2018 جىلدىڭ 18 قازانىنان باستاپ وتاندىق پروكاتقا ادام مەن بۇركىتتىڭ دوستىعى تۋرالى باياندايتىن تولىقمەترلى انيماسيالىق فيلم شىعادى. ءفيلمدى ق ر مادەنيەت جانە سپورت مينيسترلىگىنىڭ تاپسىرىسى بويىنشا «قازاقفيلم» كينوستۋدياسى وندىرگەن. قىزىقتى وقيعاعا تولىق اتالعان ءفيلمنىڭ رەجيسسەرلەرى تۇردىبەك مايدان مەن تىلەك تولەۋعازى.
فيلمگە ادام بالاسىنىڭ بۇركىتتى قولعا ۇيرەتۋى ارقاۋ بولعان. وقيعا جەلىسى بويىنشا ادام مەن قۇس بىر-بىرىنە سەنىم بىلدىرە وتىرىپ، باۋىر باسادى. سونىمەن قاتار، فيلمدە قازاقتىڭ ساياتشىلىق ءداستۇرى دە سۋرەتتەلەدى.
«قازاقتار بەس جاسار بۇركىتتى مۇزبالاق دەپ اتايدى. بۇل فيلممەن اۆتورلار بۇركىتتەر جانە ولارمەن اڭعا شىعۋ سالتىن كورسەتۋدى كوزدەگەن. فيلم قازاق تىلىندە جاسالىپ، ورىس تىلىنە دۋبلياجدالعان. كينوتەاترلارعا فيلم ەكى تىلدە شىعاتىن بولادى»، - دەدى «ءقازاقفيلمنىڭ» باسپا ءسوز قىزمەتىنىڭ جەتەكشىسى اينۇر يسايەۆا.
ەكى جىل كولەمىندە جاسالعان بۇل فيلمدە 40-قا جۋىق كينەماتوگرافيانىڭ وسى جانرىندا ەڭبەك ەتىپ جۇرگەن وتاندىق ماماندار ىستەگەن. ۇزاقتىعى 65 مينۋت قۇرايتىن مۋلتفيلم 2D جانە 3D فورماتىندا جاسالعان جانە ءار سەكۋندىندا 24-25 كادر سۋرەت سالىنعان. كەيىپكەرلەردى دىبىستاۋعا ەرجان جارىلقاسىن ۇلى، جانات تىنىبايەۆ، سامات قورداباي، تولەبايەۆ ەرعالي دۇيسەن ۇلى، الما ءادىل قىزى ەسىمدى تەاتر جانە كينو اكتەرلەرى قاتىسقان.
اننوتاسيا:
ەرتە زاماندا ادامدار كەسىرىنەن جەر استىنداعى ايداھارعا اينالاپ كەلە جاتقان ابجىلان ويانىپ، جەر بەتىنە شىعىپ، ماڭايىن جالماپ، قازاق اۋىلىنا ۇلكەن اپات اكەلىپ، ۇرەي تۋعىزادى. ول اۋىلدى وتقا وراپ، قارسى كەلگەندى جالماپ كەلە جاتقاندا، ءبىر قىران بۇركىت بالاپانىن قورعاپ، ونىمەن ايقاسادى. اقىرى ابجىلان قايتا جەر استىنا قاشىپ جوق بولادى. ال قىران وتقا ورانعان ۇيادان بالاپانىن الىپ، الىسقا ۇشىپ كەتەدى. ادام جۇتىپ دانىككەن ابجىلان كۇن تۇتىلىپ، ءوزىنىڭ ايداھارعا اينالار ءساتىن اسىعا كۇتەدى...
