جاس ۇلان رەسپۋبليكالىق مەكتەبىنىڭ ىرگەتاسى  1999 جىلى قالانعان بولاتىن. مەكتەپكە ارميا گەنەرالى، كەڭەس وداعىنىڭ باتىرى، №1 حالىق قاھارمانى، №1 قورعانىس ءمينيسترى س.ق.نۇرماعامبەتوۆ اتامىزدىڭ قۇرمەتىنە ەسىمى بەرىلدى. 1999 جىلى 4 قاراشادا ەل پرەزيدەنتى، قرقك-نىڭ جوعارعى باس قولباسشىسى ن.ءا.نازاربايەۆتىڭ قاتىسۋىمەن مەكتەپتىڭ سالتاناتتى اشىلۋ ءراسىمى بولدى. تاۋەلسىز قازاقستاننىڭ قارۋلى كۇشتەرى ءۇشىن وسىنداي وقۋ ورنىن قۇرۋ ەلباسىنىڭ تىڭ يدەياسى.

بۇگىنگى تاڭدا جيىرما جىلدىق تاريحى بار  مەكتەپتە قازاقستاننىڭ تۇپكىر-تۇپكىرىنەن كەلگەن جاس ورەندەر، سان-ۇلتتى قازاقستاننىڭ وكىلدەرى ءبىر شاڭىراق استىندا ايرانداي ۇيىپ، ءوز بىلىمدەرىن جالعاستىرىپ، ەرىنبەي ەڭبەكتەنۋدە.

جاس ۇلان رەسپۋبليكالىق مەكتەبىنىڭ باستى مىندەتى – ءاربىر تاربيەلەنۋشىسىنىڭ ۇلتىنا ادال، انتىنا بەرىك، وتانسۇيگىش،  ينتەرناسيوناليزمدى بولىپ قالىپتاسۋى. سول جولدا مەكتەپ ۇلاندارى بۇگىندە بىلىكتى اسكەري كوماندالىق قۇرام جانە ءبىلىمدى ۇستازداردان تاربيە مەن ءبىلىمدى قاتار  بويعا ءسىڭىرىپ وتىر. وسىنداي مامانداردىڭ ارقاسىندا جاس ۇلان مەكتەبىن – وتانىنىڭ بەرىك قورعاندارى، كەشەگى ابىلاي مەن بۇگىنگى ساعاداتتىڭ ءىزباسارلارى ۇزدىك كورسەتكىشپەن ءتامامداۋدا.

 مەكتەپ تاربيەلەنۋشىلەرى وقىتۋدىڭ جاڭا ۇلگىسىندە ءبىلىم الىپ، كۇشەيتىلگەن دەنە دايىندىعىن، اسكەري پاندەردى، مەملەكەتتىك جانە شەت تىلدەردى تەرەڭ مەڭگەرۋدە. الدىمىزدا مەكتەبىمىزدىڭ 20 جىلدىق مەرەيتويى كەلە جاتىر. جيىرما جىلدىق مەرەيتوي قارساڭىندا  ۇلاندار قوعامدىق ءىس-شارالارعا بەلسەنە قاتىسىپ، مادەني كوپشىلىك ورتادا ءوز بىلىمدەرى مەن ونەرلەرىن سىناپ بايقاۋدا. جاس ۇلاندىقتار بويىنان تەك وتان قورعاۋشىلىق قاسيەت قانا ەمەس، سونىمەن قاتار سەگىز قىرلى ءبىر سىرلىلىق تا تابىلادى.

جاس ۇلاندىقتار ءۇشىن س.ق.نۇرماعامبەتوۆ – اتى اڭىزعا اينالعان، ءومىر جولى ونەگەلى، ءبىرتۋار اڭىز ادام. وسىنداي باتىر اتامىزدىڭ ەسىمى بەرىلگەن وقۋ ورنىندا تاربيە الۋ – بىزدەر  ءۇشىن ۇلكەن قۇرمەت، ابىروي. ءبىز جاس ۇلان رەسپۋبليكالىق  مەكتەبىنىڭ تاربيەلەنۋشىلەرى نۇرماعامبەتوۆشى ەكەنىمىزدى  ەستەن شىعارماۋىمىز كەرەك.

ءپاتريوتيزمنىڭ ۇشقىنى بويىنان تاسىعان نۇرماعامبەتوۆشىلاردىڭ الدىڭعى بۋىنى قازىرگى تاڭدا قرقك-نىڭ جوعارعى وقۋ ورنىندا ءبىلىمىن جالعاستىرىپ جاتسا، كەيىنگى بۋىنى ءوزىنىڭ وتان الدىنداعى بورىشىن ماڭدايدان تەر شىعا، حالىق قاھارمانى باۋىرجان مومىش ۇلى ايتپاقشى «ەل دەگەندە ەمىرەنىپ، جەر دەگەندە تەبىرەنىپ» وتەۋدە.

بۇگىنگى جاس ۇلاندىقتار ق ر قك-نىڭ ەرتەڭگى بولاشاعى دەسەم سوزىمە ەشكىم ءشۇبا كەلتىرمەس. ءوز ەلىم، ەلىم ءۇشىن بارىنە توزەمىن، ەلدىگىم ءۇشىن جەر شاردى كەزەمىن، باسىمىزعا كۇن تۋسا تولارساقتان قان كەشەمىن دەگەن ەرەن ەرلەر  ۇرپاعى جاس ۇلان  مەكتەبىندە تاربيەلەنۋدە. قازاقتا «ەر ەلى ءۇشىن تۋادى، ەلى ءۇشىن ولەدى» دەگەن  ءسوز بار. سول ەرلەرىڭىز ءبىز بولارمىز، كىم بىلەدى؟

   ۇلى وتاننىڭ ۇلاندارى

بويىمىزدا ساق بابانىڭ سابىرلىعى

ويىمىزدا التى الاشتىڭ اۋىر مۇڭى

ەرلەرىم ازاتتىقتى ارمان ەتتى

بەرگەن جوق پا قابىل قىپ ءتاڭىر مۇنى

بەرەكەمەن مولايسىن ىرىس بۇگىن

ءبىر وزىڭە ارنايىن جىر ۇشقىنىن

جاساي بەرسىن وتاندى قورعاۋشىلار

كۇزەتكەن ازات ەلدىڭ تىنىشتىعىن

قازاقتىڭ سامعايتۇعىن قىرانىمىز

تاۋسىلماسىن ماڭگىلىك جىر ءانىمىز

قازاقستان دەيتۇعىن ۇلى وتاننىڭ

قايتپاس قايسار قايراتتى ۇلانىمىز

اقتاعان اق ءۇمىتىن انالاردىڭ

ەڭبەگىن ەرلەرىمنىڭ باعالار كىم

بۇگىنگى ءبىز بولامىز ۇلاندارى

كەشەگى وتكەن ءباھادۇر بابالاردىڭ

س.ق.نۇرماعامبەتوۆ اتىنداعى

جاس ۇلان رەسپۋبليكالىق مەكتەبىنىڭ

ۇلانى مۇحامەت نۇرجانات