وتباسىلىق جانجالدىڭ ناتيجەسى ولىمگە اكەپ سوقتى. ەكى كۇننەن بەرى الەۋمەتتىك جەلىدە ىزدەۋ سالىنعان الماتىلىق جۋرناليست ايگەرىم مۇسايەۆانىڭ ءولى دەنەسى تابىلدى.

الماتى قالاسى ىشكى ىستەر دەپارتامەنتى ءجۋرناليستىڭ ولىمىنە نە سەبەپ بولعانىن ايتتى، دەپ جازادى Qamshy.kz اقپارات اگەنتتىگى.

ۆەدومستۆوداعى دەرەكتەرگە سايكەس، بويجەتكەننىڭ دەنەسى 19 قازاننان 20-سىنا قاراعان ءتۇنى تۇركسىب اۋدانىندا تابىلعان. الدىن الا دەرەكتەرگە سايكەس، قىز پويىزدىڭ استىنا ءتۇسىپ ولگەن.

مۇسايەۆانىڭ دەنەسىن بىردەن تانۋ مۇمكىن بولمادى. سەبەبى ءبىر دە ءبىر قۇجاتى جانىندا ەمەس ەدى. دەنەسى ءمايىتحاناعا جىبەرىلىپ، ونى تانۋعا اعاسى بارادى.

بۇدان بۇرىن كەزەكشى بولىمگە ەر ادام كەلىپ، ايەلىنىڭ جوعالىپ كەتكەنىن ايتىپ ارىز بەرگەن.

كەيىن انىقتالعانداي، بويجەتكەن وتباسىلىق جانجالدان كەيىن ۇيىنەن شىعىپ كەتىپ، سول كۇيى ورالمادى.

پوليسيا قىزمەتكەرلەرى جاعدايدىڭ ءمان-جايىن انىقتاپ جاتىر.

♦الماتىدا قازاقستاندىق ءجۋرناليستىڭ ءمايىتى تابىلدى

ايتا كەتەيىك، 20 قازان HIT TV ارناسىنىڭ پروديۋسەرى ايگەرىم مۇسايەۆانىڭ جوعالىپ كەتكەنى جايلى اقپارات تاراپ ەدى. ال كۇنى كەشە قىزدىڭ ءولى دەنەسى تابىلدى.

جاسى نابەرى 27-دە بولعان ءجۋرناليستىڭ ارتىندا كۇيەۋى مەن ەكى كىشكەنتاي بالاسى قالدى.