«اق جول» جەتەكشىسى ازات پەرۋاشيەۆ ماجىلىستە وتكەن دەنە شىنىقتىرۋ جانە سپورت تۋرالى زاڭ جوباسىن تالقىلاۋ بارىسىندا ءبىرقاتار ماسەلەلەرگە بايلانىستى ءوز كوزقاراسىن ورتاعا سالدى.
«مەملەكەت باسشىسى بيىلعى جولداۋىندا الەۋمەتتىك ينفراقۇرىلىمنىڭ قولجەتىمدىلىگىن قامتاماسىز ەتۋدى، 100 سپورت كەشەنىن اشۋدى جانە جاڭا سپورت عيماراتتارىندا مەكتەپ وقۋشىلارىنىڭ سپورتپەن تەگىن شۇعىلدانۋىن قولعا الۋدى تاپسىردى. نەلىكتەن زاڭ جوباسىندا بۇل نورمالار جوق؟ «اق جول» فراكسياسى اتالمىش زاڭعا وسىنداي تالاپتاردى ەنگىزەتىن بولادى»، - دەدى دەپۋتات.
ول مەملەكەتتىك قاراجاتقا سالىنعان كەشەندەردىڭ جەكە مەنشىك يەلەرىنە بەرىلىپ، كەيىن ولاردىڭ قاراپايىم حالىق ءۇشىن قولجەتىمسىز باعالاردى بەلگىلەگەنى جونىندە مىسالدار كەلتىرىپ ءوتتى.
«سايىپ كەلگەندە، بۇل نىساندار سول بالالاردىڭ اتا-انالارى تولەگەن سالىقتارىنىڭ ەسەبىنەن سالىنادى. نەلىكتەن ولاردان اقشا تالاپ ەتىپ، ەسىكتەرىن تارس بەكىتەدى؟ بۇل جەردە بۇقارالىق سپورت نەمەسە قولجەتىمدى سپورت زالدارى تۋرالى قانداي ءسوز بولۋى مۇمكىن؟ سودان كەيىن بارىپ ءار جەردەن شەتەلدىك لەگيونەرلەردى شاقىرامىز»، - دەپ ءوز اشۋىن جاسىرمادى پەرۋاشيەۆ.
«لوندوندا وتكەن ويىندى ەستەرىڭىزگە الساڭىزدار 7 بىردەي التىن مەدال! ەلگە ۇلكەن قۋانىش اكەلدى، ءاربىر جەڭىمپازعا 250 مىڭ دوللار اقشالاي سىيلىق، پاتەرلەر، وردەندەر...»
ال سودان كەيىن دوپينگ داۋى، مەدالداردان ايىرىلۋ، نەتكەن قورلىق ەدى.. مانەزا، چينشانلو، پودوبەدوۆا ... ولار ەڭ قۇرىعاندا ءوزىمىزدىڭ وتانداستار بولسا يگى ەدى، بۇكىل ءومىرىن قازاقستاندىق سپورتقا ارناعان. ولاردى نە سەبەپتى ەلگە تارتتى؟ الاتىن اقشاسىن الىپ، كەيىن لاقتىرىپ كەتۋ ءۇشىن بە سوندا؟
جاقسى، بولاشاقتا سىزدەر مەدالدەن ايىرىلعان جاعدايدا سىياقىلاردى قايتارۋدى ۇسىنارسىزدار، ال سىزدەر سول لەگيونەرلەردەن تىم بولماسا مەملەكەتتىك ناگرادالاردى، وردەندەردى قايتارىپ الدىڭىزدار ما؟»، - دەپ سۇرادى ول. ۆيسە-مينيستر ساكەن مۇسايبەكوۆ دوپينگتى قولدانعان جارىستاردان شەتتەتىلگەن لەگيونەرلەردەن مەملەكەتتىك ناگرادالار قايتارىلىپ الىنباعانىن ايتتى.
«پرەزيدەنت ايتقانداي سپورت زالدارىن نەگە تەگىن ەتپەسكە، چەمپيوندارىمىزدى ءوزىمىز دايىنداپ شىعارايىق»، - دەپ تۇيىندەدى پەرۋاشيەۆ. – ءسىزدىڭ مينيسترلىكتەرىڭىز جوعارى جەتىستىكتى سپورت تۇرىنە عانا ەمەس، بالالار سەكسياسىنان باستاپ بۇقارالىق سپورتقا دا جاۋاپ بەرۋلەرىڭىز قاجەت».
«اق جول» جەتەكشىسى سونداي-اق مينيسترلىكتى «ءادىل ويىنعا» («FairPlay») قاتىستى تەكسەرىس جۇمىستارىن جۇرگىزۋگە شاقىردى. وسى ورايدا قوعامنىڭ نازارىنا ىلىگىپ، ءتۇرلى اڭگىمەلەرگە نەگىز بولعان قىرعىزستاندا وتكەن الەمدىك «كوشپەندىلەر ويىندارىندا» قازاقستاندىق كوكپارشىلاردىڭ وزبەك كومانداسىنان ۇتىلىپ قالعانى جونىندە مىسال كەلتىرىپ ءوتتى. بۇل وقيعا جۇرتشىلىق پەن جانكۇيەرلەردىڭ كۇشتى رەاكسياسىن تۋعىزىپ، سپورتتىق ەتيكا ماسەلەلەرىنىڭ بەتىن اشتى.
«مينيسترلىك كەلىسىپ الىنعان ويىنداردى نازاردان تىس قالدىرماي، مۇنداي ادىلەتسىزدىككە جول بەرمەۋى كەرەك. ءدال سولاردىڭ كەسىرىنەن تالانتتى سپورتشىلار كەتۋدە، ەلدىڭ سپورتتىق ابىرويىنا نۇقسان كەلۋدە. «اق جول» فراكسياسى زاڭ جوباسىنا سپورتتىق ەتيكا جونىندە وسىنداي ۇسىنىستاردى ەنگىزەدى»، - دەپ اتاپ ءوتتى پەرۋاشيەۆ.
س. مۇسايبەكوۆ كوشپەندىلەر ويىندارىندا ورىن العان جاعداي بارىپ تۇرعان سوراقىلىق ەكەنىمەن كەلىستى. «ءبىزدىڭ كوكپارشىلاردىڭ بارلىق كورسەتكىشتەر بويىنشا وزبەكتەردەن جەڭىلىپ قالۋى مۇمكىن ەمەس ەدى. ولار – الەمنىڭ مىقتىلارى. ارينە، كەلەشەكتە ارنايى مەحانيزمدەرىمىز بولۋى قاجەت»، - دەپ ول ماسەلەنىڭ ماڭىزدىلىعىن باسا ايتتى.
