سىر وڭىرىندە جاستار ەڭبەك جاساقتارى قىزمەتتەرىن دامىتۋ باعىتىندا الەۋمەتتىك قىزمەتتى ۇيىمداستىرۋ جوباسى جوعارى دەڭگەيدە جۇزەگە اسىرىلىپ كەلەدى.

سوڭعى بەس جىلدان بەرى وبلىستا «جاس قۇرىلىسشىلار» ەڭبەك جاساعى بەلسەندى قىزمەت كورسەتىپ ءجۇر. سول ۋاقىتتان باستاپ 1600-گە جۋىق جاس ماۋسىمدىق جۇمىسپەن قامتىلدى. ولاردىڭ اراسىندا وقۋشىلار، ستۋدەنتتەر، جۇمىسسىز جاستار، بالالار ءۇيىنىڭ تۇلەكتەرى جانە تاعدىردىڭ جازۋىمەن جازاسىن وتەپ شىققاندار بار. ولار 16-29 جاس ارالىعىنداعى قىزدار مەن جىگىتتەر بولىپ تابىلادى.

وسى ماقساتتا وبلىستىق جاستار ساياساتى باسقارماسى ناقتى ءىس-شارالار جۇرگىزىپ كەلەدى. ۇستىمىزدەگى جىلدىڭ وزىندە بۇل باعىتتا ءبىرقاتار جۇمىستار جۇزەگە استى. باسقارما ماماندارىنىڭ ايتۋىنشا، بيىل ءبىرقاتار جوبالار اياسىندا ءارتۇرلى باعىتتا 70 شارا ۇيىمداستىرىلعان. اتاپ ايتقاندا، «جاس قۇرىلىسشىلار» ەڭبەك جاساعىنىڭ ساربازدارى اراسىندا دانەكەرلەۋدەن بايقاۋ ءوتتى. بايقاۋ بارىسىندا جاستار اتالمىش كاسىپتىڭ قىر-سىرىنا قانىقتى. قاراپايىم ەڭبەك يەلەرىنىڭ تاجىريبەسىنە زەر سالدى.

«ءبىز جاستار اراسىندا جۇمىسشى ماماندىقتاردى ناسيحاتتاۋعا ماڭىز بەرىپ كەلەمىز. وسى ماقساتتا ستۋدەنتتەر جانە جۇمىسسىز جاستاردىڭ قاتىسۋىمەن وڭىردەگى ىرگەلى كاسىپورىن تىنىس-تىرشىلىگىمەن تانىسۋ شارالارى وتكىزىلدى. اتاپ ايتقاندا، ولار «ابزال جانە ك» تس، «قىزىلوردا جىلۋ ەلەكتر ورتالىعى» مقك، «جان اراي»، «نۋرستروي لتد»، «حاۋ يۋ ينتەرناسيونال قىزىلوردا» جاۋاپكەرشىلىگى شەكتەۋلى سەرىكتەستىكتەرى سەكىلدى مەكەمەلەرگە ەكسكۋرسيا جاسادى. سونداي-اق، اۋدانداردا جانە ساۋدا ورىندارىندا 20 قوعامدىق قابىلداۋ بولىپ ءوتتى. جاستار قايىرىمدىلىق شارالارىنا دا بەلسەنە اتسالىسىپ كەلەدى. ولار تۇرمىسى تومەن 5 وتباسىنىڭ ۇيىندە تازالىق، سىرلاۋ، اكتەۋ جۇمىستارىنا بەلسەنە قاتىستى.

تاعى ءبىر ايتا كەتەرلىگى، جاستار اراسىندا «AutoCAD» باعدارلاماسى بويىنشا سىزبا بايقاۋى، «سىلاق سىلاۋ» سايىسى، جاستار ءىسى جونىندەگى كوميتەت مۇشەلەرى اراسىندا ۇلتتىق سپورت تۇرلەرىنەن جارىس بولىپ ءوتتى. وعان قوسا «ازاماتتىق باستامالار»، «جاڭا الەمگە جول سالامىز»، «تۇلعالىق قاسيەتتى دامىتۋ» تاقىرىپتارىندا سەمينار-ترەنينگتەر وتكىزىلدى. سىر وڭىرىندەگى 20 وقۋ ورنىندا «جاس قۇرىلىسشىلار» ەڭبەك جاساعىنىڭ جۇمىسى ناسيحاتتالدى»، - دەدى وبلىستىق جاستار ساياساتى باسقارماسىنىڭ باسشىسى قۋانىش جانۇزاقوۆ.

سوڭعى جىلدارى وڭىردە جاستار اراسىندا دانەكەرلەۋ، تۇرمىستىق تەحنيكالاردى جوندەۋ، كولىك تەحنيكاسى جانە ونى باسقارۋ باعىتىندا ءتيىستى جۇمىستار اتقارىلىپ كەلەدى. وسى ماقساتتا شەبەرلىك ساعاتتار وتكىزىلدى. وعان قوسا جاستاردى جۇمىسپەن قامتۋ ماقساتىندا ءىرى كاسىپورىن باسشىلارىمەن كەزدەسۋ ۇيىمداستىرىلعان.

وسىنداي وڭ باستامالاردىڭ ناتيجەسىندە جەرگىلىكتى كاسىپورنىندا جاستار ءىسى جونىندەگى كوميتەتتەر اشىلىپ وتىر. بيىل ولاردىڭ قاتارى تاعى دا ۇشەۋگە تولىقتى.

«الدا اتقارىلاتىن ءىس-شارالار جوسپارى جاسالعان. ۇستىمىزدەگى جىلدىڭ قاراشا ايىندا «ۇزدىك مامان» وبلىستىق بايقاۋى وتكىزىلەدى. وعان قالا مەن اۋدانداردان سايىسكەرلەر كەلەدى. تاعى ءبىر ايتا كەتەرلىگى، قالا جانە بارلىق اۋدانداردا وقۋشىلارعا كاسىبي باعىت-باعدار بەرۋ بويىنشا سەمينار-ترەنينگتەر، كەزدەسۋلەر وتكىزىلەدى. جاستار ەڭبەك جاساقتارى قىزمەتتەرىن دامىتۋ باعىتىندا الەۋمەتتىك قىزمەتتى ۇيىمداستىرۋ جوباسى بويىنشا 300 جاستى ەڭبەكپەن قامتۋ جوسپارلانعان ەدى. وعان بەلسەنە قاتىسقاندار اراسىنان 65 جاس جوبا اياسىندا تۇراقتى جۇمىسقا ورنالاستى»، - دەدى ق.جانۇزاقوۆ.

بۇعان دەيىن حابارلاعانىمىزداي، سىر وڭىرىندە قۇرىلعان «جاقايەۆ ءىزباسارلارى» ەڭبەك لاگەرى جاستارى دا سوڭعى بۋىن وكىلدەرىنە ونەگەلى ءىستى دارىپتەپ كەلەدى. ولاردىڭ نەگىزگى ماقساتى - جاستاردى اۋىلدا ەڭبەك ەتۋگە شاقىرۋ. ەڭبەك لاگەرى وڭىردەگى ءتۇرلى وقۋ ورىندارىنىڭ ستۋدەنتتەرىنەن جاساقتالعان. جاستار اۋىلدىق جەرلەردە تازا ەڭبەك مايدانىنا نازار اۋدارىپ، قاراپايىم ديقان قاۋىمىنىڭ تىنىس-تىرشىلىگىنە زەر سالدى.

ەسكە سالا كەتسەك، ق ر پرەزيدەنتى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى حالىققا جولداۋىندا  جىلدى «جاستار جىلى» دەپ جاريالاعان بولاتىن.