مەملەكەت باسشىسى  ەلباسى ن.ءا. نازاربايەۆتىڭ جىل سايىنعى قازاقستان حالقىنا جولداۋى اياسىندا بەرىلگەن تاپسىرمالارىن ورىنداۋ ماقساتىندا الماتى وبلىسى ءوز تۇرعىندارىنا «7-20-25» تۇرعىن ءۇي سەرتيفيكاتتارىن بەرۋدى باستايدى. بۇگىن الماتى وبلىسىنىڭ اكىمى اماندىق باتالوۆ پەن  «باسپانا» يپوتەكالىق ۇيىمىنىڭ باسشىسى قايرات التىنبەكوۆ ءتيىستى مەموراندۋمعا قول قويدى.

وسىلايشا، ايماق تۇرعىندارى 2 ملرد تەڭگە كولەمىندە الەۋمەتتىك كومەك الادى. 

"الماتى وبلىسىنىڭ اكىمدىگىنە باستاپقى جارنانى ازايتۋ بويىنشا الەۋمەتتىك باستامالارعا دەر كەزىندە قولداۋ كورسەتكەنى ءۇشىن العىس ايتقىم كەلەدى. ەلىمىزدىڭ قالالارى مەن وبلىستارىندا تۇرعىندارعا «7-20-25» باعدارلاماسىنا قاتىسۋ ءۇشىن تۇرعىن ءۇي سەرتيفيكاتتارىن بەرۋ باستالىپ كەتتى. مەملەكەت باسشىسىنىڭ تاپسىرماسىن ۋاقىتىلى ورىنداۋ يپوتەكالىق باعدارلاماعا ۇلكەن سەرپىن بەرەتىن بولادى»، - دەدى «باسپانا» يپوتەكالىق ۇيىمىنىڭ باسقارما ءتوراعاسى قايرات التىنبەكوۆ.

سونداي-اق الماتى وبلىسىنىڭ اكىمى اماندىق باتالوۆ وڭىردە «7-20-25» باعدارلاماسى ءۇشىن 500 مىڭ شارشى مەتر تۇرعىن ءۇي سالىناتىندىعىن حابارلادى. 

ەستەرىڭىزدە بولسا، باستاپقى تۇرعىن ءۇي بويىنشا ۇسىنىستاردى كوبەيتۋ ماقساتىندا «باسپانا» يپوتەكالىق ۇيىمى جەرگىلىكتى اتقارۋ ورگاندارىنا 150 ملرد تەڭگە بولگەن بولاتىن.