تۇركيا ازاماتىنان تاياق جەگەن جەدەل-جاردەم جۇرگىزۋشىسى نيكولاي كۋچما زاڭ بۇزۋشىعا كەشىرىم بەردى. مۇنداي شەشىم قابىلداۋىنا تۇركيا ازاماتىنىڭ ەمشەكتەگى بالاسى مەن ايەلى بار ەكەنى ەسكەرىلدى. بۇل تۋرالى ونىڭ سەنىم ءبىلدىرۋشىسى اندرەي ديدەنكو حابارلادى.
«ءزابىر كورگەن نيكولاي كۋچمانىڭ مورالدىق جانە ماتەريالدىق شىعىنى وتەلدى. ولار سوممانى ايتپاۋدى ءوتىندى. نيكولاي كۋچما المالى اۋداندىق سوتى مەن المالى اۋداندىق پروكۋراتۋراعا دەمير ەبۋزەر اليگە قاتىستى قوزعالعان قىلمىستىق ءىستى توقتاتۋدى سۇراپ ءوتىنىش جازدى. سوڭعى نۇكتەنى سوت قويادى»، - دەيدى اندرەي ديدەنكو.
• ۇلكەنگە قول كوتەرگەن تۇركيا ازاماتى كەشىرىم سۇرادى (ۆيدەو)
• ۇلكەنگە قول كوتەرگەن بۇزاقى تۇركيا ازاماتى بولىپ شىقتى (ۆيدەو)
نيكولاي كۋچمانىڭ تۇركيا ازاماتىن كەشىرگەنىن ەستىگەن جەلى قولدانۋشىلارىنىڭ كوبى «ءىستى سوڭىنا دەيىن جەتكىزۋ كەرەك» دەپ پىكىر بىلدىرگەن. اندرەي ديدەنكو جەدەل جاردەم جۇرگىزۋشىسىن بۇل ارەكەتى نەگە نەگىزدەلگەنىن دە ءتۇسىندىرىپ ءوتتى.
«بارلىق جاعدايدى ەسكەرە وتىرىپ سوت تۇركيا ازاماتىن باس بوستاندىعىنان ايىرىپ، مەملەكەتكەتتىڭ پايداسىنا ۇلكەن كولەمدە ايىپپۇل سالار ەدى. ساراپتاما كورسەتىپ وتىرعانداي، سوت تاجىريبەسىندە جابىرلەنۋشىگە مورالدىق شىعىنعا كوپ وتەماقى بەرمەيدى. ءتىپتى ارتى ولىمگە سوقسا دا. بۇل - سوت «جامان» دەگەندى بىلدىرمەيدى. قاراپايىم ازاماتتاردىڭ كىرىسى مەن جالاقىلارى كوپ ەمەس. سوندىقتان سوت مورالدىق شىعىن رەتىندە كوپ اقشانى تاعايىنداي المايدى»، - دەپ ءتۇسىندىردى اندرەي ديدەنكو.
ەستەرىڭىزگە سالا كەتەيىك، وزگە ۇلت وكىلى جەدەل جاردەم جۇرگىزۋشىسىن سوققىعا جىققان ۆيدەو الەۋمەتتىك جەلىدە تارالدى. وقيعا الماتى قالاسىنداعى ماقاتايەۆ كوشەسىندە بولعان.
60 جاستاعى نيكولاي كۋچمانىڭ بەتى جاراقاتتانىپ، قاباعى جارىلعان. وقيعادان كەيىن اۋرۋحاناعا جەتكىزىلدى. جۇرگىزۋشىگە قول جۇمساعان تۇركيا ازاماتى دەمير ەبۋزەر اليگە قاتىستى ق ر قىلمىستىق كودەكسىنىڭ 1-باپ 293 بولىگى («بۇزاقىلىق») بويىنشا قىلمىستىق ءىس قوزعالعان.
