الماتىدا حالىق قاھارمانى، قالامگەر-پارتيزان قاسىم قايسەنوۆتىڭ 100 جىلدىق مەرەيتويى اتالىپ ءوتتى.

اردا ازامات 23 جاسىندا سۇراپىل سوعىسقا اتتانىپ، ۋكراينا جەرىندە چاپايەۆ اتىنداعى پارتيزان قۇراماسىنىڭ ءۇشىنشى وتريادىن باسقارعان. سوعىس اياقتالعان سوڭ ەلىنە ورالىپ، بىرنەشە لاۋازىمدى قىزمەتتە ەڭبەك ەتكەن. سوعىستان سوڭ قارۋىن قالامعا اۋىستىرعان ول «يلكو ۆيترياك»، «پەرەياسلوۆ پارتيزاندارى»، «اجال اۋزىنان»، «جاۋ تىلىنداعى بالا» سىندى كىتاپتاردى جازادى.

باتىردى ەسكە الۋ كەشى اباي اتىنداعى وپەرا جانە بالەت تەاترىندا ۇيىمداستىرىلدى. شاراعا مارقۇمنىڭ ەت جاقىندارى مەن دوستارى، سونداي-اق الماتى اكىمى باۋىرجان بايبەك كەلگەن. قالا باسشىسى ەلباسىنىڭ قۇتتىقتاۋ ءسوزىن جينالعان قاۋىمعا وقىپ بەردى.  

«حالقىمىز ارداقتى ازاماتىنىڭ ەسىمىن ەشقاشان ۇمىتپايدى دەپ سەنەمىن. ونىڭ رۋحاني مۇراسى وقىرماندارعا ۇسىنىلىپ، جارقىن بەينەسى، كوركەم شىعارمالارى مەن ءتۇرلى ونەر تۋىندىلارى ارقىلى حالىقتىڭ جادىندا ۇدايى جاڭعىرا بەرۋگە ءتيىس. بۇگىنگى كەش تە وسىنداي يگى ماقساتپەن ۇيىمداستىرىلىپ وتىر. سالتاناتتى جيىننىڭ تاعلىمدى دا مازمۇندى وتۋىنە تىلەكتەسپىن. قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ»، – دەلىنگەن ق ر پرەزيدەنتىنىڭ قۇتتىقتاۋ سوزىندە.