الماتى قالاسىندا ۇرلانعان ۇيالى تەلەفوندار سىرتقا شىعارىلادى، ياعني قىرعىزستان مەن تاجىكستانعا كەتەدى. بۇل تۋرالى الماتى قالاسىنىڭ اكىمى باۋىرجان بايبەك ۇكىمەت وتىرىسىندا مالىمدەدى.

ۇكىمەت باسشىسى باقىتجان ساعىنتايەۆ الماتى قالاسىندا ۇيالى تەلەفون ۇرلاۋ فاكتىلەرى وتە كوپ ەكەنىن اتاپ ءوتتى. ال قالا اكىمىنىڭ ايتۋىنشا ۇرلانعان تەلەفوندار شەتەلگە كەتەدى.

«ۇيالى تەلەفوندار بويىنشا پوليسيا جۇمىس ىستەپ جاتىر. ءمينيسترىمىز ءبىر سۇحباتىندا ساتۋشىلار وزدەرى تاپسىرىس بەرەدى دەپ ايتىپ كەتتى. ۇيىمداستىرىلعان قىلمىستارعا پوليسيا تالداۋ، زەرتتەۋ جۇمىستارىن جاساپ، پروفيلاكتيكالىق جۇمىستى كۇشەيتۋ كەرەك. سول بويىنشا ناقتى جوسپاردى قويدىق. ونىڭ ءبارىن تالقىلادىق»، - دەپ جاۋاپ بەردى قالا باسشىسى.

ونىڭ ايتۋىنشا، ۇرلانعان تەلەفوندار ەل ىشىندە ساتىلمايدى. 

«مۇندا ساتپايدى، قىرعىزستان مەن تاجىكستانعا تىكەلەي الىپ كەتە بەرەدى. شەكارادا جۇمىستاردى كۇشەيتىپ، وسىعان جول بەرمەۋ كەرەك. ايتپەسە كومپانيالار تىركەلمەسە، ەرتەڭ تەلەفونداردى قالا تۇرعىندارى قولدانا المايدى. ءبىراق ول شەتەلگە كەتىپ جاتىر. پوليسيامەن جۇمىستى كۇشەيتىپ، شەكارا ارقىلى جولدارىن جابۋ كەرەك. سوندا عانا ۇيالى تەلەفوندار ۇرلىعى ازايادى دەپ ويلايمىن»، – دەدى بايبەك.

قالا اكىمى الماتىداعى قىلمىستىڭ كوبەيۋ تەندەنسياسى بۇرىننان بار دەپ اتاپ ءوتتى.

«ەلىمىزدەگى 20% قىلمىس الماتى قالاسىنا تيەسىلى. ءبىزدىڭ قالامىزدا قازاقستان بويىنشا حالىقتىڭ 16%-ىن قۇرايدى. ونىڭ ۇستىنە، ىشكى ميگراسيا وتە جوعارى. جالپى 20% بولعاندا، ون جىلدان استام سولاي بولعان. ۋچاسكەلىك پوليسەيلەرمەن جۇمىس ىستەۋدەمىز. سونداي-اق، اۆتوبولشەك ساتىپ جاتقان «كارسيتي» بازارىن جاپتىق»، – دەپ ءسوزىن تۇيىندەدى ول.

ەستەرىڭىزگە سالا كەتسەك، بۇعان دەيىن پرەمەر-مينيستر باقىتجان ساعىنتايەۆ «ۇيالى تەلەفوندى شىنجىرمەن بايلاپ، قالتاعا سالامىز با ەندى؟»، دەپ ۇرلىقتىڭ كەڭىنەن تاراعان وسى ءتۇرىن سىناعان بولاتىن.