قازاقستاندا تىيىم سالىنعان "تابليعي جاماعات" ەكسترەميستىك ۇيىمىنىڭ نەگىزىندە قۇرىلعان "ياقىن ينكار" ۇيىمى ەكسترەميستىك دەپ تانىلدى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

باس پروكۋراتۋرا "ياقىن ينكار" ۇيىمى ەلىمىزدە زاڭسىز قىزمەت ەتكەنىن انىقتاعان. "ياقىن ينكار" – قازاقستاندا تىيىم سالىنعان "تابليعي جاماعات" ەكسترەميستىك ۇيىمى نەگىزىندە قۇرىلعان. 

باسپا ءسوز قىزمەتىنىڭ اقپاراتىنشا، "ياقىن ينكار" ۇيىمىنىڭ ماقساتى –كونستيتۋسيالىق قۇرىلىستى كۇشتەپ وزگەرتىپ، ەگەمەندىكتى بۇزۋ ارقىلى جەكەلەگەن مەملەكەتتەردە، سونىڭ ىشىندە قازاقستان اۋماعىندا "حاليفات" قۇرۋ.

"اتالعان ۇيىمنىڭ جاقتاستارى قاقتىعىسقا الىپ كەلۋ مۇمكىندىگىن بىلە تۇرا، وزگە دىندەردى جوققا شىعارادى، بۇل ارەكەت ءدىني ەكسترەميزم ۇعىمىنىڭ بەلگىلەرىنە ساي كەلەدى. "ياقىن ينكار" مۇشەسى بولعان قازاقستاننىڭ جەكەلەگەن ازاماتتارى ەلىمىزدىڭ اۋماعىندا ەكسترەميستىك ارەكەت جاساعانى ءۇشىن باس بوستاندىعىنان ايىرىلدى"، — دەلىنگەن حابارلامادا. 

قىلمىستىق ىستەر اياسىندا وسى ۇيىم مۇشەلەرىنىڭ قازاقستان اۋماعىندا توپتار قۇرۋ نيەتى بولعانى انىقتالدى. وسىنداي نەگىزدەر بويىنشا "ياقىن ينكار" ۇيىمى قىرعىزستاندا ەكسترەميستىك دەپ تانىلعان.

وسىعان بايلانىستى استانا پروكۋراتۋراسى سوتقا "ياقىن ينكار" ۇيىمىن ەكسترەميستىك دەپ تانۋ تۋرالى ارىزبەن جۇگىندى.

حابارلامادا ايتىلعانداي، ەسىل اۋداندىق سوتىنىڭ وسى جىلدىڭ 10 قازانىنداعى شەشىمىمەن ارىز تولىق كولەمدە قاناعاتتاندىرىلدى. سوت "ياقىن ينكار" ۇيىمىنىڭ ارەكەتىن ەكسترەميستىك دەپ تانىپ، ونىڭ قىزمەتىنە قازاقستان رەسپۋبليكاسىنىڭ بارلىق اۋماعىندا، سونىڭ ىشىندە اقپاراتتىق ماتەريالدار، بۇقارالىق اقپارات قۇرالدارى، تەلەكوممۋنيكاسيا، الەۋمەتتىك جەلىلەر، مەسسەندجەرلەر جانە بەينەحوستينگتەر ارقىلى تاراتۋعا تىيىم سالدى.

باس پروكۋراتۋرا "ياقىن ينكار" ەكسترەميستىك ۇيىمىنا قاتىسۋ، ولاردىڭ يدەياسىن ناسيحاتتاۋ، قارجىلاندىرۋ ءۇشىن قىلمىستىق جاۋاپكەرشىلىك قاراستىرىلعانىن ەسكەرتتى.