الماتىدا «ەرمەك سەركەبايەۆتىڭ ءداۋىرى» اتتى مۋلتيمەديالىق كورمە اشىلدى. كورمەگە سول ءداۋىردىڭ جاۋھارىنا اينالعان تۇلعالاردىڭ ەڭبەكتەرى مەن بەينە جازبالارى قويىلعان. ءتىپتى، ەش جەردە جاريا بولماعان دۇنيەلەر ءانشىنىڭ جەكە قورىنان ارنايى الىنىپ قويىلعان.

اتالمىش كورمەنى ەرمەك سەركەبايەۆتىڭ ءومىر جولىنا ارناپ جاسايمىز دەگەن جوسپار بولعان ەكەن. الايدا، ۋاقىت وتە سول داۋىردە حالىقتىڭ ىستىق ىقىلاسىنا بولەنگەن جانداردىڭ ونەر جولىن دا قامتۋدى ءجون كورگەن. مۋلتيمەديالىق كورمە جاساۋدى وسىدان 3 جىل بۇرىن ەرمەك سەركەبايەۆتىڭ نەمەرەسى كاميلا مەن سانا ۇسىنعان. كوپ ىزدەنىستى تالاپ ەتكەن كورمەدەن حح عاسىردا قازاقستاننىڭ مادەنيەتىن دامىتۋعا ۇلەس قوسقان شىعارماشىلىق تۇلعالارىنىڭ تۇتاس قاتارىن كورە الاسىز.

«مەن باقىتتىمىن. مەنىڭ قىزدارىم اكەمنىڭ ونەرىن وتە جوعارى باعالايدى. مىنە، وزدەرىڭىز كورىپ تۇرعانداي، اتالارىنا ارناپ وسىنداي شارا ۇيىمداستىرىپ جاتىر. مەنىڭ اكەمنىڭ ءومىر سۇرگەن عاسىرىن بارلىق الماتى تۇرعىندارى كورە الادى»، – دەدى ەرمەك سەركەبايەۆتىڭ ۇلى بايعالي سەركەبايەۆ.  

اتالمىش كورمە ەرمەك سەركەبايەۆتىڭ 40 مينۋتتىق سۇحباتىنا سۇيەنە وتىرىپ جاسالعان. 8 بولىمنەن تۇرادى. 1ء-شى بولىمىندە اتى اڭىزعا اينالعان ءانشىنىڭ ءومىر كەزەڭدەرى قامتىلعان. سونىمەن قاتار، كورمەنى ەرمەك سەركەبايەۆتىڭ ۇلى بايعالي سەركەبايەۆ دىبىستاعان اۋديوگيدتىڭ كومەگىمەن دە تانىسۋعا بولادى.

«بۇل كورمەدەن  وتە كوپ اقپارات الا الاسىزدار. سەبەبى، مۇندا ءالى ەش جەردە جارىق كورمەگەن تىڭ ماتەريالدار بار. ءار زال وزىندىك ەرەكشەلىككە تولى. ماتەريالداردى ورتالىق مەملەكەتتىك كينوفوتوقۇجاتتار مەن دىبىستىق جازبالار مۇراعاتى، رەسەيدىڭ مەملەكەتتىك فيلم قورى، سەركەبايەۆتار مەن جۇبانوۆتار وتباسىلارى ۇسىنعان بولاتىن»، – دەدى كورمە ۇيىمداستىرۋشىسى وكسانا شكرىگۋنوۆا.

مۋلتيمەديالىق جوبا قالا كۇنىنە وراي ۇيىمداستىرىلعان. جاس شاماسى مەكتەپ وقۋشىلارى مەن ستۋدەنتتەردەن باستاپ، اعا بۋىن وكىلدەرىنە دەيىنگى ءتۇرلى كەلۋشىلەرگە ەسەپتەلگەن.

«جالپى تولىق قامتىلعان دەپ ويلايىمىن. شارادا ەرمەك سەركەبايەۆتىڭ ءومىرى، شىعارماشىلىعى كەڭ مانىندە اشىلعان. ۇيىمداستىرۋشىلاردىڭ ءبارىن جوعارى دەڭگەيدە ۇيىمداستىرعانى كورىنىپ تۇر»، – دەيدى كورمەگە كەلۋشىلەردىڭ ءبىرى داۋلەت ابدىعانييەۆ.

«بۇگىن كەشتەن ايرىقشا اسەرگە بولەنىپ وتىرمىن. ەرمەك سەركەبايەۆ اعامىزدىڭ ءومىرى مەن شىعارماشىلىعىنا ارنالعان بۇل مۋلتيمەديالىق ەرەكشە كورمە كەلۋشىلەردىڭ بارىنە وي سالىپ، ءبىر ءسات تاريحقا كوز جۇگىرتۋگە، ونەر ادامىنىڭ ومىرىنەن كوپ نارسەنى باعامداۋعا تۇرتكى بولعانى انىق»، – دەيدى تاعى ءبىر كورەرمەن الينا تۇراروۆا.

اتالمىش كورمە 25 قازانعا دەيىن سوزىلادى. سونىمەن قاتار، كورمەنى ۇيىمداستىرۋشىلار استانا تۇرعىندارىنىڭ نازارىنا ۇسىنۋدى دا جوسپارلاپ وتىر.