الماتىدا «نۇر وتان» پارتياسى الماتى قالالىق فيليالىنىڭ كەزەكتى ءححىى ەسەپ بەرۋ-سايلاۋ كونفەرەنسياسى ءوتتى. جيىندا ەكى جىلدا اتقارعان جۇمىس تالقىلانىپ، سونداي-اق جاڭا جوسپارلار مەن مىندەتتەر العا قويىلدى. سونىمەن قاتار، الماتى قالاسىن دامىتۋ ماسەلەلەرى قارالىپ، قالالىق فيليالدىڭ ساياسي كەڭەسىنىڭ جاڭا قۇرامى سايلاندى، ءماسليحات دەپۋتاتتىعىنا كانديداتتار ۇسىنىلدى.
ەكى جىل ىشىندە «نۇر وتان» پارتياسى الماتى قالالىق فيليالى قوعامدىق قابىلداۋ بولمەسىنە 14 مىڭنان استام ازاماتتان ءوتىنىش كەلىپ تۇسكەن. سونىڭ ىشىندە، ۇشتەن ءبىرى، ياعني 28 پايىزى وڭ شەشىمىن تاپقان. قالعانى بويىنشا كونسۋلتاسيالىق كومەك كورسەتىلىپ، تۇسىنىكتەمەلەر بەرىلگەن. جۇرتتىڭ ساۋالى نەگىزىنەن، الەۋمەتتىك قامسىزداندىرۋ، تۇرعىن ءۇي كوممۋنالدىق شارۋاشىلىق، جۇمىسپەن قامتۋ جانە جەر تەلىمدەرىن ءبولۋ ماسەلەلەرىنە قاتىستى.
«پارتيا فيليالى ەلباسىنىڭ بيىلعى 5 الەۋمەتتىك باستاماسىنىڭ الماتىدا ورىندالۋىن قاداعالاۋ جونىندە ارنايى قالالىق قوعامدىق كەڭەس قۇرىپ، ونىڭ قۇرامىنا جالپى 28 ادام، ياعني دەپۋتاتتار مەن وزگە دە ساياسي پارتيانىڭ مۇشەلەرى، ازاماتتىق قوعام وكىلدەرى، ءبىرقاتار كاسىپكەرلەرمەن قاتار، جاستار ۇيىمدارىنىڭ وكىلدەرى ەندى. جاقىندا الماتىعا ارنايى كەلگەن ەلباسى «نۇر وتان» پارتياسىنىڭ ءتوراعاسى نۇرسۇلتان ءابىش ۇلى نازاربايەۆ قالامىزدا اتقارىلىپ جاتقان جۇمىستارعا وڭ باعاسىن بەردى. البەتتە بۇل جەتىستىككە جەتۋدە نۇروتاندىقتاردىڭ دا ەڭبەگى زور ەكەندىگى ءسوزسىز»، – دەدى «نۇر وتان» پارتياسى الماتى قالالىق فيليالىنىڭ ءتوراعاسى، الماتى قالاسىنىڭ اكىمى باۋىرجان بايبەك.
الماتى قالاسىنىڭ اكىمى باۋىرجان بايبەك قالالىق پارتيا باقىلاۋىنىڭ ارقاسىندا الماتىدا مونوپوليستەردى كوممۋنالدىق قىزمەتتى تۇتىنۋشىلارعا 4،7 ميلليارد تەڭگەگە جۋىق وتەماقىنى تولەۋگە مىندەتتەگەنىن اتاپ ءوتتى. قالادا جىلۋ، ەلەكتر قۋاتى، سۋ جانە كارىز جۇيەسىنىڭ تاريفتەرى جىلدىڭ سوڭىنا دەيىن بۇرىنعى دەڭگەيدە قالادى، ال گاز ءۇشىن تولەم 4 پايىزعا تومەندەتىلدى. ودان بولەك، پارتيا باستاماسىمەن قالادا ەلەۋلى الەۋمەتتىك-ەكونوميكالىق وزگەرىستەر بولدى.
«الماتىنىڭ تاريحي ورتالىعى سانالاتىن «استانا» الاڭى، ابىلاي حان، اباي، نازاربايەۆ داڭعىلدارى، پانفيلوۆ، جىبەك جولى، گوگول كوشەلەرى قالاي جاڭارىپ، جاسارعانىن حالىق كورىپ وتىر. تۇرعىن ءۇي، ءبىلىم بەرۋ، دەنساۋلىق، مادەنيەت جانە سپورت سالالارىنداعى الەۋمەتتىك نىساندار قارقىندى تۇرعىزىلۋدا. ءۇش جىلدىڭ ىشىندە 3700-دەن اسا اۋلانىڭ 35 پايىزىنىڭ، ياعني 1338 اۋلانىڭ اباتتاندىرىلۋى – بۇرىن-سوڭدى بولماعان ءىس»، – دەدى «نۇر وتان» پارتياسى الماتى قالالىق فيليالى ءتوراعاسىنىڭ ءبىرىنشى ورىنباسارى جۇلدىز وماربەكوۆا.
«الماتى جاستارى» قولجەتىمدى باسپانا باعدارلاماسى مەن الماتى اۋەجايىن جاڭعىرتۋ، قالالىق اۆتوبۋس پاركىن 30 پايىزعا جاڭارتۋ جانە 2 جاڭا مەترو ستانسياسىنىڭ قۇرىلىسى سىندى جۇمىستاردىڭ اتقارىلۋىنا «نۇر وتان» پارتياسى ۇيىتقى بولىپ وتىر. ودان بولەك، «الماتىنى دامىتۋدىڭ 50 جوبا-درايۆەرى» باستاماسى شەڭبەرىندە 180 ملرد تەڭگە سوماسىنا 41 جوبا ىسكە اسىرىلىپ جاتىر. «نۇر وتان» پارتياسى الماتى قالالىق فيليالىنىڭ كەزەكتى ءححىى ەسەپ بەرۋ-سايلاۋ كونفەرەنسياسىندا ساياسي كەڭەسكە جاڭا قۇراما سايلانىپ، الماتى ءماسليحاتىنداعى بوس ورىنعا ءۇش كانديدات ۇسىنىلدى.
