ورتالىق كوممۋنيكاسيالار قىزمەتىندە تۇرعىن ۇيگە ارنالعان مەملەكەتتىك باعدارلامالاردىڭ ىسكە اسىرىلۋىنا ارنالعان باسپا ءسوز كونفەرەنسياسى ءوتتى.

ق ر ينۆەستيسيالار جانە دامۋ ءمينيسترى جەڭىس قاسىمبەك «7-20-25» باعدارلاماسىنىڭ بارىسى تۋرالى ايتىپ بەردى.

قازىرگى كەزدە «نۇرلى جەر» مەملەكەتتىك باعدارلاماسىنىڭ ىسكە اسىرىلۋى مەن «7-20-25» حالىققا جەڭىلدەتىلگەن نەسيە بەرۋ باعدارلاماسىنىڭ ىسكە قوسىلۋىنا بايلانىستى تۇرعىن ءۇي قۇرىلىسىنا سالىنعان ينۆەستيسيانىڭ ءوسىمى بايقالىپ وتىر. اتاپ ايتار بولساق، 2018 جىلدىڭ 8 ايىنىڭ قورىتىندىسى بويىنشا 702 ملرد تەڭگەگە جۋىق ينۆەستيسيا تارتىلدى. ول وتكەن جىلداعى دەڭگەيدەن 31 پايىزعا كوپ. بيىل 7،7 ملن شارشىمەتر تۇرعىن ءۇي پايدالانۋعا بەرىلدى، بۇل 2017 جىلدىڭ سايكەس كەزەڭىمەن سالىستىرعاندا 112 پايىزعا ارتىپ وتىر. بۇل تۋرالى  ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا  ينۆەستيسيالار جانە دامۋ ءمينيسترى جەڭىس قاسىمبەك ءمالىم ەتتى.

–رەسپۋبليكا بويىنشا بارلىعى 67 مىڭنان استام باسپانا پايدالانۋعا بەرىلدى، ونىڭ ىشىندە 27 مىڭعا جۋىق جەكە ءۇي بار. جوسپار جىل سوڭىنا دەيىن تولىق كولەمدە ورىندالاتىن بولادى (جوسپار 12،1 ملن. شارشىمەتر). ايتا كەتەتىن ءبىر جايت، بۇرىن جەكە تۇرعىن ءۇي سالۋ قۇرىلىسى باسىم بولسا، ءقازىر كوپقاباتتى ۇيلەردىڭ كولەمى ارتتى. نەسيەلەر 25 جىلعا دەيىنگى مەرزىمگە بەرىلەدى. استانا، الماتى، اقتاۋ، اتىراۋ، سونداي-اق شىمكەنتتە حالىقتى نەسيەلەندىرۋدىڭ شەكتى سوماسى 20 ملن تەڭگەگە دەيىن. بۇگىندە اتالعان قالالاردا نەسيەنى الۋدىڭ ورتاشا مولشەرى شامامەن 12 ملن 800 مىڭ تەڭگەنى قۇرادى. سايكەسىنشە، اي سايىنعى تولەم 85-90 مىڭ تەڭگەگە تەڭ، –دەپ مالىمدەدى جەڭىس قاسىمبەك.

ونىڭ سوزىنە قاراعاندا، قالعان وڭىرلەردە نەسيە سوماسى 12 ملن تەڭگەگە دەيىنگى كولەمدە. بۇل ايماقتاردا وتكەن ەكى ايدا ازاماتتار ورتاشا ەسەپپەن 9 ملن تەڭگەدەن الىپ، اي سايىن 63 مىڭ تەڭگەدەن تولەپ وتىر.

باسپانا ساتىپ الۋعا مۇمكىندىكتەرى جوق حالىقتىڭ الەۋمەتتىك ءالسىز توپتارى ءۇشىن جىل سايىن ساتىپ الۋ قۇقىعىنسىز ارەندالىق 3 مىڭ پاتەر سالىنادى.

