلاپ ءتۇستىم"،- دەدى فازيلات نورمۋرادوۆا.
ايەل كەيىن كوزىن اۋرۋحانادا اشقانىن، ميى قاتتى شايقالعانىن ايتادى.
كاسان اۋدانى اكىمى باحتيار رادجابوۆ تەلەفون ارقىلى سۇقباتتا كاسىپكەر ايەلدى ۇرعانىن جوققا شىعاردى. "بۇل اڭگىمە قايدان شىقتى؟ مەن ايەلدى ۇرىپپىن با؟ مەنىڭ ودان باسقا ءىسىم جوق پا ەكەن؟ ءبىز جاعداي جاقسارۋ ءۇشىن، كۇنى-تۇنى جۇمىس ىستەپ جاتىرمىز. مەن مازالاماڭدار"، - دەپ مالىمدەدى شەنەۋنىك.
وزبەكستان باس پروكۋراتۋراسى ف. نورمۋرادوۆانىڭ ءوتىنىشى بويىنشا، تەرگەۋگە دەيىنگى تەكسەرۋ جۇمىستارى ءجۇرىپ جاتىر دەپ مالىمدەدى. وسىعان دەيىن كاسان اۋدانى باسشىسى باحتيار رادجابوۆ قاراماعىنداعى قىزمەتكەرلەردى ۇرىپ-سوعادى دەگەن شاعىمدار تۇسكەن.
