بۇگىن الماتى قالاسىندا تمد مەملەكەتتەرى جاستارىنىڭ فورۋمى ءوز جۇمىسىن باستادى.
فورۋمعا ازەربايجان، رەسەي، بەلارۋس، قىرعىزستان، وزبەكستان جانە قازاقستاننىڭ جاستار ۇيىمدارىنىڭ، مەملەكەتتىك ورگانداردىڭ وكىلدەرى، جاس كاسىپكەرلەر مەن ۆولونتەرلار قاتىسۋدا.
فورۋمنىڭ رەسمي اشىلۋ سالتاناتىندا تمد ەلدەرىنەن كەلگەن دەلەگاسيا جەتەكشىلەرى ءسوز سويلەدى. اتاپ ايتقاندا، جاستار ءىسى جونىندەگى فەدەرالدىق اگەنتتىكتىڭ حالىقارالىق قىزمەت ءبولىمىنىڭ باستىعى (روسمولودەج) د. يۆانوۆ، قىرعىز رەسپۋبليكاسى ۇكىمەتى جانىنداعى جاستار ءىسى، دەنە شىنىقتىرۋ جانە سپورت جونىندەگى مەملەكەتتىك اگەنتتىگىنىڭ جاستار ساياساتى ءبولىمىنىڭ باس مامانى ا. ادامالييەۆ، بەلارۋس رەسپۋبليكاسى ءبىلىم مينيسترلىگىنىڭ «بالالار مەن جاستاردىڭ كوركەم شىعارماشىلىعى ۇلتتىق ورتالىعى» رەسپۋبليكالىق جاستار ءبىلىم بەرۋ ورتالىعى مەكەمەسىنىڭ مەڭگەرۋشىسى د. تۋرونوك، ءازىربايجان جاستار ۇيىمدارى ۇلتتىق كەڭەسىنىڭ ءتورايىمى م. مەدجيدوۆا، وزبەكستاننىڭ بۇكىلالەمدىك جاستار قاۋىمداستىعىنىڭ ءتوراعاسى م. الىمبايەۆ، «ماسيس» «قازاقستاندىق ارميان قوعامى» رەسپۋبليكالىق قوعامدىق بىرلەستىگى ءتوراعاسىنىڭ ورىنباسارى ا. ناۆاسارديان ءسوز سويلەدى.
جاستار ءىسى جونىندەگى فەدەرالدىق اگەنتتىكتىڭ (روسمولودەج) حالىقارالىق قىزمەت ءبولىمىنىڭ باسشىسى دميتريي يۆانوۆ ءوز سوزىندە رەسەي فەدەراسياسى ءۇشىن تمد كەڭىستىگىندەگى ءوزارا ىقپالداستىقتا جاستار اراسىنداعى ءوزارا ءىس-قيمىلدى دامىتۋ باسىم باعىت بولىپ تابىلاتىنىن اتاپ ءوتتى.
«ءبىز ءوز تاراپىمىزدان ءار ءتۇرلى باستامالاردى كونسترۋكتيۆتى تۇردە قولداۋعا دايىنبىز. بىزدە گرانتتىق قولداۋدى جۇزەگە اسىراتىن مۇمكىندىكتەر بار. فورۋمعا قاتىسۋشىلاردىڭ العان تاجىريبەلەرى بولاشاقتا ءوز كورىنىسىن تابادى دەپ ۇمىتتەنەمىز»، - دەدى د. يۆانوۆ. رەسەي دەلەگاسياسىنىڭ باسشىسى ۇسىنىلعان جوبالاردى جۇزەگە اسىرۋ ءۇشىن جول كارتاسىن ازىرلەۋدى ۇسىندى.
ءازىربايجان جاستار ۇيىمدارىنىڭ ۇلتتىق كەڭەسىنىڭ ءتورايىمى م. مەدجيدوۆا جاستار كاسىپكەرلىگى مەن ەرىكتىلىك قىزمەتتى دامىتۋ، سونداي-اق جاستار ۇيىمدارى مەن جوبالارىنىڭ وزەكتىلىگىن اتادى.
سونداي-اق، فورۋم اياسىندا «زاماناۋي ءتۋريزمنىڭ ترەندتەرى»، «ۆولونتەرلىك ءومىر سالتى بەينەسى»، «جاستار جانە بيزنەس»، «اقپارات اعىمىنداعى جاستار» تاقىرىپتارىندا سۇحبات الاڭدارى ءوتتى.
فورۋم قورىتىندىسى بويىنشا قاتىسۋشىلاردىڭ ۇسىنىستارى نەگىزىندە ءتيىستى ۇسىنىمدار قابىلدانادى.
