الماتى بيۋدجەتىنەن ۇنەمدەلگەن قارجى الەۋمەتتىك سالاعا جۇمسالادى.
الماتىدا بيۋدجەتتەن ۇنەمدەلگەن 529 ميلليارد تەڭگە الەۋمەتتىك سالاعا جۇمسالاتىن بولدى.
بۇگىن قالالىق ءماسليحات دەپۋتاتتارى بيىلعى بيۋدجەتتى قايتا ناقتىلادى. ۇنەمدەلگەن قاراجات ەسەبىنەن جولدار جوندەلىپ، ارىق جەلىلەرى جاڭارتىلادى. اسىرەسە، سۋ دەڭگەيى ءجيى كوتەرىلەتىن اۋماقتارعا باسىمدىق بەرىلىپ، ۇزىندىعى 49 شاقىرىمنان استام ارىق جەلىلەرىن جوندەۋ كوزدەلۋدە. وعان 100 ملن تەڭگە بولىنبەك.
ال قارجىنىڭ 2 ملرد تەڭگەدەن استامى كولىك-جول ينفراقۇرىلىمىن جەتىلدىرۋگە باعىتتالادى. بۇل قارجىعا تاس جولداعى قاۋىپسىزدىكتى قامتاماسىز ەتۋ ءۇشىن جول بەلگىلەرى جاسالماق. سونداي-اق، شۇعىلا ىقشاماۋدانىنداعى كوشەلەر تەگىستەلەدى. ءارى شاھاردىڭ 8 اۋدانىنداعى جولدارعا اعىمداعى جوندەۋ جۇمىستارى جۇرگىزىلەدى. قالا شەتىندەگى قۇرىلىسشى، وجەت، اقبۇلاق جانە قايرات سياقتى ىقشاماۋدانداردىڭ تۇرعىندارىن اۋىز سۋمەن قامتاماسىز ەتىپ، كارىز جەلىلەرىن سالۋ ءۇشىن تاعى 1 ملرد تەڭگە جۇمسالادى.
«اباتتاندىرۋعا 830،7 ملن تەڭگە بولىنەدى. ونىڭ ىشىندە 39 جەراستى جاياۋ جۇرگىنشىلەر جولىن كۇتىپ ۇستاۋعا 57،7 ملن تەڭگە باعىتتالعان. 2019 جىلى اۋلالاردى اباتتاندىرۋ بويىنشا جۇمىستاردى جالعاستىرۋ ءۇشىن 90 ملن تەڭگەدەن استام قاراجات 220 اۋلانى كۇردەلى جوندەۋدەن وتكىزۋدىڭ جوبالىق-سمەتالىق قۇجاتتاماسىن ازىرلەۋگە بولىنەتىن بولادى. سونداي-اق، اعىمداعى جىلى جەتىسۋ اۋدانىندا اۋلالاردى كۇردەلى جوندەۋدەن وتكىزۋ بويىنشا 340 ملن تەڭگەنىڭ جۇمىسى جۇرگىزىلەدى»، – دەدى الماتى قالاسى ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ءىلياس وسەروۆ.
ۇنەمدەلگەن قاراجاتتىڭ 2،5 ملرد تەڭگەدەن استامى الەۋمەتتىك سالاعا باعىتتالماق. ياعني، از قامتىلعان وتباسىلارعا قولداۋ كورسەتىلىپ، مۇمكىندىگى شەكتەۋلى جاندارعا قوسىمشا كرەسلو-اربالار ساتىپ الىنادى. اۋتيزممەن اۋىراتىن بالالارعا دا كوڭىل ءبولىنىپ، ولاردى تاۋ شاڭعىسىمەن سىرعاناۋ نەگىزدەرىندە وقىتۋ جوسپارلانۋدا. ال قارجىنىڭ 71 ملن تەڭگەسى «رۋحاني جاڭعىرۋ» باعدارلاماسى اياسىندا اعىلشىن تىلىندەگى وقۋلىقتاردى قازاق تىلىنە اۋدارۋعا جۇمسالادى.
«1ء-شى قىركۇيەكتەن باستاپ وقۋشىلار قۇرامىنىڭ شامامەن 13 مىڭ بالاعا دەيىن كوبەيۋىنە بايلانىستى وقىتۋشىلاردىڭ ەڭبەكاقىسىن تولەۋگە 316،5 ملن تەڭگە جۇمسالادى. 279 ملن تەڭگە كوللەدجدەردەگى وقۋشىلاردىڭ ستيپەنديالارىنا جانە تاماقتارىنا، سونداي-اق جاڭا ستۋدەنتتەر قابىلداۋعا ءبولىندى»، – دەدى ءىلياس وسەروۆ
