اقتوبە تۇرعىنى ۇكىم شىققاننان كەيىن، ءوزىن جاپپاي زورلادى دەگەن بۇرىنعى شاعىمىنان باس تارتتى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ. جالا جاپقانى ءۇشىن ايەل ادام ون جىلعا دەيىن سوتتالۋى مۇمكىن.

وقيعا بىلتىر تامىز ايىندا بولعان. باستاپقى شاعىمىنا سايكەس، ايەل ادام تانىسى جانە ونىڭ دوستارىمەن بىرگە تابيعات اياسىنا دەمالۋعا بارىپ، ءبارى ىشىمدىك ىشەدى. ءبىرازدان سوڭ دوستارىنىڭ ءبىرى ايەلگە جىنىستىق قاتىناسقا تۇسۋگە ۇسىنىس ايتادى، ول باستارتقان سوڭ ۇرىپ-سوعىپ زورلاعان، ارتىنشا ەكىنشى تانىسى دا جابىلادى. ال ايەلدىڭ ءوزىنىڭ دوسى وقيعانىڭ ءبارىن ۆيدەوعا ءتۇسىرىپتى. ءبىراز ۋاقىتتان سوڭ ايەل ادام ازاپتاۋشىلاردان قۇتىلىپ، پوليسياعا ارىز بەرگەن.

ءبىر ايدان كەيىن ەكىنشى سىنىپتا وقيتىن بالاسى بار، 28 جاستاعى ايەل الدىڭعى ايتقان سوزدەرىن قايتىپ الىپ، ەسكى تانىسىنىڭ زورلاۋ ىسىنە قاتىسى جوق ەكەنىن العا تارتىپ، ال ەكى ەركەكپەن جىنىستىق قاتىناسقا تۇسۋگە ءوزى كەلىسكەنىن مالىمدەدى. وقيعانىڭ جاڭا نۇسقاسىن سوتتا ايتىپ بەرسە دە، ەكىنشى قالالىق سوت ونىڭ تۇسىنىكتەمەسىنە سىن كوزبەن قاراپ، ايعاقتارعا سايكەس كەلمەيتىنىن انىقتادى.

سوت ونىڭ تەرگەۋ كەزىندە بەرگەن ءبىرىنشى ارىزىن شىندىققا جاناسادى دەپ تانىدى.

سوتتىڭ شەشىمىمەن ءۇش ەر ادام التى جىلدان سەگىز جىلعا دەيىن باس بوستاندىقتارىنان ايىرىلدى. ۇكىم زاڭدى كۇشىنە ەنىپ، جوعارى سوت تا ونى وزگەرىسسىز قالدىردى.

ال جاس ايەل پروكۋراتۋرا، ۇلتتىق قاۋىپسىزدىك كوميتەتى جانە ىشكى ىستەر دەپارتامەنتىنە حات جازىپ، قۇقىق قورعاۋ ورگاندارىن جىنىستىق قاتىناسقا ءوز ەركىمەن تۇسكەندىگىنە سەندىرۋگە تىرىستى، ءوزىن سوققىعا جىققان جىگىتكە عانا شاعىمى بار ەكەن.

28 قىركۇيەكتە ايەل ادام وسى ىسكە قاتىستى جاقىپ اسانوۆقا ۆيدەوۇندەۋ جولداپ، تىلشىلەردىڭ الدىندا ءسوز سويلەدى.

"ولاردىڭ تۇرمەدە وتىرعانىن قالامايمىن. ءبارى ءوز ەركىممەن بولدى. ماس بولعاندىقتان، جاڭا سەزىمدى باستان كەشكىمىز كەلدى. بۇل جايىندا ەشكىم ەشقاشان بىلمەس ەدى"، — دەيدى اقتوبەلىك ايەل سوتتالعانداردىڭ وزىنە قىسىم كورسەتكەنىن جوققا شىعارىپ.

ونىڭ ۇستىنە ايەل ادامنىڭ ايتۋىنشا، پوليسيا انا قۇقىعىنان ايىرامىز دەپ قورقىتان سوڭ، ماس كۇيىندە ارىز جازىپ بەرىپتى.

"پوليسيا تەرميندەرىمەن شاعىم جازىپ بەرۋ ءوز ويىما كەلمەس ەدى. قىلمىستىق جاۋاپكەرشىلىك تۋرالى ماعان ەشكىم ەسكەرتۋ جاساعان جوق. بەتتەستىرگەن دە جوق. پوليسيا بولىمىندە پرينتەردىڭ كارتريدجىنەن بوياۋ الىپ، كوگەرگەن جەرلەردى وتىرىك بوياپ بەردى"، — دەيدى ايەل.

ونىڭ سوزىنە سۇيەنسەك، جازدا بولعان جايتتىڭ ۆيدەوسى دا بار. جازبادا ايەل ادامنىڭ ءوز قالاۋىمەن بىرگە بولعانى كورىنەدى.

بىلتىر قىركۇيەكتە ايەل ادامعا قاتىستى جالا جاۋىپ، باستاپقى تۇسىنىكتەمەسىنەن باس تارتقانى ءۇشىن قىلمىستىق ءىس قوزعالدى. كامەلەتتىك جاسقا تولماعان بالاسى بار جۇمىسسىز انا بەس جىلدان ون جىلعا دەيىن باس بوستاندىعىنان ايىرىلۋى مۇمكىن. ەگەر سوت ونى اقتاپ شىقسا، ءۇش سوتتالعان ازاماتتىڭ ءىسى دە قايتا قارالۋى ىقتيمال.