ناۋرىزباي اۋدانىنىڭ اقجار مەن قۇرامىس ىقشاماۋداندارىنداعى كوشەلەر تاقتايداي تەگىستەلەدى. ءقازىر جەرگىلىكتى بيلىك وكىلدەرى اتالعان ەلدىمەكەندەردەگى جولداردى جوندەۋگە تاپسىرىس بەرىپتى. قۇجات ماقۇلدانىپ، قارجى بولىنسە قارقىندى قۇرىلىس كەلەر جىلى باستالماق. ال بيىل قالانىڭ كەنجە اۋدانىندا باس-اياعى 42 كوشەگە اسفال توسەلىپ، 16 شاقىرىم ارىق جەلىسى جاسالدى.

بۇل اقجار جانە قۇرامىس ىقشاماۋداندارداعى تۇرعىندار ءۇشىن راسىمەن دە قۋانىشتى حابار. ويتكەنى، مۇنداعى حالىق جول ازابىن ۇزاق ۋاقىتتان بەرى تارتىپ كەلەدى. ءقازىر تاس جولداردى تەگىستەۋمەن اينالىسقان جۇمىسشىلار بەردىبايەۆ كوشەسىن اسفالتتاپ بىتىرۋگە تايادى.

«بۇل ىقشاماۋداندا تۇرعانىما 40 جىلدان استى. بىزدە بۇعان دەيىن مۇلدەم اسفالت توسەلمەگەن ەدى، جۇرگىنشىلەر جولى دا جوق بولاتىن. مىنە، بيىل كوپ جىل ارمانداعان جولىمىز جوندەلدى. وتە قۋانىشتىمىز. ەندى كوشەمىزگە جارىق تۇسسە دەپ تىلەپ وتىرمىز»، - دەيدى ناۋرىزباي اۋدانىنىڭ تۇرعىنى دميتريي درەيەۆ.

ناۋرىزباي اۋدانى العاش قۇرىلعاندا ينجەنەرلىك جەلى اتاۋلىدان جۇرداي بولعان. تەك 47 كوشەدە جارىق بولسا، بۇگىندە بۇل سان 80-گە جەتىپتى. بيىل اۋداننىڭ تاس قاراڭعى 7 كوشەسىنە ۇزىندىعى 8،5 شاقىرىم جارىق جەلىسى تارتىلدى. ال، ەڭ كۇردەلى پروبلەما – ارىقتار جەلىسى بولىپ تۇر.  

«جالپى، اۋدان قۇرىلعان كەزدە تەك 24 كوشەدە ارىق جۇيەسى قاراستىرىلعان بولسا، بۇل كورسەتكىش بۇگىنگى كۇندە 54 شاقىرىمعا جەتىپ وتىر. بيىلعا 16 شاقىرىم جول جوندەۋ جۇمىستارى جاسالعان كەزدە، سولارمەن بىرگە ارىق جۇيەلەرى دە سالىندى. كەلەسى جىلعا تاعى 19 شاقىرىم ارىق جوندەۋگە تاپسىرىس بەرىلدى»، – دەيدى الماتى قالاسى ناۋرىزباي اۋدانى اكىمى ورىنباسارىنىڭ مىندەتىن اتقارۋشى اسىلحان ورىنبەكوۆ.

كوكتەم-كۇزدە تولارساقتان سۋ كەشىپ، ءۇي اۋلالارى كولكىگەن سۋعا تولاتىن كوشەنىڭ ءبىرى ناجىمەدينوۆ بولاتىن. مۇنداعى تۇرعىندار تالاي جىلدان بەرى تاۋدان اققان لاي-سۋمەن الىسىپ الەك بولعان. وسى جازدا كوشەگە اسفالت توسەلىپ، ماڭىنا تەرەڭ ارىق جاسالدى. ماماندار ەندى مۇندا لاي-باتپاق پەن، تاسقىننان كەلەر ءقاۋىپ جوق دەيدى.

«بۇرىن جاڭبىر جاۋعاندا سۋ ارىققا سىيماي تاسىپ، كوشەنىڭ ءبارىن سۋ الىپ كەتەتىن. كولىكتەردىڭ ءجۇرۋى پروبلەماعا اينالاتىن»، - دەيدى ناۋرىزباي اۋدانىنىڭ تۇرعىنى تالعات مولدابەكوۆ.

«جۇمىستان كەلگەن ۋاقىتىمدا كۇيەۋىم كۇتىپ الاتىن. جەڭىل كولىك جۇرە الماي، تراكتورمەن الىپ كەتەتىن كۇندەر دە بولعان.  تاۋدان اققان سۋ جولدى شايىپ كەتەتىن. ەندى ءقازىر ارىق تۇسكەلى جاتقانىن ەستىپ قۋانىپ وتىرمىز»، - دەيدى اقمارال ەلەۋسىزوۆا ەسىمدى اۋدان تۇرعىنى.

اۋداندا كوپ قاباتتى ءۇي كوپ بولماسا دا ونداعى اۋلالاردىڭ باسىم بولىگى كۇردەلى جوندەۋدەن وتكەن. بيىل 6 اۋلا كورىكتەندىرىلىپ، جەرگىلىكتى تۇرعىندارعا جايلى ەتىلدى. ويىن الاڭدارى جاسالىپ، جارىق شامدارى قويىلدى. اسفالت جابىندىسى توسەلدى. ال، 2019 جىلى 20 اۋلانى كۇردەلى جوندەۋگە تاپسىرىس بەرىلىپتى.