–باعدارلامادا 2 جىل ىشىندە بارلىعى 6182 ارەندالىق پاتەردى (331،0 مىڭ ش. م) پايدالانۋعا بەرۋ جوسپارلانعان. بيىلعى جىلدىڭ 8 ايىنداعى 922 پاتەردى (49،6 مىڭ. ش. م) قوسقاندا بۇگىنگى كۇنى 3542 پاتەر سالىندى (196،2 مىڭ ش. م). الەۋمەتتىك تۇرعىن ءۇيدىڭ 1 شارشى مەترىن جالداۋ تولەم اقىسى شامامەن 100 تەڭگەنى قۇرايدى، – دەپ اتاپ ءوتتى مينيستر.

ەكى  جىلعا جۋىق ۋاقىتتا اكىمدىكتە كەزەكتە تۇرعان ازاماتتار (تۇراقتى تابىستارى بار مۇعالىمدەر، دارىگەرلەر، مەملەكەتتىك قىزمەتكەرلەر) مەن «تۇرعىن ءۇي قۇرىلىس جيناق» جۇيەسى سالىمشىلارى ءۇشىن بيىلعى 8 ايدا تاپسىرىلعان 1970 پاتەردى قوسقاندا 18،5 مىڭ كرەديتتىك پاتەر پايدالانۋعا بەرىلدى.

«نۇرلى جەر» باعدارلاماسى اياسىندا بيىلدان باستاپ جىل سايىن 40 مىڭ ۋچاسكەگە ينفراقۇرىلىم جەلىلەرىن تارتۋدى جوسپارلانىپ وتىر. 14 وبلىس ورتالىعىندا ءبىر شارشى مەترىنىڭ قۇنى 120 مىڭ تەڭگەنى قۇرايتىن ءبىرىڭعاي ساۋلەتتىك ستيلدە پيلوتتىق جوبالاردى ىسكە اسىرۋ جالعاستىرىلۋدا.

«باسپانا» يپوتەكالىق ۇيىمىنىڭ مالىمەتى بويىنشا، باعدارلاما باستالعالى تەك ەكى ايدا قاتىسۋشى بانكتەرگە يپوتەكا الۋعا 2562 ءوتىنىم كەلىپ ءتۇستى. ونىڭ ىشىندە بۇگىندە جالپى 20 ملرد تەنگەدەن استام سوماعا 1695 يپوتەكالىق قارىز بەرۋگە قولداۋ جاسالدى. قالعان وتىنىمدەر بانكتەردىڭ قاراۋىندا جاتىر. بۇگىندە بۇل ترەند كۇشەيىپ كەلەدى، ياعني وتىنىمدەر سانى كۇن سايىن ارتۋدا»، - دەدى مينيستر.

ق ر ينۆەستيسيالار جانە دامۋ ءمينيسترى جەڭىس قاسىمبەك «7-20-25» باعدارلاماسىنىڭ اياسىندا پاتەر تاپشىلىعى بولمايتىنىن ءمالىم ەتتى.

ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا «باسپانا» اكسيونەرلىك قوعامىنىڭ «7-20-25» باعدارلاماسىن ىسكە اسىرۋ ءۇشىن پاتەرلەردىڭ جوقتىعى تۋرالى ايتقانى شىندىققا جاناسادى ما جانە بۇگىندە جاعداي راسىمەن سولاي ما؟» دەگەن ساۋال قويىلدى.

«وسى جايىندا مالىمەتتى ەستىگەن بولاتىنمىن. بۇعان دەيىن اتاپ وتكەنىمدەي، وسى جىلدىڭ سوڭىنا دەيىن 100 مىڭنان استام باسپانانى تاپسىرامىز. ونىڭ 35 پايىزى جەكە ۇيلەر بولسا، قالعان 65 پايىزى كوپپاتەرلى تۇرعىن ۇيلەر. سوندىقتان جىلدىڭ سوڭىنا دەيىن ەڭ از دەگەندە 65 مىڭ كوپپاتەرلى ۇيلەر پايدالانۋعا بەرىلەتىن بولادى»، - دەدى جەڭىس قاسىمبەك.