اقتوبە وبلىسىندا «نۇرلى جەر» باعدارلاماسى بويىنشا جەتىم بالالار مەن كوپبالالى وتباسىلار باسپانا الدى.

قازاقستان رەسپۋبليكاسى كونستيتۋسياسى كۇنىنىڭ قارساڭىندا اقتوبە وبلىسىنىڭ العا قالاسىندا «نۇرلى جەر» باعدارلاماسى بويىنشا سالىنعان 60 پاتەرلى تۇرعىن ءۇي پايدالانۋعا بەرىلدى. 12 جەتىم جانە اتا-اناسىنىڭ قامقورلىعىنسىز قالعان، سونداي-اق حالىقتىڭ الەۋمەتتىك وسال توپتارىنا جاتاتىن 48 وتباسى جەكە مەنشىك باسپاناسىنىڭ باقىتتى يەلەرى بولدى. ولاردىڭ بارلىعى مەملەكەتتىك تۇرعىن ءۇي قورىنان باسپانا كەزەگىندە تۇرعان بولاتىن.

وبلىس اكىمى بەردىبەك ساپاربايەۆ جاڭا پاتەر يەلەرىن كوپتەن كۇتكەن قۋانىشتارىمەن قۇتتىقتادى.

- تۇرعىن ءۇي - ءاربىر ادامنىڭ ەڭ باستى ماسەلەسى جانە الداعى جەتىستىگىنىڭ نەگىزى. سوندىقتان مەملەكەت حالىقتى تۇرعىن ۇيمەن قامتاماسىز ەتۋ ءۇشىن جۇمىس ىستەپ جاتىر، وسى ماقساتتا كوپتەگەن باعدارلامالار قابىلداندى. ولاردىڭ قاتارىندا «نۇرلى جەر»، «7-20-25» باعدارلاماسى بار. تەك اقتوبە وبلىسىندا وتكەن جىلى 790 مىڭ شارشى مەتر تۇرعىن ءۇي سالىندى، بيىلعى جىلى كەمىندە 870 مىڭ شارشى مەتر تۇرعىزۋدى جوسپارلاپ وتىرمىز. بۇنىڭ ءبارى مەملەكەت باسشىسىنىڭ حالىقتىڭ ءال-اۋقاتىن جاقسارتۋعا دەگەن قامقورلىعىنىڭ جانە ەلىمىزدىڭ ەكونوميكالىق كۇشىنىڭ ارقاسىندا، - دەپ اتاپ ءوتتى وبلىس اكىمى.

بيىلعى جىلى العادا 128 پاتەر پايدالانۋعا بەرىلەدى، 2019-2020 جىلدارى تاعى ەكى كوپقاباتتى 120 پاتەر سالىناتىن بولادى.

العالىقتاردىڭ قۋانىشىنىڭ تاعى ءبىر سەبەبى 600 وقۋشىعا ارنالعان مەكتەپ-گيمنازيانىڭ اشىلۋى بولدى. بۇل Aلعاداعى 30 جىلدان استام ۋاقىتتان بەرى سالىنعان العاشقى ءبىلىم بەرۋ مەكەمەسى. گيمنازيا جانىندا ورتا مەكتەپتەرى جوق شالعايداعى اۋىلداردان شىققان 100 بالانى قابىلدايتىن مەكتەپ-ينتەرناتى بولادى. قۇرىلىستىڭ قۇنى 1،7 ملرد. تەڭگەدەن اسادى.

- مەملەكەت باسشىسى نۇرسۇلتان نازاربايەۆ ءاردايىم جاستارعا قامقورلىق جاسايدى. پرەزيدەنتتىڭ تاپسىرماسىن ورىنداۋ بارىسىندا ءبىز وبلىستىڭ جاس تۇرعىندارىنا قولداۋ كورسەتۋ ءۇشىن بارلىق قاجەتتى شارالاردى قابىلدايمىز. باسەكەگە قابىلەتتى، جوعارى ينتەللەكتۋالدىق، فيزيكالىق جانە رۋحاني دامىعان قازاقستاندىقتاردى تاربيەلەۋ ءۇشىن، مادەنيەت وبەكتىلەرى، سپورت، ءبىلىم نىساندارىن سالۋدامىز. بيىلعى جىلى وبلىستا 26 مەكتەپ سالىنادى. ونىڭ ىشىندە 15 مەكتەپ جىلدىڭ سوڭىنا دەيىن تاپسىرىلادى، 9 مەكتەپ قىركۇيەكتە اشىلادى، - دەدى بەردىبەك ساپاربايەۆ ءوزىنىڭ قۇتتىقتاۋ سوزىندە جاس العالىقتارعا وقۋدا جوعارى جەتىستىك پەن ساتتىلىك تىلەپ.

مەكتەپ-گيمنازيا بارلىق ءبىلىم بەرۋ ستاندارتتارى مەن قاۋىپسىزدىك تالاپتارىنا سايكەس كەلەدى. ول جوعارى جىلدامدىقتاعى ينتەرنەتپەن جانە وقۋ پروسەسىندە قاجەتتى بارلىق مۋلتيمەديالىق قۇرالدارمەن جابدىقتالعان. فيزيكا، حيميا، بيولوگيا جانە ينفورماتيكا كابينەتتەرى جاڭا موديفياكسيامەن جابدىقتالعان.