قازاقستان رەسپۋبليكاسى پرەزيدەنتى اكىمشىلىگىنىڭ جانە الماتى قالاسى ءماسليحاتىنىڭ كەلىسىمىمەن المالى اۋدانىنىڭ اكىمى بولىپ بەكقالي تورعايەۆ تاعايىندالدى. ءوز كەزەگىندە، التاي راحىمبەتوۆ بوستاندىق اۋدانىنىڭ اكىمى اتاندى.
الماتى اكىمدىگىندە ولاردى تانىستىرۋ بارىسىندا قالا اكىمى باۋىرجان بايبەك اۋداندارعا جاڭا تاعايىندالعان اكىمدەردىڭ قىزمەتتىك ءوسۋ جولدارىندا بارلىق ساتىلاردان وتكەندەرىن جانە قالا پروبلەمالارىن جاقسى بىلەتىندەرىن اتاپ ءوتتى. ولاردىڭ الدىنا ءپرينسيپتى جانە تۇراقتى قاداعالاۋدى تالاپ ەتەتىن ءبىرىنشى كەزەكتەگى مىندەتتەر قويىلدى.
«اۋدانداردىڭ جاڭا اكىمدەرى اباتتاندىرۋ، جاسىلداندىرۋ جۇمىستارىن ودان ارى جالعاستىرۋعا، كوشەلەردى جوندەۋگە، عيماراتتاردىڭ ارحيتەكتۋرالىق كەلبەتتەرىنە ايرىقشا نازار اۋدارعاندارى ءجون. تۇكش-تى مودەرنيزاسيالاۋ اياسىندا ۇيلەردى جوندەۋدى جالعاستىرىپ، «ەسكى تۇرعىن ءۇي» باعدارلاماسىن مىقتاپ قولعا الۋلارى ءتيىس»، – دەدى قالا اكىمى.
اۋدان اكىمدەرىنە ءبىلىم جانە دەنساۋلىق ساقتاۋ باسقارمالارىمەن بىرىگىپ، مەكتەپتەردەگى وقۋشى ورىندارىنىڭ جەتىسپەۋى مەن ەمحانالارداعى سىرقاتتار تىعىزدىعى ماسەلەسىن شەشۋ تاپسىرىلدى.
ايتا كەتەرلىگى، المالى اۋدانىنىڭ جاڭا اكىمى بەكقالي تورعايەۆ 5 جىلدان استام ۋاقىت اۋەزوۆ اۋدانىندا وسى قىزمەتتى اتقاردى. 2015 جىلدىڭ اقپانىنان باستاپ بوستاندىق اۋدانىنىڭ اكىمى اتاندى.
ءۇش جىل ىشىندە اۋداندا سالىق ءتۇسىمى 22%-عا، شاعىن جانە ورتا كاسىپورىندار سانى 12%-عا، نەگىزگى كاپيتال ينۆەستيسياسى 28%-عا ارتتى. 13 مىڭنان استام جاڭا جۇمىس وردنارى اشىلدى. 1،3 ملن شارشى مەتر تۇرعىن ءۇي ىسكە قوسىلدى، اۋلالاردىڭ 47%-ى، جەراستى وتپەلى جولداردىڭ بارلىعى جوندەلدى.
ءوز كەزەگىندە، بوستاندىق اۋدانىنىڭ جاڭا اكىمى التاي راحىمبەتوۆ ەڭبەك جولىن 1995 جىلى الماتى قالاسى ەكولوگيا باسقارماسىنىڭ مامانى رەتىندە باستادى. قورشاعان ورتانى قورعاۋ سالاسىندا 20 جىل بويىنا ەڭبەك ەتتى، سونىڭ ىشىندە، الماتى قالاسى تابيعاتتى رەتتەۋ باسقارماسىنىڭ باسشىسى دا بولدى. 2015 جىلدىڭ اقپانىنان اۋەزوۆ اۋدانىنىڭ اكىمى قىزمەتىن اتقاردى.
وسى ۋاقىت ىشىندە اۋدانداعى سالىق ءتۇسىمى 74%-عا، بولشەك ساۋدا اينالىمى 60%-عا، ينۆەستيسيا 40%-عا ارتتى، 15 مىڭنان استام جاڭا جۇمىس ورنى قۇرىلدى. 6 مەملەكەتتىك جانە 60 جەكە بالاباقشا اشىلدى.
