ءداستۇرلى «الماتى تۋر» ۆەلوشەرۋى وڭتۇستىك استانادا وسىمەن 6-شى رەت وتكىزىلگەلى وتىر. وعان 15 مەملەكەتتىڭ ەڭ ۇزدىك دەگەن ۆەلوشاباندوزدار قاتىسادى. اۋقىمدى سپورتتىق شارا الداعى دەمالىس كۇندەرى وتەدى دەپ جوسپارلانۋدا. وسىناۋ دوداعا وراي، سەنبى جانە جەكسەنبى كۇنى الماتىنىڭ ورتالىق كوشەلەرى جابىلۋى مۇمكىن.

اتاپ ايتار بولساق، ۆەلوشەرۋدىڭ العاشقى كۇنى، ياعني 29 قىركۇيەكتە تولە بي، بايزاقوۆ، ساتبايەۆ جانە جەلتوقسان كوشەلەرى، سونىمەن قاتار، دوستىق، نازاربايەۆ، ءال-فارابي جانە اباي داڭعىلدارى جابىلادى.

ال 30 قىركۇيەكتە ۆەلوشەرۋ شىعىس اينالما اۆتوكولىك جولىنان باستالىپ، ءال-فارابي داڭعىلىمەن جالعاسادى. ناقتىلار بولساق، تۇڭعىش پرەزيدەنت ساياباعىنان دوستىق داڭعىلىنا دەيىن، ودان ءارى مەدەۋ مۇز ايدىنىنا قاراي ۇلاسادى. سپورتتىق شارا 11:00-دەن 16:00-گە دەيىن جالعاسادى.

ايتا كەتەيىك، وتكەن جىلى «الماتى تۋرىنىڭ» ستاتۋسى ەكىكۇندىك بولىپ وزگەرگەن بولاتىن. بۇل ورتالىق ازياداعى ەڭ ءىرى ۆەلودودا بولعالى تۇر دەيدى ۇيىمداستىرۋشىلار. بايراقتى باسەكە 60 ەلدە تىكەلەي ەفير ارقىلى كورسەتىلەدى.

«تەك قازاقستاندىق ەمەس، الەمگە بەلگىلى تەلەارنالار دا تۇسىرەدى، ولاردىڭ قاتارىندا Eurosport ارناسى بار. ول ارنادان 30-دان استام ەلدىڭ تۇرعىندارى تاماشالايدى. قازاقستاننىڭ سپورت نارىعى شەتەلدىك ارىپتەستەرىمىزدى قىزىقتىرىپ وتىر، سول ءۇشىن ولار بىلتىر دا بىزگە جاقسى جارناما جاساعان بولاتىن»، - دەيدى قازاقستاننىڭ ۆەلوسيپەد سپورتى فەدەراسياسى ۆيسە-پرەزيدەنتى امانبەك كۋلچيكوۆ.

دەمالىس كۇندەرى الماتىدا تەك ۆەلودودا ەمەس، سونىمەن قاتار، جىل سايىنعى Fan Run فورماتىنداعى ايەلدەرگە ارنالعان مارافون وتەدى. قاتىسۋشىلار ەرەكشە وبرازبەن شىعىپ، «اتاكەنت» كورمە زالىنان تاڭعى 9-دا جۇگىرۋدى باستايدى.

«بيىلعى جىلى 350-دەن اسا قاتىسۋشى 8 شاقىرىمدى ەڭسەرگەننەن كەيىن ارنايى مەدال مەن گۇلدەرگە يە بولادى. سونىمەن قاتار، ايەلدەر جارىسقا ەرەكشە كيىممەن قاتىسادى. ياعني، سپورت ءارى دەنساۋلىققا پايدالى، ءارى كوڭىل-كۇيدى كوتەرەتىندەي بولۋى كەرەك دەپ شەشتىك. ولار اتاكەنت پاركىن 2 اينالىم جاساپ جۇگىرەدى. بۇل كۇنى جۇگىرۋدەن بولەك ساحنادا كوڭىلدى ويىن-ساۋىق باعدارلاماسى بولادى»، - دەيدى جارىستى ۇيىمداستىرۋشى قۇرالاي ەرمەنبايەۆا.

سونداي-اق، ورتالىق مادەنيەت جانە دەمالىس ساياباعىندا تاڭەرتەڭگى 10-نان باستاپ كوشە ونەرىنىڭ فەستيۆالى ۇيىمداستىرىلماق. وندا ءتۇرعىنداران، بي، ايتىپ، فۋتبول الاڭدارىندا دوپ تەبە الادى.