«نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىنا قولداۋ ءبىلدىرۋ ماقساتىندا دەموكراتيالىق كۇشتەردىڭ «قازاقستان-2050» جالپىۇلتتىق كواليسياسىنىڭ كەزەكتى وتىرىسىن وتكىزدى. وندا 6،5 ميلليون قازاقستاندىقتىڭ مۇددەسىن بىلدىرەتىن كواليسيا مۇشەلەرى جولداۋدا كورسەتىلگەن باسىمدىقتاردىڭ ماڭىزىنا توقتالىپ، جاڭا ستراتەگيالىق قۇجاتتى ىسكە اسىرۋدىڭ ناقتى تەتىكتەرىن ايقىندادى.

وتىرىستى اشقان «نۇر وتان» پارتياسى ءتوراعاسىنىڭ ءبىرىنشى ورىنباسارى ەلىمىزدىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرىنە جانە قازاقستاندىقتاردىڭ ءال-اۋقاتىن ودان ءارى ارتتىرۋ مىندەتتەرىنە ارنالعان بيىلعى جولداۋ ەلباسى ساياساتىنىڭ بەرىكتىگى مەن تۇراقتىلىعىن كورسەتەتىنىن ايتتى.

– ەلباسىنىڭ جولداۋىندا قوعامدا قىزۋ تالقىلانىپ جۇرگەن ەڭ وزەكتى الەۋمەتتىك ماسەلەلەر قامتىلعان. مەملەكەت باسشىسى سول ماسەلەلەردى شەشۋ ءۇشىن ناقتى شارالاردى ۇسىنىپ وتىر. اتاپ ايتقاندا، حالىقتىڭ ءال-اۋقاتىن ارتتىرۋ، تۇرمىس-جاعدايىن جاقسارتۋ، باسپاناعا قولجەتىمدىلىكتى قامتاماسىز ەتۋ، تۇرعىن ۇي-كوممۋنالدىق شارۋاشىلىقتاعى قوردالانعان ماسەلەلەردى شەشۋ، تاريفتەردى شەكتەۋ جانە جولداردى جوندەۋ، قوعامدىق قاۋىپسىزدىك سەكىلدى ماسەلەلەر كوتەرىلگەنىن بىلەمىز، – دەدى ماۋلەن اشىمبايەۆ.

سونىمەن قاتار «نۇر وتان» پارتياسى ءتوراعاسىنىڭ ءبىرىنشى ورىنباسارى اتالعان ماسەلەلەردى شەشۋگە باعىتتالعان ەلباسى ۇسىنىستارىن جۇيەلى سيپاتقا يە ەكەنىن ايتتى.

– ەڭ تومەنگى جالاقىنى ءبىر جارىم ەسەگە كوبەيتۋ ميلليونداعان قازاقستاندىقتىڭ تۇرمىس دەڭگەيىنە وڭ اسەرىن تيگىزەتىن شارا. سونىمەن بىرگە، دەنساۋلىق ساقتاۋ مەن ءبىلىم بەرۋ سالاسىنا بولىنەتىن قاراجات تا كوبەيەتىن بولادى. بۇل شارالاردىڭ ءبارى جۇيەلى تۇردە قازاقستانداعى الەۋمەتتىك جاعدايدى ودان ءارى دامىتۋعا تىڭ سەرپىن بەرەتىنى ءسوزسىز، – دەدى ماۋلەن اشىمبايەۆ.

سونداي-اق جيىن بارىسىندا ەلباسى ايقىنداپ بەرگەن الەۋمەتتىك جاڭعىرۋدىڭ نەگىزگى باسىمدىقتارى قازاقستاندى ءومىر ءسۇرۋ دەڭگەيى جاعىنان الەمدەگى ەڭ دامىعان ەلدەردىڭ قاتارىنا قوساتىن نەگىزگى تەتىك ەكەنى ايتىلدى. وسىعان وراي «نۇر وتان» پارتياسى ناقتى باعىتتار بويىنشا جۇيەلى تۇردە جۇمىس جۇرگىزبەك.

– بىرىنشىدەن، بارلىق ساياسي پارتيالار جانە قوعامدىق كۇشتەر مەن مەملەكەتتىك ەمەس ۇيىمدار بىرىگىپ، ەلباسى ۇسىنىستارىنىڭ ءمانى مەن ماڭىزىن حالىققا تۇسىندىرۋگە اتسالىسۋى كەرەك. ەكىنشىدەن، اتالعان ۇيىمدار جولداۋ باسىمدىقتارىن جۇزەگە اسىرۋدىڭ ءتيىمدى تەتىكتەرىن تالقىلاپ، ونى ۇكىمەتپەن بىرلەسىپ اتقارۋعا ۇلەس قوسۋدى كوزدەپ وتىر. ۇشىنشىدەن، «نۇر وتان» باسقا دا ساياسي پارتيالارمەن جانە مەملەكەتتىك ەمەس ۇيىمدارمەن كۇش بىرىكتىرىپ جولداۋدىڭ جۇزەگە اسىرىلۋىنا جۇيەلى تۇردە قوعامدىق باقىلاۋ جۇرگىزۋدى قولعا الادى، – دەدى ماۋلەن اشىمبايەۆ.

