بيىلعى جىلدىڭ بەس ايىندا قازاقستان مەن موڭعوليا تاۋار اينالىمى $28،8 ملن-عا جەتتى، ونىڭ ىشىندە ەكسپورت $28 ملن-دى قۇرايدى دەپ جازادى Qamshy.kz اقپارات اگەنتتىگى. 

قازاقستان موڭعولياعا تەمەكى ونىمدەرى مەن راپس تۇقىمىن ەڭ باستى جەتكىزۋشىلەردىڭ ءبىرى بولىپ تابىلادى، تەك 2017 جىلدىڭ وزىندە وسى ەلگە 25 ملن اقش دوللاردان استام سوماعا تاۋار جەتكىزدى، دەپ مالىمدەدى قازاقستاننىڭ سىرتقى ساۋدا پالاتاسىنىڭ باسپا ءسوز قىزمەتى.

ەندى موڭعوليالىق كومپانيالار قازاقستاننان اۋىلشارۋاشىلىق ونىمدەرىن، كونديتەرلىك بۇيىمداردى جانە قۇرىلىس ماتەريالدارىن يمپورتتاۋعا قىزىعۋشىلىق تانىتىپ وتىر. بۇل تۋرالى تاراپتار قازاننىڭ باسىندا ۇلان-باتوردا  وتكەن ەلىمىزدىڭ ساۋدا-ەكونوميكالىق ميسسياسى بارىسىندا ۋاعدالاستى. ميسسيانى ۇيىمداستىرۋشىلار ق ر ينۆەستيسيا جانە دامۋ مينيسترلىگى،  موڭعولياداعى قازاقستاننىڭ ەلشىلىگى، «اتامەكەن» ۇكپ، قازاقستاننىڭ سىرتقى ساۋدا پالاتاسى جانە موڭعوليانىڭ ۇلتتىق ساۋدا-ونەركاسىپ پالاتاسى بولىپ تابىلادى.

قازاقستاندىق دەلەگاسيا نەگىزىنەن تاماق ونەركاسىبى وكىلدەرىنەن،  اتاپ ايتقاندا،  كونديتەرلىك بۇيىمداردى جانە ماي ونىمدەرىن، سونداي-اق قۇرىلىس يندۋسترياسىن وندىرۋشىلەردەن تۇردى.  موڭعولدىق تاراپتان 40-تان استام كومپانيالار قاتىستى.

قازاقستاننىڭ سىرتقى ساۋدا پالاتاسىنىڭ باسقارما ءتوراعاسىنىڭ ورىنباسارى نۇرالى بوكەيحانوۆ ميسسياعا قاتىسۋشىلارعا سالەم جولداي وتىرىپ، ەكى ەلدىڭ اراسىنداعى ەكونوميكالىق ىنتىماقتاستىق ەداۋىر تىعىز بايلانىستارعا ۇلاسقانىن اتاپ ءوتتى.

«موڭعوليا، دامۋشى ەكونوميكاسى بار ەل بولا وتىرىپ، ينفراقۇرىلىم،  ەنەرگەتيكا، سونداي-اق ءبىلىم مەن مادەنيەت سالالارىنداعى ەكىجاقتى ىنتىماقتاستىقتى دامىتۋدىڭ زور پەرسپەكتيۆالارىنا يە. ەلدەرىمىزدىڭ اراسىنداعى ساۋدا-ساتتىق بايلانىستارى نىعايا تۇسۋدە. كاسىپكەرلىك قوعامداستىق ءتۇرلى سالالارداعى بۇرىننان كەلە جاتقان جانە جاڭا بايلانىستاردى نىعايتۋدا»، - دەدى ن. بوكەيحانوۆ.

ەكى ەل اراسىنداعى تاۋار اينالىمى 2017 جىلى 74،8 ملن اقش دوللارىن قۇرادى، ونىڭ ىشىندە 72،5 ملن دوللار – قازاقستاننىڭ موڭعولياعا ەكسپورتى. بيىلعى جىلدىڭ بەس ايىندا تاۋار اينالىمى 28،8 ملن دوللارعا جەتتى، ونىڭ ىشىندە ەكسپورت 28 ملن دوللار. تەمەكى مەن راپس تۇقىمىنان باسقا قازاقستان موڭعولياعا ۇن ونىمدەرىن، گيگيەنالىق جانە جۋۋ قۇرالدارىن جەتكىزەدى.

«قازاقستاننىڭ سىرتقى ساۋدا پالاتاسى ەكى ەلدىڭ كاسىپكەرلىك قوعامداستىقتارىنىڭ اراسىنداعى ىنتىماقتاستىقتى دامىتۋ ءۇشىن كەلىسسوزدەرگە ارنالعان الاڭ ۇسىنا وتىرىپ، وسىنداي ءىس- شارالاردى ۇيىمداستىرادى.  سونداي-اق ءبىز موڭعولدىق بيزنەسمەندەرگە قازاقستان اۋماعىنداعى بارلىق سالالار بويىنشا سەنىمدى ءارى ادال نيەتتى سەرىكتەستەر تابۋعا كومەك كورسەتە الامىز»، - دەدى ن. بوكەيحانوۆ كەزدەسۋ يەلەرىنە قاراتا ايتقان سوزىندە.

ميسسيا بارىسىندا ەكى ەلدىڭ بيزنەس قوعامداستىقتارى ينۆەستيسيا،  لوگيستيكا جانە ساۋدا سالالارىنداعى ەكىجاقتى ىنتىماقتاستىقتىڭ پەرسپەكتيۆالىق ماسەلەلەرىن تالقىلادى.

اتاپ وتكەن شارا بارىسىندا «بايان سۇلۋ» جانە «Eurasian Foods Corporation» كومپانيالارى كونديتەرلىك جانە ماي ونىمدەرىن جەتكىزۋ تۋرالى ديستريبيۋتەرلىك كەلىسىم جاسادى.