«اتامەكەن» ۇكپ «بيزنەستى قۇتقارۋ قىزمەتى» پيلوتتى جوباسىن ىسكە قوستى. ەندى شاعىن بيزنەس وكىلدەرى ءۇشىن كونسۋلتاسيا الاتىن جانە زاڭسىز تەكسەرۋدى توقتاتاتىن 1432 بايلانىس ورتالىعى قۇرىلدى، دەپ حابارلايدى ەلوردا اكىمدىگىنىڭ رەسمي سايتى.

«بيزنەستى قۇتقارۋ قىزمەتى» ءتۇرلى سالاداعى كاسىپكەرلەر ءۇشىن جۇمىس ىستەيدى، ياعني قوعامدىق تاماقتانۋ ورنى (رەستوران، بار، كافە)، قىزمەت كورسەتۋ سالاسى (ءسان سالونى، تۋراگەنتتەر، كيىم جوندەۋ جانە تىگۋ جانە باسقا)، سەرۆيس (تاماقتى جەتكىزىپ بەرۋ)، ساۋدا، سونداي-اق جوندەۋ جانە مونتاج جۇمىستارىن جۇزەگە اسىراتىن بيزنەسمەندەرگە ارنالعان.

جوبا استانادا پيلوتتى رەجيمدە ىسكە اسىرىلىپ جاتىر جانە ەلورداداعى شاعىن جانە ميكرو-بيزنەستى شۇعىل تۇردە ءتيىمدى قولداۋعا باعىتتالعان. 1432 نومەرى بويىنشا استانا كاسىپكەرلەرىنە وزەكتى جانە جەدەل كەڭەس ۇسىنىلادى، ال «قۇتقارۋ قىزمەتى» موبيلدىك توبى سول ايتىلعان جەرگە شۇعىل تۇردە بارادى. ەەگەر جوبا قولدانىستان ءساتتى وتسە رەسپۋبليكا بويىنشا ەنگىزىلەتىن بولادى.

«اتامەكەن» ۇكپ قوعاممەن بايلانىس جونىندەگى دەپارتامەنتى حابارلاعانداي، «بيزنەستى قۇتقارۋ قىزمەتى» كەلەسىدەگىدەي پرينسيپپەن جۇمىس جاسايدى: «ەگەر استانا كاسىپكەرىنە باقىلاۋشى ورگاننان، سالىقتان نەمەسە كوشى-قون قىزمەتىنەن، پوليسيادان زاڭسىز تەكسەرۋگە كەلسە بولماسا ەسەپشوتتى ارەستكە السا، بيزنەس وبەكتىنى كوممۋنيكاسيادان وشىرسە – سىزگە شۇعىل تۇردە كومەك كورسەتىلەدى». ءموبيلدى توپتىڭ قۇرامىنا «اتامەكەن» ۇكپ، پروكۋراتۋرا، جەمقورلىققا قارسى ورگاندار، استانا ءىىد جانە تجد قىزمەتكەرلەرى كىرەدى.