بۇگىن اقىن ءابدىراحمان اسىلبەكوۆ دۇنيەدەن ءوتتى. بۇل تۋرالى ءانشى مەيرامبەك بەسبايەۆ ءوزىنىڭ Instagram جەلىسىندەگى پاراقشاسىندا جازدى، دەپ حابارلايدى Qamshy.kz اقپارات اگەنتتىگى.

«بۇگىن اقىن ءابدىراحمان اسىلبەكوۆ اعامىز دۇنيەدەن ءوتتى. اللا الدىنان جارىلقاسىن. «بوزتورعايمەن» كوككە سامعاتقان اعامنىڭ تۋعان-تۋىستارىنا قايعىرىپ كوڭىل ايتامىن»، - دەپ جازدى ءانشى.

ءابدىراحمان اسىلبەكوۆ 1938 جىلدىڭ 1 مامىرىندا جامبىل وبلىسى تالاس اۋدانى ءۇشارال اۋىلىندا دۇنيەگە كەلگەن.

ونىڭ 1955 جىلى «بەيبىتشىلىك باقشاسى»، «جاۋدى اياعان جارالى» سىندى شىعارمالارى جارىق كوردى.. 1961 جىلى بالالارعا ارنالعان العاشقى ولەڭ جىلدارى جاريالانا باستادى. وسى ۋاقىتقا دەيىن 30-عا جۋىق كىتابىن شىعاردى. ليريكا، ءان ماتىندەرىن جازىپ، ساتيرا جانە اۋدارما جانرلارىمەن اينالىسىپ كەلدى. كوپتەگەن بايقاۋلاردىڭ جەڭىمپازى، جۇلدەگەر. مەيرامبەكتىڭ داۋسىمەن كۇللى قازاق الەمىنە ءماشھۇر بولعان «بوزتورعاي» ءانىنىڭ ءارى جەلتوقسان كوتەرىلىسىنىڭ ەكىنشى كۇنى جازىلعان «جەلتوقسان جەلى» ءانىنىڭ سوزدەرىن جازعان  دا ءابدىراحمان اسىلبەكوۆ ەدى.  قازاق تويلارىنىڭ كوركىن اشىپ جۇرگەن اتاقتى «جار-جار» ءانىنىڭ اۆتورى دا – ءابدىراحمان اعامىز.

«وسى كۇنگە دەيىن 300-دەي انگە ءماتىن جازىپپىن. ونىڭ بارلىعى بىردەي ەفيردەن بەرىلگەنىمەن، كۇن سايىن تورت-بەسەۋى شىرقالىپ تۇرادى. شەتەلدە بولسا، مۇمكىن بايىپ كەتەر مە ەدىم؟.. ءبىراق نەگىزى قازاقتا كۇندە بىرنەشە توي بولىپ جاتىر، ايتسە دە سونىڭ بارلىعى قاداعالانىپ، اۆتورلىق قۇقىققا باعىنا بەرمەيتىنى وكىنىشتى. ەگەر سولاردان تىم قۇرىسا، 100 تەڭگەدەن اۋدارىلىپ تۇرسا، مەن ميلليونەرگە اينالىپ كەتەر مە ەدىم»، - دەپ ءبىر كۇلىپ العان ەدى اقىن بىرنەشە جىل بۇرىن «الاش ايناسى» باسىلىمىنا بەرگەن سۇحباتىندا.

اقىن اعامىزدىڭ تالاي ءانى قازاقتىڭ جۇرەگىنەن ورىن العان. اندەرى تويلاردا دا، كونسەرتتەر مەن مەرەكەلىك شارالاردا دا شىرقالىپ ءجۇر. الايدا اندەرى تانىمال بولعانىمەن اقىنعا قارايلاسقانداردىڭ سانى از ەدى. ۇيىنە ءبىر بارعانىمىزدا قابىرعالارىنىڭ توز-توزى شىققان ءبىر بولمەلى جۇپىنى جاتاقحانادا تۇراتىنىن ءبىلدىم. مۇنىڭ وزىنە شۇكىرلىك ەتكەن اقىن اعامدى كوردىم. ول تىرىسىندە حالىقتان دا، بيلىكتەن دە كومەك سۇراعان جوق. ۇلتىنا تەك مىنانى ايتتى:

الاشقا ايتار داتىم...

ءقازىر قازاق ءبىلىم دە الىپ، شەتەلگە شىعىپ تا جاتىر. ءبىراق سونىڭ «قازاعىم» دەيتىنى از. ۇلتتىق، ەلدىك نامىس دەگەن جەتىسپەيدى. ءتىل، ءدىل، جەر – وسى ءۇش نارسە عوي، مەملەكەتتى، ەلدى ۇلتتى انىقتايتىن. سوندىقتان مەنىڭ ولاردى ويلاماۋىم مۇمكىن ەمەس. سەبەبى ءتىلىم جويىلىپ، ءسوزىم سۇيىلىپ، كەيىنگى ۇرپاققا جەتپەي جاتسا، ۇرپاعىم وزىمە جات بوپ كەتسە، مەن نە ءۇشىن جازامىن؟!. مەن دەگەنىمدە جالعىز ءوزىم ەمەس، جالپى بۇگىنگى اعا بۋىندى مەڭزەپ تۇرمىن. راسۋل گامزاتوۆ: «ەگەر انا ءتىلىم ەرتەڭ ولەدى دەسە، مەن بۇگىن ولۋگە بارمىن»، – دەيدى عوي. ءار قازاقتىڭ كوكەيىندە وسى وي تۇرسا، ءار ادام ءوز ۇلتىن سولاي سۇيسە، شىركىن! وكىنىشكە قاراي، ءتىل تۋرالى ايتقىشتار كوپ بولعانىمەن، ونىڭ شىن جاناشىرلارى از. ءتىلدى تۇزەۋگە 10-15 جىل كەڭدىك بەرۋ ءجون ەمەس، مەنىڭشە، كورشىلەس وزبەكتەر نەمەسە بالتىق جاعالاۋى ەلدەرى سەكىلدى، بىردەن بەتبۇرىس جاساعان دۇرىس. ءبىز جۇمساقتىق ەمەس، سولقىلداقتىڭ تانىتىپ جۇرگەندە، وزىمىزگە قاتاڭ ۇكىم شىعارىپ، تىلىمىزدەن قالاي ايىرىلىپ قالعانىمىزدى بايقاماي دا قالۋىمىز كادىك! سوندىقتان قاپى قالمايىق!

Qamshy.kz اقپارات اگەنتتىگى ءابدىراحمان اسىلبەكوۆتىڭ  تۋعان-تۋىستارىنا قايعىرىپ كوڭىل ايتادى.