الاش كوسەمى ءاليحان بوكەيحانعا ول وقىعان رەسەيدەگى سانكت-پەتەربور مەملەكەتتىك ورمان-تەحنيكالىق ۋنيۆەرسيتەتىنە ەسكەرتكىش تاقتا ورناتىلاتىن بولدى.

بۇل ۇسىنىستى، ياعني ەسكەرتكىش تاقتا ورناتۋدى «اق جول» دەموكراتيالىق پارتياسىنىڭ ءتوراعاسى، ءماجىلىس دەپۋتاتى ازات پەرۋاشيەۆ باستاعان پارلامەنتتىك فراكسيا ۇسىنىپ، اتالمىش ۋنيۆەرسيتەتتىڭ رەكتورىنا ارنايى حات جولداعان بولاتىن. ناتيجەسىندە وسىنداي ءساتتى دە، قۋانىشتى شەشىم قابىلداندى.

♦"سانكت-پەتەربۋرگتە ءاليحاننىڭ مەموريالدى تاقتاسى ورناتىلسىن"

ودان بولەك پارتيا ۇلت كوسەمىنىڭ قيان-كەسكى كۇرەسكە تولى عۇمىرىنىڭ اقىرعى 15 جىلىن وتكىزگەن ماسكەۋدەگى ب. كيسلوۆسكيي ورامى، 4 ءۇيى مەن سامارا قالاسىنداعى 1909-1917 جىلدارى تۇرعان كازانسكايا كوشەسى، 32 ۇيىنە دە ەستەلىك تاقتا ورناتۋ ءىسىن دە قولعا الىپ وتىر.

جۋىردا بۇل يگىلىكتى ىسكە بايلانىستى ازات پەرۋاشيەۆ قازاقستاننىڭ رەسەيدەگى ەلشىسى يمانعالي تاسماعامبەتوۆكە ارنايى حات جولدادى.

«اق جولدىڭ» وسىنداي جۇيەلى ۇسىنىستارى مەن ناقتى ىستەرىنىڭ ارقاسىندا بۇگىن تاڭەرتەڭ سانكت-پەتەربوردان قۋانىشتى حابار كەلىپ جەتتى. الاش كوسەمى ءاليحان بوكەيحاننىڭ 1890-1894 جىلدارى وقىپ بىتىرگەن بۇرىنعى يمپەراتورلىق ورمان ينستيتۋتى، قازىرگى سانكت-پەتەربور مەملەكەتتىك ورمان-تەحنيكالىق ۋنيۆەرسيتەتىنىڭ عىلىمي كەڭەسى باس عيماراتىنىڭ ماڭدايشاسىنا ءوزىنىڭ داڭقتى تۇلەگى، 2015 جىلى يۋنەسكو «بۇكىل الەمدىك شىنايى داڭقتى قايراتكەر» دەپ جاريالاعان ءاليحان بوكەيحان تۋرالى ەستەلىك تاقتا ورناتۋ تۋرالى پارتيانىڭ ۇسىنىسىن باسىم داۋىسپەن قولداپ (27 داۋىس قولدادى، 7 داۋىس قارسى، 5 داۋىس قالىس قالدى)، يگىلىكتى شەشىم قابىلدادى.

وسى ورايدا قازاقستان رەسپۋبليكاسىنىڭ سانكت-پەتەربۋرگ قالاسىنداعى باس كونسۋلى بولات يمانبايەۆپەن بايلانىسقا شىعىپ، بۇل جونىندە اقپارات العان ەدىك.

باس كونسۋل: «داۋىس بەرۋ كەزىندە پارتيانىڭ جولداعان ۇسىنىسى باسىمدىقپەن قولداۋ تاپتى. ەندى بۇل ماسەلە سانكت-پەتەربۋرگ ۇكىمەتىنىڭ تاريحي ەسكەرتكىشتەردى قورعاۋ جونىندەگى كوميسسياسىندا قارالاتىن بولادى. سونداي-اق، الاش ارىسىن ەستە قالدىرۋ تەك مۇنىمەن بىتپەيدى. الداعى ۋاقىتتا سانكت-پەتەربور مەملەكەتتىك ورمان-تەحنيكالىق ۋنيۆەرسيتەتىندە وقيتىن ۇزدىك قازاقستاندىق ستۋدەنتتەرگە ءاليحان بوكەيحان اتىنداعى ستيپەنديا تاعايىنداۋ تۋرالى ماسەلە قارالىپ جاتىر»، - دەپ جاعىمدى جاڭالىعىن حابارلادى.

سونىمەن قاتار، بۇل ءىستىڭ جۇزەگە اسىرىلۋىنا ۇيلەستىرۋشى رەتىندە اتسالىسقان الاشتانۋشى عالىم سۇلتان حان اقق ۇلى مەن سول ينستيتۋتتىڭ تۇلەگى مايكەن ازەنوۆتىڭ ەڭبەگىن دە اتاپ وتكەن ءجون.

سانالى عۇمىرىن ۇلتتىق مەملەكەتتىڭ ىرگەتاسىن كوتەرۋگە سارپ ەتكەن الاش كوسەمى ءاليحان بوكەيحان ەسىمى ءارقاشاندا ارداقتاۋعا لايىقتى.