ينفراقۇرىلىمدىق جوبالارى تولىقتاي اياقتالعان يندۋستريالدى ايماققا قىزىعۋشى كاسىپكەرلەر قارقىنى ارتقان. بۇگىن 4 رەزيدەنت اتالعان اۋماقتا ءوز تاۋارلارىن شىعارۋ ءۇشىن كەلىسىم-شارتقا وتىردى. وندا قانداي تاۋارلار شىعارىلماق؟ باس-اياعى 490 گەكتار اۋماقتى الىپ جاتقان ايماقتا 3 جىلدىڭ ىشىندە قانشا زاۋىت ءونىم وندىرۋگە مۇمكىندىك الا الادى؟
بيىل الماتىنىڭ يندۋستريالدى ايماعىندا 9 زاۋىت ءتۇرلى تاۋار شىعارۋدى كوزدەگەن. ونىڭ ەكەۋى ەندىگى ىسكە قوسىلدى. ءبىرى جوعارى تەحنولوگيالىق توقوتكىزگىش كابەل ونىمدەرىن شىعارسا، ەكىنشىسى – مەتالل گابيون تورىن جاسايتىن اۆتوماتتاندىرىلعان كاسىپورىن. جەلتوقسان ايىنا دەيىن تاعى دا 7 كاسىپورىن ىسكە قوسىلادى. ءوندىرىس ورىندارى مۇناي وندىرىسىنە قاجەتتى قۇبىرلار، ءونىمدى ورايتىن ارنايى جۇقا پلەنكالار، مەديسينادا ءبىر رەتتىك قولدانىلاتىن زاتتار مەن ارحيتەكتۋرالىق دەكوراتيۆتى قاسبەتتى جاساۋعا كىرىسپەك. ال كەلەسى جىلى تاعى دا 16 كاسىپورىن ءوز جۇمىسىن باستايدى.
«يندۋستريالدى ايماقتا ءوندىرىس وشاعىنىڭ بارلىق ءتۇرىن جۇزەگە اسىرۋعا جاقسى جاعداي جاسالعان. انىعىن ايتقاندا، ينجەنەرلىك كوممۋنيكاسيادان مىقتى قۋات كوزى قاراستىرىلعان. اتالعان ايماقتا، 80 مەگاۆاتتىق ەكى قوسالقى ستانسيا جۇمىس ىستەيدى. يندۋستريالدى ايماقتاعى 490 گەكتار جەردىڭ 200 گەكتارىنا ينفراقۇرىلىمدىق جۇمىستار جۇرگىزىلگەن. كاسىپكەرلەرگە بەرىلگەن جەر تەلىمى – 189 گەكتاردى قۇرايدى. ءقازىر بوس جەردىڭ اۋماعى – 82 گەكتار»، – دەدى «الماتى يندۋستريالدى ايماعى» ج ش س باس ديرەكتورى مۇحتار تۇرابەكوۆ.
يندۋستريالدى ايماقتا 2021 جىلى سوڭعى كاسىپورىن ىسكە قوسىلادى. ول ەڭ ۇلكەن بالمۇزداق شىعاراتىن فابريكا بولماق. ءقازىر ءوندىرىس وشاعىنىڭ جوبالىق-سمەتالىق قۇجاتتارى دايىندالۋدا. اتالعان اۋماقتا ءوز ءىسىن باستاۋعا نيەت بىلدىرەتىن رەزيدەنتتەردىڭ سانى 3 جىلدا 60-تان اسادى دەپ كۇتىلۋدە. بۇگىن سونىڭ 4 كەلىسىم-شارتىنا قول قويىلدى. سولاردىڭ العاشقىسىنا – ماشينا جاساۋ سالاسىنداعى ەلەكتر ەنەرگياسىن تاراتۋ جانە باسقارۋ قۇرىلعىسىن ءوندىرۋ جوباسىنا 300 ميلليون تەڭگە ينۆەستيسيالىق قارجى قاراستىرىلعان. تەمىر تۇلپار قۇراستىرۋ ىسىندە جۇمىس ىستەيتىن مەتالل وڭدەۋ، ءموبيلدى كورپۋستار مەن قاقپالار جانە روللەرلەردى شىعارۋ جوباسى دا قولعا الىنباق. ال 250 ميلليون تەڭگەدەي قارجى حيميا وندىرىسىنە جۇمسالماق. سونداي-اق، مۇناي وندىرىسىنە قاجەتتى قۇبىرلاردى شىعارۋمەن اينالىساتىن وندىرىستىك جەلىسىن سالۋ كوزدەلگەن.
«ءبىزدىڭ ىسكە قوسۋدى كوزدەپ وتىرعان زاۋىتىمىز مەتالل وڭدەۋ جانە ونى قۇراستىرۋمەن اينالىساتىن بولادى. ءوندىرىس قۋاتتىلىعى جىلىنا 3 مىڭ توننانى قۇرايدى. شتات بويىنشا 230 ادامدى جۇمىسپەن قامتۋ كوزدەلگەن. ياعني، كاسىپورىندا ەكى اۋىسىمدا ەڭبەك ەتۋ قاراستىرىلعان»، – دەدى ءوندىرىس ورنىنىڭ اتقارۋشى ديرەكتورى ستاۆاكۋلي ماكسەن.
2021 جىلعا دەيىن يندۋستريالدى ايماقتا ناقتى كەلىسىم بويىنشا 41 جوبا جۇزەگە اسىرىلادى. وعان تارتىلاتىن ينۆەستيسيا كولەمى –155 ميلليارد تەڭگە. ەسەسىنە، 5 مىڭ ادام جۇمىسپەن قامتىلماق. بۇگىندە بەس كومپانيا ءوز جۇمىسىن ءساتتى جۇرگىزۋدە.
سوڭعى سەگىز ايدىڭ ىشىندە الماتىدا 500 ملرد تەڭگەنىڭ ءونىمى وندىرىلگەنىن ەسكەرسەك، باسىم بولىگى ءدال وسى يندۋستريالدى ايماققا تيەسىلى ەكەن. يننوۆاسيالىق كاسىپورىن اشۋعا قاۋقارلى ىسكەرلەردىڭ باستاماسىنا توسقاۋىل جوق. سوندىقتان تىڭ يدەياعا تولى جوبا سانى ەداۋىر ارتۋى ىقتيمال. ال قالالىق اكىمدىك تاراپى ينفراقۇرىلىمدىق جۇمىستاردى جۇرگىزىپ، سالىقتىق تۇسىمدەردى ءتۇسىرىپ بەرۋگە ءازىر.
