الماتىدا 50 جىلدان بەرى تۇرعان اۋىز سۋ ىسىرمالارى جاپپاي اۋىستىرىلىپ جاتىر. ويتكەنى، قالانى تىرشىلىك نارىمەن قامتاماسىز ەتۋدە ماڭىزدى ءرول اتقاراتىن قۇرىلعىلاردىڭ توز-توزى شىققان.

بيىل ابدەن ەسكىرىپ، ىستەن شىعۋدىڭ از الدىندا تۇرعان ىسىرمانىڭ 16 داناسى جاڭالانادى. تەك جوندەۋ كەزىندە قالانىڭ الاتاۋ، جەتىسۋ جانە تۇركسىب اۋداندارىنىڭ حالقىنا تىرشىلىك ءنارىن بەرۋ ۋاقىتشا توقتاتىلدى. بۇل ماسەلە قالاي شەشىلۋدە؟ اۋىز سۋ قاشان قايتا قوسىلادى؟  

اۋقىمدى جوندەۋ جۇمىستارىنا ەرتە قامدانعان «الماتى سۋ» مەكەمەسى كوپقاباتتى تۇرعىن ۇيلەرگە 1 اپتا بۇرىن ەسكەرتۋ قاعازدارىن ىلگەن. وعان قوسا، تىرشىلىك ءنارىنىڭ ۋاقىتشا جوقتىعىن سەزدىرمەس ءۇشىن الاتاۋ، جەتىسۋ جانە تۇركسىب اۋداندارىنا 50 شاقتى سۋ تاسىعىش كولىك تە جىبەرىپتى. ءقازىر ولار كوشەلەردى ارالاپ، حالىققا تىرشىلىك ءنارىن تاسىپ ءجۇر. ال حالىق جوندەۋ كەزىندە ەشقانداي قولايسىزدىقتىڭ تۋىنداماعانىن ايتادى.

اۋقىمدى جوندەۋ ىسىرمالاردىڭ اشىلىپ-جابىلۋى قيىنداپ، ابدەن ەسكىرگەندىكتەن قولعا الىندى دەيدى ماماندار. ال قۇرىلعىلاردى اۋىستىرعاننان كەيىن جۇيە جاڭالانىپ، دەربەس باسقارىلاتىن بولادى. ويتكەنى، وعان دەيىن بىرنەشە ىسىرما جابىق كۇيىندە قالىپ كەتكەن. ەگەر ولار ىستەن شىعا قالسا، بارلىعىن بىردەي اشىپ جاساۋعا تۋرا كەلەتىن. ەندى ءدۇيىم جۇرت تىرشىلىك نارىنەن مۇلدەم مۇقتاجدىق كورمەيدى.

«ءبىز جۇمىستى جەدەلدەتىپ، مەيلىنشە ۋاقتىلى ورىنداۋعا تىرىسىپ جاتىرمىز. بۇل جۇمىس نە بەرەدى؟ بۇل وتە ۇلكەن سۋ قابىلداعىش. ودان قالاعا 3 ۇلكەن جۇيە تارتىلعان. وسى 3 جۇيەنىڭ اراسىن بايلانىستىراتىن، بىر-بىرىنە اۋىسىپ تۇراتىن ىسىرمالاردىڭ توزىعىنا جەتكەنىنە بايلانىستى جوندەۋ جۇمىستارى اتقارىلۋدا. ىسىرمالار بۇرىن اپاتتى جاعدايدا تۇرعان ەدى»، – دەدى «الماتى سۋ حولدينگى» مكك باس ديرەكتورىنىڭ ءبىرىنشى ورىنباسارى نۋريددين جاربولوۆ.

2 كۇن ىشىندە قۇلجا تاس جولى بويىنداعى 1000، 1200 جانە 1400 ميليمەترلى ىسىرمالاردىڭ 16 داناسى تولىقتاي جاڭاسىنا اۋىستىرىلادى. كەڭ شەڭبەرلى قۇرىلعىنىڭ ارقاسىندا تالعاردان قالاعا تاۋلىگىنە 320 مىڭ تەكشە مەتر سۋ وتەدى. ايتا كەتەيىك، بۇگىن ىسىرمالار ورنىنا قويىلىپ، دانەكەرلەۋ جۇمىستارى اياقتالۋعا جاقىن. ال كەشكە دەيىن بۇل جۇمىستار ءبىتىپ، ەرتەڭ قايتا سۋ بەرۋ جۇمىستارى كەزەڭ-كەزەڭىمەن جۇزەگە اسادى.

«ەڭ سوڭعى، دانەكەرلەۋ جۇمىستارى عانا قالدى. سودان كەيىن بارلىق حاۋىزعا سۋ تولتىرىپ، دايىن تۇرعان سۋدى قالاعا قوسامىز. 2-3 ساعاتتىڭ ىشىندە تەحنولوگيالىق رەجيمگە شىعىپ، بارلىق جەردەگى قىسىمدى رەتتەپ، سودان سوڭ قايتادان بۇرىنعى رەجيمگە كوشەمىز»، – دەپ ءتۇسىندىردى نۋريددين جاربولوۆ.

ايتا كەتەيىك، ءقازىر تالعار سۋ قويماسىندا 24 مىڭ تەكشە مەتر، الماتىداعى سۋ سورعىشى ستانساسىندا 20 مىڭ تەكشە سۋ قورى بار. ارنايى تەحنيكالارمەن جاساقتالعان، دانەكەرلەۋشى قۇرالدار مەن سورعىلارمەن قامتاماسىز ەتىلگەن 30 بريگادا جۇمىستى ۋاقىتىندا بىتىرۋگە ات سالىسىپ جاتىر.