شىمكەنتتىك پەداگوگتار كوپتەن كۇتكەن باسپانانى جەڭىلدىكپەن كرەديتتەۋگە ارنالعان سەرتيفيكاتقا يە بولدى، دەپ حابارلادى Qamshy.kz اقپارات اگەنتتىگى  Sputnik قازاقستان سايتىنىڭ دەرەگىن نەگىزگە الىپ. 

قالا باسشىسى عابيدوللا ءابدىراحىموۆ ۇستازدار قاۋىمىن كاسىبي مەرەكەلەرىمەن قۇتتىقتاپ، ءبىرقاتارىنا توسىن سىي جاسادى. اكىم بۇل مەرەكەدە ءبىرىنشى كەزەكتە ءوز اناسىن قۇتتىقتاعانىن ايتىپ بەردى.

"وزدەرىڭىز بىلەسىزدەر، مەن انامنىڭ ءمۇعالىم بولعانىن ۇنەمى ايتىپ كەلەمىن. كەشە ءوزىم حابارلاسىپ قۇتتىقتادىم. ءبىر قۋانىپ قالدى، نەگىزى كۇندە كورىپ ءجۇر عوي. سىزدەرگە سالەم ايتىپ جاتىر. ول كىسى ءقازىر سارىاعاشتاعى ۇيدە دەمالىستا"، — دەپ اڭگىمەسىن باستاعان عابيدوللا ءابدىراحىموۆ مۇعالىمدەردىڭ كەز كەلگەن ادامزات ءۇشىن الار ورنى ەرەكشە ەكەنىنە توقتالدى.

"ءاربىر ادامنىڭ ومىرىندە ۇستازى بولادى. ول، ارينە، الدىمەن اناسى. كەيىن بالاباقشاداعى تاربيەشىسى، مەكتەپتەگى ۇستازى، جوعارى وقۋ ورنىنداعى وقىتۋشىسى. ءتىپتى ادام جۇمىسقا ورنالاسقاندا دا باعىت-باعدار بەرەتىن ۇستازى بولادى. سوندىقتان مۇعالىمدەر كۇنى بارلىق ادامزات ءۇشىن ماڭىزدى كۇن… جۇما كۇنى ەلباسىمىز ءوزىنىڭ حالىققا كەزەكتى جولداۋىن جولدادى. ۇكىمەت پەن اكىمدەرگە ناقتى تاپسىرمالار بەردى. سونىڭ ىشىندە پەداگوگتاردىڭ ستاتۋسىن ارنايى زاڭمەن انىقتاۋ تۋرالى ماسەلە كوتەردى. وسى بويىنشا ءبىز ۇسىنىستارىمىزدى ۇكىمەتكە جىبەرەمىز. ونى، ارينە، وزدەرىڭىزبەن اقىلداساتىن بولامىز"، — دەدى شىمكەنت باسشىسى.

سالتاناتتى شارا كەزىندە 19 مۇعالىمگە قالا اكىمدىگى تاراپىنان "7-20-25" باعدارلاماسى بويىنشا تۇرعىن ءۇيدى جەڭىلدىكپەن نەسيەلەۋگە ارنالعان العاشقى سەرتيفيكات تابىستالدى. ياعني، اكىمدىك ولاردىڭ اربىرىنە تۇرعىن ءۇيدىڭ باستاپقى جارناسىنىڭ 10 پايىزىن تولەيدى. وسىنداي سىيلىققا يە بولعانداردىڭ ءبىرى – 15 جىلدان بەرى ۇستازدىق جولدا ەڭبەك ەتىپ كەلە جاتقان №50 مەكتەپ ءمۇعالىمى اسەم تۇرالييەۆا. 35 جاستاعى كەلىنشەك ءتورت بالانىڭ اناسى. وسىدان التى جىل بۇرىن باسپانا الۋ ءۇشىن كەزەككە تۇرعان. ال بىلتىردان باستاپ "تۇرعىن ءۇي جيناق بانكى" ارقىلى شوت اشىپ، اي سايىن شاماسىنىڭ كەلگەنىنشە قارجى قۇيىپ كەلىپتى. اكىمدىكتەن بەرىلەتىن سەرتيفيكات تۋرالى اسەم مۇلدەم بىلمەدىم دەيدى.

"ماعان سەرتيفيكات بەرىلەتىن كۇنى قالالىق ءبىلىم باسقارماسىنان حابارلاسىپ، مەرەكەلىك شاراعا مىندەتتى تۇردە قاتىسۋ كەرەكتىگىمدى ايتتى. "نە ءۇشىن؟" دەپ سۇراعانىمدا، "اكىم قۇتتىقتايدى" دەدى. شىنى كەرەك، مەنىڭ ءاتى-جونىمدى ايتىپ، ساحناعا شاقىرعاندا توبەم كوككە جەتتى. العاشىندا نە سىيلىق ەكەنىن بىلمەدىم. كەيىن اكىمدىكتەگىلەر ءتۇسىندىرىپ بەردى. قاتتى قۋاندىم. 11 جىل بولدى تۇرمىسقا شىققانىما. اتا-ەنەمنىڭ قولىندا تۇرامىز. بىزدەن بولەك قايىن اعام وتباسىمەن تۇرادى. وسى رەتتە قالا اكىمىنە ەرەكشە العىسىمدى بىلدىرگىم كەلەدى"، — دەدى ءمۇعالىم. 

ايتا كەتەيىك، كاسىبي مەرەكە قارساڭىنداعى شارادا سەرتيفيكاتتان بولەك  ءبىرقاتار ۇستازدار قالا اكىمى اتىنان العىس حاتتار مەن سىيلىقتارعا يە بولدى.