قىرعىزستان قازاقستاننان يمپورتتالاتىن تاۋىق ەتىنە ۋاقىتشا شەكتەۋ قويدى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. بۇل جونىندە قىرعىزستاننىڭ ۆەتەرينارلىق جانە سانيتارلىق قاۋىپسىزدىك جونىندەگى مەملەكەتتىك ينسپەكسياسى حابارلادى.
مەكەمەنىڭ باسپا ءسوز حاتشىسى راحات سادىربەكوۆانىڭ ايتۋىنشا، شەكتەۋگە قازاقستانمەن شەكتەسەتىن ايماقتا قۇس تۇماۋى ىندەتىنىڭ ءورشي ءتۇسۋى سەبەپ بولعان. وسىعان بايلانىستى، قازاقستان بيلىگىنە جاعدايدى انىقتاۋ ءۇشىن رەسمي سۇراۋ جولدانعان.
قازاقستاننىڭ ۆەتەرينارلىق قىزمەتىنىڭ جاۋابىنا بايلانىستى شەكتەۋ الىنىپ تاستالادى، يا ۇزارتىلادى.
"جاعدايدى تولىق انىقتاۋ ءۇشىن ۋاقىتشا شەكتەۋ قويىلدى. شەشىم قازاقستان تارابىنىڭ رەسمي جاۋابىنا بايلانىستى بولماق. ەگەر كورشى ەلدەگى جاعداي سونشالىقتى ءقاۋىپتى بولماسا، شەكتەۋدى الىپ تاستايمىز" دەدى سادىربەكوۆا.
سانيتارلىق ينسپەكسيا سونىمەن بىرگە الەۋمەتتىك جەلىدە تارالعان قۇس ەتىنەن نيۋكاسل ىندەتى تابىلدى دەگەن اقپاراتتىڭ شىندىققا سايكەس كەلمەيتىنىن مالىمدەدى.