ودان بولەك، «نۇر وتان» پارتياسى ءتوراعاسىنىڭ ءبىرىنشى ورىنباسارى مەملەكەت باسشىسىنىڭ ۇسىنىستارىن بارلىق نەگىزگى ساياسي پارتيالار مەن قوعامدىق كۇشتەر قولداپ وتىرعانىن، وعان دەموكراتيالىق كۇشتەردىڭ جالپىۇلتتىق كواليسياسىنىڭ جينالىسى دالەل ەكەنىن تىلگە تيەك ەتتى.

وتىرىسقا ەلدەگى جەتەكشى پارتيالاردىڭ باسشىلارى، پارلامەنت دەپۋتاتتارى، قازاقستان حالقى اسسامبلەياسىنىڭ، كاسىبي جانە قوعامدىق بىرلەستىكتەردىڭ وكىلدەرى قاتىستى. جيىن بارىسىندا كواليسيا مۇشەلەرى مەملەكەت باسشىسىنىڭ جاڭا جولداۋىنا بايلانىستى ءوز ويلارىن ورتاعا سالىپ، پىكىرلەرىمەن ءبولىستى. اتاپ ايتقاندا، «اق جول» دەموكراتيالىق پارتياسىنىڭ ءتوراعاسى، ءماجىلىس دەپۋتاتى ازات پەرۋاشيەۆ، قازاقستان كوممۋنيستىك حالىق پارتياسىنىڭ حاتشىسى، ءماجىلىس دەپۋتاتى جامبىل احمەتبەكوۆ، پرەزيدەنتتىڭ بەس الەۋمەتتىك باستاماسىنىڭ جۇزەگە اسىرىلۋىن باقىلاۋ جونىندەگى قوعامدىق كەڭەستىڭ ءتوراعاسى، پارلامەنت سەناتىنىڭ دەپۋتاتى باقىتجان جۇماعۇلوۆ، «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ابىلاي مىرزاحمەتوۆ، قازاقستان رەسپۋبليكاسى كاسىپوداقتار فەدەراسياسىنىڭ ءتوراعاسى باقىتجان ءابدىرايىم، قازاقستان ازاماتتىق اليانسىنىڭ پرەزيدەنتى اسىلبەك قوجاحمەتوۆ، «قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەندياسى ستيپەندياتتارىنىڭ قاۋىمداستىعى» كەڭەسىنىڭ ءتوراعاسى، ءماجىلىس دەپۋتاتى باقتيار ماكەن جانە «قازاقستان-2050» جالپىۇلتتىق قوزعالىسى كەڭەسىنىڭ ءتوراعاسى مۇحتار مانكەيەۆ ءسوز الىپ، جولداۋدا كورسەتىلگەن باستامالار حالىقتىڭ تۇرمىس دەڭگەيىن جاڭا دەڭگەيگە كوتەرەتىنىن ايتتى.

ءىس-شارا سوڭىندا جولداۋعا قولداۋ بىلدىرگەن، ەلىمىزدىڭ بارشا ازاماتتارىن جىلدىڭ باستى قۇجاتىن تالقىلاۋ، ءتۇسىندىرۋ جانە ىسكە اسىرۋجۇمىستارىنا بەلسەندى قاتىسۋعا شاقىرعان ۇندەۋ قابىلداندى.

انىقتاما ءۇشىن: دەموكراتيالىق كۇشتەردىڭ «قازاقستان-2050» جالپىۇلتتىق كواليسياسى «نۇر وتان» پارتياسىنىڭ باستاماسىمەن قۇرىلدى. ول 5 ساياسي پارتيانىڭ جانە 24 ءىرى قوعامدىق بىرلەستىكتىڭ باسىن بىرىكتىرىپ، 6،5 ملن. قازاقستاندىقتىڭ مۇددەسىن قورعايدى. سونداي-اق، كواليسيا ەلىمىزدە بولعان كەز كەلگەن ساياسي وقيعا مەن ستراتەگيالىق ماڭىزى بار باستامالارعا قاتىستى بىردەن ءوز پىكىرىن ءبىلدىرىپ، ءارتۇرلى ۇسىنىستارىن جولداپ وتىرادى.