ALMATY FILM كينوفەستيۆالىندە ۇسىنىلعان تۋىندىلاردى 10 مىڭ كورەرمەن تاماشالادى. دەگەنمەن، بۇل سان ءالى دە ارتۋى مۇمكىن. ويتكەنى، بۇگىن كينوبايگە كورسەتىلىمدەرىنىڭ سوڭعى كۇنى بولعانىنا قاراماستان، ۇيىمداستىرۋشىلار كونكۋرستىق باعدارلاماعا قاتىسقان تۋىندىلاردى ەرتەڭ دە قايتالاپ كورسەتپەكشى. ال ءتورت كۇن بويى فەستيۆالگە تورەلىك ەتكەن قازىلار ەڭ مىقتى ءفيلمنىڭ اۆتورىن انىقتاۋ ۇستىندە.

ءتورت كۇن بويى كينوسۇيەر قاۋىمعا ۇلكەن قۋانىش سىيلاپ، الۋان ءتۇرلى فيلمدەردى كورۋىنە مۇمكىندىك بەرگەن ALMATY FILM فەستيۆالى ءوز مارەسىنە جەتۋگە تايادى. شارا باستالعالى كورەرمەندەر 30 كينوتۋىندى تاماشالاعان. ولاردىڭ 10-ى كونكۋرستىق باعدارلاماعا قاتىسىپ جاتىر. كينوفەستيۆال تۇڭعىش رەت ۇيىمداستىرىلىپ وتىرعانىنا قاراماستان، كورەرمەن تاراپىنان ۇلكەن قولداۋ تاپتى. سوندىقتان بولار، كورسەتىلىمدەردە ينە شانشىر ورىن جوق. اسىرەسە، وتانداسىمىز ءادىلحان ەرجانوۆتىڭ ءفيلمى انشلاگپەن وتكەن.

«مەن ءوزىمىزدىڭ الماتىلىق كينوفەستيۆالدىڭ بولۋىن كوپتەن كۇتتىم. بۇل فەستيۆال بۇرىنعىلارعا ۇقسامايدى. مۇندا كوبىنەسە جاستار قاتىسۋدا. ەشكىمنىڭ شىعارماشىلىق كوزقاراسىنا شەكتەۋ جوق، بارلىعى ەركىن، تاۋەلسىز تۇردە وتۋدە. مەنى اسىرەسە، كينوگەرلەردىڭ ءوزارا جاقىن ارالاسۋى جانە كورەرمەندەردىڭ فيلمدەرگە ەرەكشە قىزىعۋشىلىق تۋدىرۋى قۋانتتى. كەشە ءوز ءفيلمىم كورسەتىلگەندە، زال لىق تولى بولدى. قاتتى تاڭ قالدىم. بايگەدە جەڭىپ شىعۋ ماقساتىم ەمەس، ەڭ باستىسى، كورەرمەنگە تۋىندىمدى كورسەتكەنىمە قۋانىشتىمىن»، – دەدى كينورەجيسسەر، ALMATY FILM FESTIVAL قاتىسۋشىسى ءادىلحان ەرجانوۆ.

ALMATY FILM فەستيۆالى جاس بولسا دا، الەمگە بەلگىلى كينوفەستيۆالدەردەن ەش كەم تۇسپەيدى. اسىرەسە، جاھانعا تانىمال كينوگەرلەردىڭ الماتىعا اياق باسۋى شارانىڭ مارتەبەسىنىڭ بيىك ەكەنىن اڭعارتادى دەيدى قاتىسۋشىلار. فەستيۆال اياسىندا اتى الەمگە ايگىلى رەجيسسەرلەر شەبەرلىك ساباقتارىن وتكىزۋدە.

«بۇل كينوفەستيۆال تۇڭعىش فەستيۆالگە ۇقسامايدى. بارلىعى جوعارى دەڭگەيدە ۇيىمداستىرىلعان. ءوز باسىم الماتىعا ءتورتىنشى رەت كەلىپ وتىرمىن. قالا جىلدان جىلعا كوركەيىپ كەلەدى. ال بۇل فەستيۆال قالانىڭ اتىن الەمگە ايگىلەپ، بىرلەسكەن ءونىم جاساۋعا مۇمكىندىك بەرەدى»، – دەيدى كينورەجيسسەر (وڭتۇستىك كورەيا) كيم كي دۋك.

قازاقستاندىق كورەرمەندەر فەستيۆال كەزىندە تىڭ تۋىندىلاردى تاماشالادى. اسىرەسە، جوعالۋدىڭ الدىندا تۇرعان جانۋارلار جايلى تۇسىرىلگەن «پاندا» ءفيلمىن كينوسۇيەر قاۋىم جىلى قابىلدادى.

«پاندانى بارلىق ەلدە جاقسى كورەدى. بۇل ءفيلمنىڭ ءساتتى شىعۋىنىڭ كىلتى دە وسىندا. ءبىز فيلمدە پاندالاردى ساقتاپ قالۋ تۋرالى باعدارلاما جايىندا ايتامىز. سىزدەردەگى جوعالۋ ءقاۋپى ءتونىپ تۇرعان قار بارىسى تۋرالى دا ەستىدىم. ول وتە سيرەك كەزدەسەتىن جىرتقىش. ولار تۋرالى فيلم تۇسىرگىم كەلەر ەدى. ەگەر وسى ويىمدى جۇزەگە اسىرۋعا كومەكتەسەتىن عالىمدار تابىلسا، قۋانار ەدىم»، – دەدى كينورەجيسسەر (اقش) دريۋ فەلمان.

جالپى، ALMATY FILM كينوفەستيۆالىندە ۇسىنىلعان تۋىندىلاردى بۇگىنگە دەيىن 10 مىڭ كورەرمەن تاماشالاعان. دەگەنمەن، بۇل سان ءالى دە ارتۋى مۇمكىن. ويتكەنى، ۇيىمداستىرۋشىلار ەرتەڭ كۇندىز كونكۋرستىق باعدارلاماعا قاتىسقان تۋىندىلاردى قايتالاپ كورسەتپەكشى. ال كەشكە قاراي سالتاناتتى شارانىڭ جابىلۋ ءراسىمى بولادى. ايتا كەتسەك، فەستيۆالدىڭ جابىلۋى كەزىندە باس جۇلدەنى جەڭىپ العان تۋىندى قايتادان قويىلاتىن بولادى.